မတ်မလီု၊ ဂျာန္နဝါရဳ ၂၁
ပ္ဍဲတွဵုရးဍုၚ်မန် ဍုၚ်မတ်မလီုဂှ် ဂကောံအုပ်ဓုပ်ကွာန်ကံၚ်ဇြဳပၞာန်တံကဵု ဂကောံအုပ်ဓုပ်အရာပ်တံ သွက်ဂွံကၠောန်စရၚ်မာဲဂးတုဲ အပ္ဍဲအကြာတ္ၚဲတံဏံ ဗက်ကံက်ဒၟံၚ် စရၚ်သ္ၚိကၟိန် မဆာဲပ္တိတ်လဝ်တံဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂကောံအုပ်ဓုပ်ကံၚ်ဇြဳပၞာန်တံဝွံ နကဵုဟိုတ်ဂွံကၠောန်စရၚ်မာဲဂှ် ကၠုၚ်စိုပ်သ္ၚိတုဲ မွဲသ္ၚိမ္ဂး ဒးကဵုစရၚ်သ္ၚိကၟိန် မဆာဲပ္တိတ်လဝ် ၜါတၞးဏောၚ်ဂးတုဲ ဗက်ကံက်ဒၟံၚ်ရ။
ပ္ဍဲဒၞါဲကံက်စရၚ်သ္ၚိကၟိန်ဂှ် ဟွံဒေါအ်ဟွံဂွံ သွက်ဂွံကဵုလိက်တၞးစရၚ်သ္ၚိကၟိန် မဆာဲပ္တိတ်လဝ် ၜါတၞးဂှ်ကီု၊ ယဝ်ဟွံကဵုမ္ဂး ပြဒ္ဒညာမက္တဵုဒှ်ကၠုၚ် ဗွဲကြဴတံဂှ် ကေတ်အာတာလျိုၚ် ဟွံသေၚ်ပုဟ်ဂှ် ဘပဠဒၟံၚ်ရ။
ညးဒေသမတ်မလီုမွဲတၠဂှ်တှ်ေ ပွမကံက်ကၠုၚ် လိက်တၞးစရၚ်သ္ၚိကၟိန် မဆာဲပ္တိတ်လဝ်ၜါတၞးဂှ်ဝွံ ဟိုတ်နူမိက်ဂွံတီ လၟိဟ်မၞိဟ်တြုံကဵု လၟိဟ်ညးမတိတ်အာဍုၚ်သ္အာၚ်တံ ဒှ်မာန်ဂှ် သ္ၚဳဂၠိပ်လဝ်ရ။
“ ရုၚ်အုပ်ဓုပ်တံ ကံက်ကပှ်ဂးတုဲ မွဲသ္ၚိတှ်ေ လိက်တၞးစရၚ်သ္ၚိကၟိန်ၜါတၞး၊ ဗက်ကံက်ဒၟံၚ်စၟအ်အရာပ်။ အဓိကဂှ်တှ်ေ ပအဓိကကဵု စရၚ်လၟိဟ်မၞိဟ်တြုံတံဂှ်တုဲ ဒှ်သဘဴကလေၚ်စၟဳတ်။ တုဲတှ်ေ လၟိဟ်တိတ်ဍုၚ်သ္အာၚ် ချိုတ်တ်ပၠိုတ်တ် နွံမူစိရောဟီုဂှ် ဂွံတီအရာဏံ ဒှ်မာန်ရ” သာ်ဝွံ သ္ဂးရ။
အတိုၚ်ဂလာန် ညးဒေသလ္တူဍုၚ်တံဂှ်မ္ဂး ပ္ဍဲအရာဗက်ကံက် လိက်တၞးစရၚ်သ္ၚိကၟိန် မဆာဲပ္တိတ်လဝ်တံဂှ် အရာပ်လ္ၚဵုတံဂှ်တှ်ေ ဒးအာစိုပ်ကဵုဇရေၚ်ရုၚ်သ္ကိုပ်အုပ်ဓုပ် တိုက်ရိုက်တုဲ အရာပ်လ္ၚဵုတံဂှ်တှ်ေ က္ဍိုပ်သ္ၚိကၠံတံ ကၠုၚ်စိုပ်ကံက်ဒၟံၚ်ရ။
ပ္ဍဲအရာပ်လ္ၚဵုတံဂှ်တှ်ေ စကံက်ဒၟံၚ် လိက်တၞးစရင်သ္ၚိကၟိန်တံဂှ်ယျတုဲ အရာပ်သှ်ေတံဂှ်တှ်ေ ပလေဝ်ပလေတ်ဒၟံၚ်ဂွံကံက်ကပှ်ဂှ် နူကဵုသြၚ်လောန်တိုၚ်(မ်) ဂၠိုက်ဂၠါဲဂွံတီကေတ်ရ။
ဟိုတ်နူကံၚ်ဇြဳပၞာန် ကံက်ကၠုၚ်လိက်တၞးစရၚ်သ္ၚိကၟိန် မဆာဲပ္တိတ်လဝ်တံဂှ်တုဲ အကြာညးသၟတ်ဂမၠိုၚ် ပရေၚ်ဒးဒှ်ဓဝိၚ် မဒးလုပ်ယိုက်လျိုၚ်ပၞာန်တံဂှ် သၠုၚ်တိုန်ဒၟံၚ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