နေဗျဳဒဝ်၊ ဂျာန္နဝါရဳ ၂၂
ဝန်ဇၞော်ကာဍုၚ်သ္အာၚ်အာဇြဳယာန်ဂမၠိုၚ် ဖ္တိုက်ဖ္အောဝ်ကၠုၚ် ကံၚ်ဇြဳပၞာန် မဒးဆေၚ်လဝ်မုက်ပၞာန် ကုဂကောံပၠန်ဂတးရပ်လွဟ်အလုံဍုၚ်မွဲဂှ် ဒေါအ်ပန်ပှော်တုဲ သွက်ဂွံကဵုက္ဍိုပ်ကဵု ပရေၚ်ဆဵုဂဗသဳကၠဳတံရ။
ပေါဲရုဲမာဲဝွံ ဒှ်ကိစ္စမ္ဒးကဵုက္ဍိုပ်ဟွံသေၚ် ဒေါအ်ကၠေအ်ပရေၚ်ဗ္တိုက်တံတုဲ ထေက်ကဵုဒးရေၚ်တၠုၚ်ပရေၚ်သဳကၠဳတံဂှ်ရောၚ် ဝန်ဇၞော်ကာဍုၚ်သ္အာၚ် မလေဝ်ယှာ မဒှ်ကၠုၚ်ဥက္ကဌအာဇြဳယာန်ဒးအလန်ဂှ် ဟီုလဝ် ပ္ဍဲဂိတုဂျာန္နဝါရဳ ၁၉ ဂှ်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် သွက်ကံၚ်ဇြဳပၞာန် မိက်ဂွံကၠောန်ပေါဲရုဲမာဲ နဒဒှ်ပၞော်တိတ်ပရေၚ်ဍုၚ်ကွာန်ဂှ်တှ်ေ တၚ်ဖ္တိုက်ဖ္အောဝ်အာဇြဳယာန်ဂှ်ဝွံ ဒှ်ကိစ္စဖ္ဍိုက်ဗပေၚ်ကဵုမာန်ဟွံသေၚ်ဂှ် သ္ၚဳဂၠိပ်လဝ်ရ။
“ သွက်ပၞော်တိတ်ပရေၚ်ဍုၚ်ကွာန်ညးတံတုဲ မိက်ဂွံကၠောန်ပေါဲရုဲမာဲ မဒှ်တုဲ ပရေၚ်ပကီုပရာပ်တံဂှ် ဟွံဒေါအ်ပုဟ်။ အကာဲအရာသာ်ဏံဂှ် မလေဝ်ယှာ ထ္မံက်ထ္ၜးလဝ်ရ။ အေ ဂှ်တှ်ေ ယဝ်မိက်ဂွံဆက်မံၚ် ပ္ဍဲအာဇြဳယာန်မ္ဂး မိက်ဂွံဆက်ပါလုပ် မိက်ဂွံဆက်ထ္မံက်ထ္ၜးလစွံစိုတ်ညးတံမ္ဂး ဒှ်သဘဴဒးဒေါအ်ပရေၚ်ပကီုပရာပ်တံဂှ်ဏောၚ်။ ပၞာန်ထ္ပက်ကဵုက္ၜၚ်ကျာတံဂှ် ဒးဒေါအ်ဏောၚ်။ အရာတံဏံဂှ်တှ်ေ နကဵုကံၚ်ဇြဳပၞာန် ဒှ်သဘဴဖ္ဍိုက်ဗပေၚ်မာန် ဟွံသေၚ်တံရ။ ဟိုတ်ဂှ်ရ ဍာ်ဇမၠိၚ်မ္ဂး စိုပ်အာဒဵုကဵုဒးပ္တိတ်ကၠေံ နူကဵုအာဇြဳယာန်မာန်ဏောၚ်ဂှ် အဲသ္ၚဳဂၠိပ်ကေတ်ရ” သာ်ဝွံ သ္ဂးရ။
ကြဴနူသီအဝဵုတုဲ တၚ်တုပ်စိုတ်အာဇြဳယာန် အလဵုက္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် မတုပ်လဝ်စိုတ် ၅ သာ်ဂှ်ဝွံ စဵုကဵုလအ်ကၠုၚ်ပွိုၚ်ပန်သၞာံဂှ် ထ္မံက်ရုပ်ရဴဟွံမာန်ဏီရ။
