နေဗျဳဒဝ်၊ ဂျာန္နဝါရဳ ၂၂
အလုံဍုၚ်မွဲ ဟိုတ်နူပရေၚ်ပၞာန်သီအဝဵုတုဲ အခိၚ်ပေါဲဗ္တိုက် က္တဵုဒှ်ဒၟံၚ်ဒၞါဲပြးဇးဂှ် ကံၚ်ဇြဳပၞာန် ရီုဗၚ်ကဵုအာ ညးဍုၚ်ကွာန်ပါဲဒဴဘဲပၞာန် မ္ဒးထောံလသာဌာန်ဒၟံၚ် ဗွဲယာယဳတံဂှ်ဏောၚ်ဂှ် ပ္ဍဲဂိတုဂျာန္နဝါရဳ ၂၁ တေံ လလောၚ်ပ္တိတ်ကၠုၚ် နူကဵုလိက်ပရိုၚ်တြးဝါဒတံရ။
ပ္ဍဲကဵုလိက်ပရိုၚ်တြးဝါဒတံဂှ် ဟိုတ်နူပရေၚ်ဗ္တိုက်သၟာပကီုပရာပ်တံတုဲ ကုညးဍုၚ်ကွာန်ထောံလသာဌာန်ဒၟံၚ်ယာယဳတံဂှ် သွက်ဂွံထံက်ပၚ်ကဵုအာ နူကဵုသြန်ဗွဝ် ပရေၚ်ကောပ်ကာဲစပ်ကဵုဘဲအန္တရာယ်သဘာဝကောန်ဂကူဂှ် ဖန်ဇန်ရေၚ်တၠုၚ်ဒၟံၚ်ရောၚ် သ္ဂးလဝ်ရ။
မ္ဒးကၠောန်ကၠုၚ် သ္ဂောံရီုဗၚ်ညးပါဲဒဴဘဲပၞာန်တံ သာ်ဏံဂှ်ဝွံ က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုလဝ် တုဲကၠုၚ်ပ္ဍဲကောံဓရီုအလဵုအသဳကၟိန်ဍုၚ် မကၠောန်ဗဒှ်လဝ် ပ္ဍဲဂိတုဂျာန္နဝါရဳ ၁၇ ဂှ် မဒှ်တုဲ အခိၚ်လၟုဟ် ကံက်ဒၟံၚ်စရၚ် ပ္ဍဲကဵုရးဒေသ ကေုာံ တွဵုရးတံ နွံဂှ် သ္ဂးရ။
ညးမရီုဗၚ်ဒၟံၚ်ညးပါဲဒဴဘဲပၞာန်မွဲတၠဂှ်တှ်ေ အခိၚ်လၟုဟ် ကံၚ်ဇြဳပၞာန် ရီုဗၚ်ကဵု ညးပါဲဒဴဘဲပၞာန်တံဟီုဂှ် ၜိုတ်ထ္ၜးစရဏောၚ်တုဲ ကေတ်တၚ်နၚ်ညးပါဲဒဴဘဲပၞာန်တံတုဲ ရပ်စပ်ကၠုၚ် နဒဒှ်စရၚ်မာဲ သွက်ပေါဲရုဲမာဲမာန်ဂှ် ဟီုရ။
“နကဵုညးတံ ကၠောန်ထ္ၜးၜိုတ်လ္တူကျာရဏောၚ်။ ဍာံဍာံဂှ် ပ္ဍဲဒေသအညာပိုယ်တံ ယဝ်ကရောၚ်ပၞာန်ကံၚ်ဇြဳပၞာန်လုပ်ကၠုၚ်မ္ဂး စံၚ်ပလီုပလာ်၊ ပၠံၚ်ၜးတံရနွံ။ နကဵုဍေံတံ ကၠောန်ကၠုၚ်ဗီုလၟုဟ်ဂှ် ဟိုတ်နူမာဲရဏောၚ်။ ကၠာတေံမ္ဂး ဗီုကဵုနာဂေတ်ဂှ်တှ်ေ မၞိဟ်ချိုတ်အာတံဂှ် ကၠောန်ဏာမာဲတုဲ ရဲပါဲဒဴဘဲပၞာန်လၟုဟ်ဂှ်လေဝ် နကဵုဍေံတံ ရပ်စပ်ကၠုၚ်နဒဒှ်မမာဲတှ်ေ ရပ်စပ်အာဏောၚ်။ နကဵုဍေံတံ ရီုဗၚ်ကဵုဏောၚ်ဟီုဂှ် ပိုယ်တံ ပတှ်ေလေဝ်ဟွံပတှ်ေတုဲ ပ္ဍဲကဵုရီုဗၚ်ကဵုဏံဂှ်တှ်ေ စိုတ်ဓာတ်ပရဟိတလေဝ် ဟွံပါလုပ်ဟီုဂှ် ချိုတ်ပၠိုတ်ရ။ သီုညးဖအိုတ်ဂှ် ဒှ်ဒၟံၚ်ဒဒိုက် ဟိုတ်နူဍေံတံတုဲ ယဝ်ရဍေံတံ ရီုဗၚ်ကဵုဍာံဍာံမ္ဂး ပၟတ်လေဝ် ဟွံဒးစံၚ်ပတူဒၟံၚ်ပုဟ်” သာ်ဝွံ သ္ဂးရ။
