ဍာ်ဗု၊ ဂျာန္နဝါရဳ ၂၃
ပ္ဍဲရးတၞၚ်သဳ ပွိုၚ်ဍုၚ်ဍာ်ဗု ပ္ဍဲကဵုဒေသထဝါဲ ဒၞါဲအပိုၚ်အခြာပရေၚ်ပိုန်ဒြပ်ဗွဲတၟေၚ် ပ္ဍဲဗွိုၚ်သၞေဟ်ဍာ်ဒမျိုဟ်ဂှ် ဒပ်ကံၚ်ဇြဳပၞာန် ထ္ပက်ကရောၚ်ပၞာန် လုပ်စိုပ်ကၠုၚ်တုဲ ညးဍုၚ်ကွာန်ဒေသ ၂၀၀၀ ပြၚ် နူကွာန်ပန်ကွာန်ဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရောၚ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန် ဇြဟတ်ဗွဲမဂၠိုၚ်ဂၠေၚ် မပါလုပ်ဂှ်ဝွံ စနူဂိတုဂျာန္နဝါရဳ ၂၁ အခိၚ်နူဂယးဂှ်တုဲ ထ္ပက်ကၠုၚ်ကရောၚ်ပၞာန် လုပ်စိုပ်ကၠုၚ်လဝ် ပ္ဍဲပွိုၚ်ဍုၚ်ဍာ်ဗု ဒေသနဗုလာ ဒၞါဲအပိုၚ်အခြာဒေသပရေၚ်ပိုန်ဒြပ်ထဝါဲ သၞေဟ်ဍာ်ဒမျိုဟ်ဂှ်ရ။
ဟိုတ်နူထ္ပက်ပၞာန် လုပ်စိုပ်ကၠုၚ်သာ်ဏံတုဲ ညးဒေသ ၂၀၀၀ ပြၚ် နူကဵုကွာန်နဗုလာ၊ မူဒူ၊ နဗုတာန်၊ တကျက်နဳတံဝွံ ဒးဂြိပ်ဒဴပါဲဒလေတ်ဒၟံၚ် ပ္ဍဲဒဵုဂြိုပ်ဒၞါဲဗၠးဘဲတံဂှ်ရောၚ် မၞိဟ်တြုံဒေသမွဲတၠ ဟီုရ။
မွဲလ္ပာ်ဂှ်ပၠန် ဒပ်ကံၚ်ဇြဳပၞာန်ဝွံ အပ္ဍဲအခိၚ်ထ္ပက်ဒၟံၚ်ကရောၚ်ပၞာန်ဂှ် ညးဍုၚ်ကွာန်ကောန်အရာပ် မဂွံဆဵုကေတ် ပ္ဍဲဂၠံၚ်တံဂှ် ရပ်ဒက်ဂစိုတ်ဂယိုၚ်ကီု၊ စံၚ်ပလီုပလာ်သ္ၚိဒၟံၚ်တံကီုဂှ် လေပ်ကၠောန်တဴဂှ်ရ ညးဒေသဂမၠိုၚ်ဝွံ ဒးဂြိပ်ဒဴပါဲဒလေတ်ဒၟံၚ် ပ္ဍဲဒဵုဂြိုပ်မကြပ်တံ သီုကဵုဓဝိၚ်ရောၚ် သ္ဂးရ။
အခိၚ်လၟုဟ် အကြာဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန်ဂှ်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံဂှ် က္တဵုဒှ်ပေါဲဗ္တိုက်ၜါလ္ပာ်တံ ဟွံမွဲတုဲ ပ္ဍဲဂိတုဂျာန္နဝါရဳ ၂၁ အခိၚ်လဒေါဝ်တ္ၚဲဂှ် ဖံက်ပန်လဝ်သေနာတ် လ္ပာ်အပိုၚ်အခြာဒေသပရေၚ်ပိုန်ဒြပ်ထဝါဲဂှ်နွံဂှ် သ္ဂးရ။
မွဲလ္ပာ်ဂှ်ပၠန်လေဝ် စပ်ကဵုဗွိုၚ်သၞေဟ်ဍာ်ဒမျိုဟ်ထဝါဲဂှ်တုဲ တုဲကၠုၚ်လဒေါဝ်သၞာံတေံ ကၠောန်လဝ်ပရေၚ်သဳကၠဳ ကုဍုၚ်ရုယှာဂှ် လ္ပာ်ကံၚ်ဇြဳပၞာန် ဟီုလဝ်တုဲ ပ္ဍဲကဵုသၞာံဏံစဂှ်လေဝ် ကလေၚ်ထ္မံက်အာရုပ်ရဴ ကိုန်စဳမာန်ဂှ်ဏောၚ်ဂှ် လ္ပာ်ကံၚ်ဇြဳပၞာန် လလောၚ်ပ္တိတ်လဝ်ရ။
ပ္ဍဲကဵုဗွိုၚ်ကိုန်စဳမာန် ဒၞါဲအပိုၚ်အခြာဒေသပရေၚ်ပိုန်ဒြပ်ထဝါဲဂှ် စနူသၞာံ ၂၀၂၂ တုဲ ဒပ်ကံၚ်ဇြဳပၞာန် ကေၚ်လုပ်စိုပ်ထ္ပက်ကၠုၚ်ကရောၚ်ပၞာန် ဂၠိုၚ်ၚ်ကဵုဝါတုဲ အခိၚ်ထ္ပက်ကရောၚ်ပၞာန်ဂှ်လေဝ် ပေါဲဗ္တိုက်ၜါလ္ပာ် က္တဵုဒှ်လဝ်တုဲ ညးဒေသတံ ဒးဂြိပ်ဒဴပါဲဒလေတ်လဝ်ရ။
သၞာံတုဲကၠုၚ် ပ္ဍဲဂိတုနဝ်ဝေမ်ဗာ ၇ တေံဂှ်လေဝ် ဒပ်ကံၚ်ဇြဳပၞာန် ထ္ပက်ကရောၚ်ပၞာန် လုပ်စိုပ်ကၠုၚ် ပ္ဍဲအပိုၚ်အခြာဒေသပရေၚ်ပိုန်ဒြပ်ထဝါဲ ဗွိုၚ်သၞေဟ်ဍာ်ဒမျိုဟ်ဂှ်တုဲ ညးဒေသဂၠိုၚ်ကဵုလ္ၚီ နူကဵုကွာန်ဗွဲမဂၠိုၚ်ဂှ် ဒးဂြိပ်ဒဴပါဲဒလေတ်လဝ် ဒၞါဲဗၠးဘဲတံဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု− Social Media