ပ္ဍဲကဵုတၚ်တုပ်စိုတ် ၅ သာ်ဂှ် သွက်ဂွံဒေါအ်ကဵု ပရေၚ်ပကီုပရာပ်တံကီု၊ အကြာဂကောံမဆက်စပ်ဂမၠိုၚ် သွက်ဂွံသဳကၠဳပ္ညဳပ္ညပ်တံကီု၊ ပ္ဍဲကဵုပရေၚ်ပ္ညဳပ္ညပ်သဳကၠဳဂှ် ညးစၞးတၟေၚ် ဥက္ကဌအာဇြဳယာန် သွက်ဂွံလုပ်အကြာရေၚ်တၠုၚ်ကဵုတံ ဒှ်တမ် ပါလုပ်ရ။
မွဲလ္ပာ်ဂှ်ပၠန် အလဵုအသဳကြုက် မလုပ်စိုပ်အကြာ ပ္ညဳပ္ညပ်ကဵုဒၟံၚ် ပရေၚ်ဍုၚ်ဗၟာဂှ်လေဝ် ကုဂကောံရပ်လွဟ်ကောန်ဍုၚ်အရၚ် မစုက်လုက်ကဵုညးတံဂှ် သွက်ဂွံဒေါအ်ပန်ပှော် ကုကံၚ်ဇြဳပၞာန်ဂှ် ကဵုကၠုၚ်ဇြဟတ်ဂရိုဟ် ဖ္တိုက်ဖ္အောဝ်ကၠုၚ်ရ။
ဟိုတ်ဂှ်ရ ကံၚ်ဇြဳပၞာန် ကေုာံ ဒပ်ကဝ်က MNDAA တံ ထ္ပက်လဝ်စၟတ်တဲ လိက်ကသုက်ဒေါအ်ပန်ပှော်တံဂှ်ရောၚ် ညးမၞုံအခေါၚ်ဟီုဂး ဌာနဝန်ဇၞော်ကာဍုၚ်သ္အာၚ်ဍုၚ်ကြုက် မဝ်နေန် ဟီုလဝ် ပ္ဍဲပေါဲသောၚ်ကလးလိက်ပရိုၚ် မကၠောန်ဗဒှ်လဝ် ပ္ဍဲဂိတုဂျာန္နဝါရဳ ၂၀ တေံရ။
ဆ္ဂး ဂွံဒေါအ်ပန်ပှော်ၜါလ္ပာ်ဂှ် တုပ်လဝ်စိုတ် ကုတၚ်နၚ်သာ်လဵုရောဟီုဂှ် ဟွံဟီုဏာလဝ်ရ။ ပြဟ်ဟ်ဏံ ပရေၚ်သွံရာန်ဗၞိက်ပယျဵု ကေုာံ ပရေၚ်သွံရာန်ဗၞိက်အပ္ဍဲဒေသ နူကဵုလ္ပာ်ကြုက် မကၟာတ်လဒဵုလဝ်တံဂှ် ကလေၚ်ပံက်ကဵုလဝ်ရ။
နကဵုဍုၚ်ကြုက် သွက်လၟေၚ်ကမၠောန်ပရေၚ်ၜိုဟ်လလမ် ဍုၚ်ဗၟာသ္ကုတ်သၟဝ်ကျာဂှ် ထံက်ပၚ်ရီုဗၚ်ကဵုအာဏောၚ်တုဲ ဆက်ရေၚ်တၠုၚ်အာ ပရေၚ်သဳကၠဳတံ ဗွဲမက္တိုၚ်ကၟဟ်ဏောၚ်ဂှ် သ္ဂးရ။
လအာတုပ်သာ်ဂှ်ကီု ညးစၞးတၟေၚ်စပ်ကဵုဍုၚ်ဗၟာ ကေုာံ ဍုၚ်မလေဝ်ယှာ မဒှ်ကၠုၚ်ဥက္ကဌဒးအလန်အာဇြဳယာန်ဂှ် သွက်ဂွံသောၚ်ကလး အကြေပ်အဂြတ်ဍုၚ်ဗၟာဂှ် ဆဵုဂဗအာ ကုဂကောံသာ်လဵုရောဟီုဂှ် သီုညးဖအိုတ် မၚ်ကျောဝ်ဒၟံၚ်အိုတ်ရ။
အပ္ဍဲဍုၚ်ဂှ်လေဝ် နူကဵုပေါဲသဳကၠဳၚိုဲသံၚ်ဂှ် တၚ်တုပ်စိုတ်ပရေၚ်ဆဵုဂဗသဳကၠဳတံ နွံဒၟံၚ်တုဲ လ္ပာ်ဍုၚ်သ္အာၚ်တံဂှ်လေဝ် ဂွံဒေါအ်ပန်ပှော်တုဲ သွက်ဂွံဆဵုဂဗသဳကၠဳဂှ် ဖ္တိုက်ဖ္အောဝ်လဝ် သီုကံၚ်ဇြဳပၞာန် သီုဂကောံရပ်လွဟ်သီုဖအိုတ်ရ။
စပ်ကဵုပရေၚ်ဏံတုဲ ဒံက်တာသာၚ်ကျဳဇြေန်သဵု ညးလ္ၚတ်သ္ၚဳဂၠိပ်ပရေၚ်ဍုၚ်ဗၟာဂှ် စပ်ကဵုပရေၚ်သဳကၠဳတုဲ အပ္ဍဲဍုၚ်ကီု ဍုၚ်သ္အာၚ်တံကီု အခိၚ်ဖ္တိုက်ဖ္အောဝ်ဒၟံၚ်ဂှ် အာဇြဳယာန် ဟီုကၠုၚ်သာ်ဏံဂှ်ဝွံ ဂွံဒှ်ကၠုၚ်ဂၠိုၚ်ဂှ် သ္ၚဳဂၠိပ်လဝ်ရ။
“အပ္ဍဲဍုၚ်ဂှ်လေဝ် ကိစ္စစပ်ကဵုပရေၚ်ဆဵုဂဗသဳကၠဳတံ ချဳဒရာၚ်ဒၟံၚ်နွံ။ တုဲတှ်ေ ဗွိုၚ်ဍုၚ်သ္အာၚ်တံဂှ်လေဝ် ဖ္တိုက်ဖ္အောဝ်ဒၟံၚ် မဏံရဏောၚ်။ အခိၚ်ဖ္တိုက်ဖ္အောဝ်ဒၟံၚ်ဂှ် ကြုက်ဂှ်လေဝ် လုပ်အကြာတုဲ ကၠောန်ကၠုၚ်ရ။ အာဇြဳယာန်ဂှ်လေဝ် ထပ်ဖ္တိုက်ဖ္အောဝ်ကၠုၚ် သာ်ဏံကီုရ။ ဗွဲတၟေၚ် ဂလာန်အာဇြဳယာန်ဂှ်ဝွံ လ္ပကဵုက္ဍိုပ်ကဵုပေါဲရုဲမာဲတုဲ သွက်ဂွံကဵုက္ဍိုပ်ကဵု ပရေၚ်ဒေါအ်ပန်ပှော် ကေုာံ ပရေၚ်ဆဵုဂဗသဳကၠဳ ညးတံဟီုလဝ်သာ်ဏံဂှ် ပိုယ်တံ ဂွံတီကေတ်ရ။ အရာဏံဂှ် သာတုဲဂွံဒှ်ကၠုၚ်ဂၠိုၚ်ဂှ် ပိုယ်တ်ံ ချိၚ်ခယျကေတ်ဂွံရ”သာ်ဝွံ သ္ဂးရ။
သွက်ဂွံဒေါအ်ပန်ပှော်ဂှ် ဍုၚ်မလုပ်ဂကောံအာဇြဳယာန်တံ ဖ္တိုက်ဖ္အောဝ်လဝ် ဂကောံဗော်သွး မက္တဵုဒှ်ဒၟံၚ်ပဋိပက္ခ ပ္ဍဲကဵုဍုၚ်ဗမာသီုဖအိုတ်ဂှ်တုဲ ကုအရီုဗၚ်ပရေၚ်ဗ္စာရဏာမၞိဟ်တံဂှ်လေဝ် သွက်ဂွံကဵုအခေါၚ်လုပ်စိုပ်ဂှ် ဖ္တိုက်ဖ္အောဝ်လဝ်ရ။
ကံၚ်ဇြဳပၞာန်ဂှ်လေဝ် အခိၚ်ဒးဆေၚ်ဒၟံၚ်မုက်ကဵု ပရေၚ်ကျဗြံတံဂှ် ပြသၞာပရေၚ်ဍုၚ်ကွာန်ဂှ် သွက်ဂွံသောၚ်ကလး နကဵုနဲကဲပရေၚ်ဍုၚ်ကွာန်ဂှ် ကော်ဘိက်ဒၟံၚ် မွဲဏှမွဲဏှတုဲ ကဵုဂကောံပၠန်ဂတးတံ ထောံကၠေံလွဟ်တုဲ သွက်ဂွံသဳကၠဳပရေၚ်ဍုၚ်ကွာန်ဂှ် ကဵုကၠုၚ်ဒၟံၚ်ဒမြိပ်အရေဝ် သီုကဵုအဝဵုရ။
ဆ္ဂး ပြဟ်ဟ်ဏံဂှ်တှ်ေ နကဵုကံၚ်ဇြဳပၞာန် မဒးဗလးလဝ်တဲ တိဍာ်အုပ်ဓုပ် ဗွဲမဂၠိုၚ်ဂှ်တှ်ေ ကဵုဒပ်ကဝ်က MNDAA သၟးရ ဒေါအ်လဝ်ပန်ပှော်ယာယဳတုဲ ဆက်ဒးဆေၚ်ဒၟံၚ်မုက်ကဵု ပၞာန်ထ္ပက်ဂကောံပၠန်ဂတးတံ ကဵု ဂကောံရပ်လွဟ်ကောန်ဍုၚ်အရၚ်တၞဟ်ဟ်တံရ။
ပရိုၚ်−သြၚ်လောန်တိုၚ်(မ်)
ဗီု−Social Media