သ္အာၚ်နူဂှ်ပၠန် ကံၚ်ဇြဳပၞာန်ဝွံ ကံက်စရၚ်ညးပါဲဒဴဘဲပၞာန်တံတုဲ အာတ်မိက်ကၠုၚ်အရီုဗၚ် နူဍုၚ်သ္အာၚ်တံမာန်တုဲ ရပ်စပ်ကၠုၚ်ညးပါဲဒဴဘဲပၞာန်တံ နဒဒှ်ဇွောံစဵုဒၞါပၞာန်ကီု၊ စၟတ်သမ္တီကၠုၚ် ဒၞါဲညးပါဲဒဴဘဲပၞာန်တံမံၚ်ဂှ်တုဲ ကၠောန်ကၠုၚ်မွဲမွဲသာ်မာန်ဂှ် ညးဆက်ဟီုရ။
ညးပါဲဒဴဘဲပၞာန်မွဲတၠဂှ်လေဝ် ကံၚ်ဇြဳပၞာန် ဟီုဒၟံၚ်ရီုဗၚ်ကဵုသာ်ဏံဏောၚ်ကီုလေဝ် ပ္ဍဲကဵုကွာန်ရးတံဂှ်တှ်ေ ဂစိုတ်ကမၠက်ဒၟံၚ်ဂကူမၞိဟ်ကီု၊ စံၚ်ပလီုပလာ်ဒၟံၚ်သ္ၚိဒၟံၚ်တံကီု၊ ထောံကၠုၚ်မခတိုဟ် နူကဵုပၞာန်ကျာတံ ကၠောန်ဒၟံၚ်ဂှ်ဝွံ ဒှ်ကံၚ်ဇြဳပၞာန်ရဏောၚ်ဂှ် ဟီုရ။
“ပ္ဍဲကွာန်ရးဍောတ်တ်တံရဂှ် ဍေံတံကၠုၚ်တှ်ေ စံၚ်ပတူထောံဖအိုတ်တံ ဂစိုတ်ဂမၠက်ဂကူမၞိဟ်တံဂှ် လ္ပာ်ကွာန်ရးပိုယ်တံ ဒးဂဗဒၟံၚ်ရဏောၚ်။ အခိၚ်ကာလပၠန်ဂတးလအ်ကၠုၚ်ဗက် ပရေၚ်ဍေံတံ ထ္ပက်ကရောၚ်ပၞာန်ဗလးတိတံဂှ် လီုအာယျလေဝ်။ ထ္ပက်ဟွံမာန်ရပုဟ်။ ဟိုတ်နူဍေံတံ မဒးလေၚ်ဒိုက်ကၠုၚ်ဇြဟတ်တံဂှ်ကီု၊ ဟိုတ်နူလ္ပာ်ပၠန်ဂတးပိုယ်တံ အုပ်ဓလီုကၠုၚ်တိဍာ်မာန်ကီုတုဲ အခိၚ်ထ္ပက်ကရောၚ်ပၞာန်ဗလးတိဟွံမာန်တှ်ေ လွဟ်ဍေံတံ အဓိကဂှ်တှ်ေ ဒှ်ကၠုၚ်ပၞာန်ကျာရဏောၚ်။ ကောန်အရာပ်တံဂှ်လေဝ် ဍေံတံ ပန်ကၠုၚ်ဂှ်နွံ။ လ္ပာ်ကွာန်ရးပိုယ်တံတှ်ေ ပ္ဍဲဂိတုတုဲကၠုၚ်တေံဂှ်လေဝ် ဒတုံစှ်ေလ္တူသ္ၚိကောန်အရာပ်တံ၊ ထောံမခတိုဟ်ကဵုပၞာန်ကျာတုဲ ဗ္တိုက်ကၠုၚ်ရ။ ကောန်အရာပ်တံ ဒးချိုတ်လီုလာ်တုဲ ကံၚ်ဇြဳပၞာန်ဂှ်တှ်ေ ဒေါအ်ဒေၚ်အာဟွံသေၚ်ပုဟ်” သာ်ဝွံ သ္ဂးရ။
သ္အာၚ်နူဂှ်ပၠန် ယဝ်ကံၚ်ဇြဳပၞာန်လုပ်ကၠုၚ်မ္ဂး နကဵုညးဒေသတံ ဒးပါဲဒလေတ်ကၠုၚ်ဂှ်ရ တၚ်နၚ်ညးပါဲဒဴဘဲပၞာန်တံ ဍာံဍာံဂှ် ကလိဂွံအာဟွံသေၚ်တုဲ ဟိုတ်နူပြဝကံၚ်ဇြဳပၞာန် မဓဇန်ကြမ်ကြတံဂှ်တုဲ ရီုဗၚ်ကဵုသာ်ဏံဟီုဂှ် ဓဝ်ပတှ်ေဟွံမွဲပုဟ်ဂှ် ညးဆက်ဟီုရ။
