ကျာ်ထဝ်၊ ဂျာန္နဝါရဳ ၂၃
တွဵုရးဍုၚ်မန် ပွိုၚ်ဍုၚ်ကျာ်ထဝ် ပ္ဍဲကဵုကွာန်(ၚှက်ပျောတော) ပ္ဍဲဂိတုဂျာန္နဝါရဳ ၂၁ အခိၚ်ဗ္တံဂှ် ဟိုတ်နူဒးအာ လွဟ်ဇၞော် နူလ္ပာ်ဒပ်ကံၚ်ဇြဳပၞာန်တံ မပန်နၚ်ဂှ်တုဲ ညးဍုၚ်ကွာန် ၁ တၠ ချိုတ်တုဲ ၃ တၠ ကလိဂွံလဝ်ဝပ်ရောၚ် ဂကောံပၠန်ဂတးဖျေံသ္ဇိုၚ်ဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုတ္ၚဲဂှ် အခိၚ်ဇိုၚ်သဝ်တ္ၚဲ ၜိုတ် ၆ နာဍဳဝိုက်ဂှ် နူကဵုတမ်ဒပ်ကမ်လှောဝ် စၟတ် ၆၀၂ ဂှ် ပန်ပှော်စုတ်လဝ်လွဟ်ဇၞော် ၄ မတုဲ ၂ မဂှ်ဝွံ ဒတုံဗ္တိုဟ်ထ္ကးအာလဝ် လ္တူသ္ၚိမၞိဟ်ဒၟံၚ် သ္ကုတ်သၟဝ်ကွာန်(ၚှက်ပျောတော) ဂှ်တုဲ မၞိဟ်ဇီုကပိုက်ချိုတ်အာနွံလဝ်ဂှ် ကောန်သ္ဂံၚ်ပၠန်ဂတးဖျေံသ္ဇိုၚ်ဒေသမွဲတၠ သ္ဂးရ။
ဟိုတ်နူဒးလွဟ်ဇၞော်တုဲ ဒဝ်အေချိုဝ် အာယုက် ၅၄ သၞာံ ဒးပြဟ်လလုဲအာ နကဵုဝပ်ပ္ဍဲဗုၚ်ဂှ်တုဲ ကောန်ဝုတ်ညး မယောန်နဒဳ အာယုက် ၁၅ သၞာံ၊ မလေအ်အ်ခိုၚ် အာယုက် ၁၅ သၞာံ နူကဵုသ္ၚိတၞဟ်ဟ်၊ ဒဝ်ခေန်ညောအ် အာယုက် ၆၀ သၞာံတံ ကလိဂွံအာလဝ်ဝပ်သ္ကာတ်မြဟ် ပ္ဍဲကဵုသြိုဟ်၊ တဲ၊ ဇကုဇကောဝ်တံဂှ်တုဲ ဒးပလံၚ်ဏာလဝ် ရုၚ်ဂဥုဲကျာ်ထဝ်ရ။
သ္အာၚ်နူဂှ်ပၠန် သ္ၚိဒၟံၚ် ပိမ၊ ကွဳစက် ၁ ဖ္ဍိုက်ကဵု ကပေါတ်အပ္ဍဲသ္ၚိတံလေဝ် ဇီုကပိုက်လီုလာ်အာ နွံဂှ် သ္ဂးရ။
ပ္ဍဲကဵုဗ္ဒါဲကွာန်(ၚှက်ပျောတော) နူကဵုဒပ်ပၞာန် မပန်ပှော်လွဟ်ဇၞော်ဂှ် ပေါဲဗ္တိုက်က္တဵုဒှ်ဒၟံၚ်ဟွံမွဲတုဲ ဂကောံပၠန်ဂတးတံ ဖျေံသ္ဇိုၚ်ချဳဒရာၚ်ဒၟံၚ်တံလေဝ် ဟွံမွဲပုဟ်ဂှ် ဂွံတီကေတ်ရ။
တုဲကၠုၚ်ပ္ဍဲဂိတုဒဳဇြေမ်ဗာ ၂၁ တေံဂှ်လေဝ် ပ္ဍဲကဵုပွိုၚ်ဍုၚ်ကျာ်ထဝ် ကွာန်တဂေချံၚ်ဖျာဂှ် ဟိုတ်နူဒပ်ကံၚ်ဇြဳပၞာန် ပန်ပှော်နၚ်လွဟ်ဇၞော်ကြာန်န်ဂှ်တုဲ ညးဍုၚ်ကွာန်ပိတၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