မွဲလ္ပာ်ဂှ်ပၠန် ကံၚ်ဇြဳပၞာန်ဂှ်တှ်ေ ပ္ဍဲကဵုသၞောဝ်ကောပ်ကာဲဘဲအန္တရာယ်သဘာဝ ၝောံပိုဒ် ၁၊ ၝောံပိုဒ်ပါ် (ခ) ဂှ် ဘဲအန္တရာယ်သဘာဝဟီုဂှ် ပွမက္တဵုဒှ် ပွပကီုပရာပ်၊ ပွမရပ်လွဟ် က္တဵုသပုန်တံဂှ်ဝွံ ပါလုပ်ဒၟံၚ် ပ္ဍဲဘဲအန္တရာယ်သဘာဝဂှ်တုဲ ဂွံထံက်ပၚ်သာ်ဏံဂှ် မ္ဒးဖန်ဇန်ကၠုၚ်ရောၚ် လလောၚ်ပ္တိတ်လဝ်ရ။
သ္အာၚ်နူဂှ်ပၠန် ဂွံရီုဗၚ်ညးပါဲဒဴဘဲပၞာန်လၟုဟ်ဂှ် မ္ၚးနူကဵုညးပါဲဒဴဘဲပၞာန် နူကဵုဗ္ဒိုပ်စ္ၜုဲစ္ၜော်ယာယဳ ညံၚ်ရဴဘာလကျာ် မၞုံအပ္ဍဲရးဒေသ ကေုာံ တွဵုရးတံဂှ် ညးမမံၚ်တန်တဴဒၟံၚ် ဒၞါဲမသကလောကောဒေံနွံ ပ္ဍဲအရာပ်၊ ပ္ဍဲကွာန်တံ၊ ပ္ဍဲကဵုသ္ၚိသ္ဇိုၚ်ဝန်တံဂှ်ကီု၊ ညးမလိၚ်မံၚ် ပ္ဍဲကဵုဗ္ဒမ်သ္ၚိ နအစဳဇန်ညးတံညးတံဂှ်ကဵု ညးမမံၚ်တန်တဴဒၟံၚ် နကဵုဗီုပြၚ်တၞဟ်ဟ်တံဂှ်လေဝ် ကံက်ကေတ်ဒၟံၚ်စရၚ်ရောၚ် သ္ဂးရ။
ဂွံရီုဗၚ်ကဵု ညးပါဲဒဴဘဲပၞာန်တံသာ်ဏံမာန်ဂှ် နကဵုဂကောံ၊ ဌာနမဆေၚ်စပ်ဂမၠိုၚ် ဂွံကံက်လဝ်စရၚ်ဂှ် စၞောန်ကၠုၚ်လဝ်တုဲ ညးယိုက်လျိုၚ်ပၞာန်ဂွံ သီုဖအိုတ်တံဂှ်လေဝ် ပ္ဍဲဒၞါဲကံက်စရၚ်တံဂှ် သွက်ဂွံပံၚ်တောဲပါလုပ်ကဵုအိုတ်ဂှ် ကံၚ်ဇြဳပၞာန် လလောၚ်ပ္တိတ်လဝ်ရ။
ဂကောံလ္ၚတ်ကေၚ်ကာ မဟာဗျူဟာ ကေုာံ မူဝါဒဍုၚ်ဗၟာ ISP-Myanmar ဂှ်တှ်ေ အလုံဍုၚ်ဗၟာမွဲ လၟိဟ်ညးဒဒိုက်ပါဲဒဴဘဲပၞာန်ဂှ်ဝွံ နွံကၠုၚ် စဵုကဵု ၆ ဒဿမ ၆ ပြကောဋိကိုဋ်ယျဂှ် ကၞောတ်သၞာံတုဲကၠုၚ်တေံ ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ်ရ။
ပ္ဍဲကဵုဏံ ရးသက်ကိုၚ်ဝွံ လၟိဟ်ညးပါဲဒဴဘဲပၞာန် နွံ ၂ ဒဿမ ၈ ပြကောဋိကိုဋ်ပြၚ် ဒှ်ဂၠိုၚ်အိုတ်တုဲ တွဵုရးကရေၚ်ဂှ် ညးပါဲဒဴဘဲပၞာန် နွံ ၈ ကိုဋ်ပြၚ် ဒှ်ဒုတိယဂၠိုၚ်အိုတ်တုဲ တွဵုရးရခေၚ်ဂှ်တှ်ေ လၟိဟ်ညးပါဲဒဴဘဲပၞာန် နွံ ၆ ကိုဋ်ပြၚ် ဒှ်တတိယဂၠိုၚ်အိုတ်ဂှ် သ္ဂးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