မတ်မလီု၊ ဂျာန္နဝါရဳ ၂၃
နကဵုအလဵုအသဳညဳသၟဟ်ဂကူ NUG ပရေၚ်ဒက်ပ္တန်ဓဝ်ပတှ်ေ ကုဂကောံရပ်လွဟ်ကောန်ဍုၚ်အရၚ်တံဂှ် ကၠောန်ကၠုၚ်ဒဵုဗ္ၜတ်မွဲမွဲမာန်ယျဂှ် သမ္မတယာယဳ ဒူဝါလယှဳလ ဟီုရ။
ဆ္ဂး ဍိုက်ပေၚ်ယျဂှ် ဟီုဟွံဂွံဏီတုဲ ပရေၚ်ဒက်ပ္တန်ဓဝ်ပတှ်ေ ကုမဟာမိတ်တံဂှ်ဝွံ ဒှ်သဘဴပ္တိတ်ဇြဟတ်တုဲ ဒေါအ်ထောံဂွံဟွံသေၚ်ပုဟ်ဂှ် ဟီုဏာလဝ် ပ္ဍဲကဵုကောံဓရီုဂကောံအလဵုအသဳ NUG မကၠောန်ဗဒှ်လဝ် ပ္ဍဲဂိတုဂျာန္နဝါရဳ ၂၁ တေံရ။
ပရေၚ်ဒက်ပ္တန်ဓဝ်ပတှ်ေ ကုမဟာမိတ်ကောန်ဍုၚ်အရၚ်တံဂှ်ဝွံ ဒှ်လၟေၚ်ကမၠောန် Process ဂှ်တုဲ မွဲဒမြိပ်တရဴပၠန်ဂတးဏံဂှ် ညံၚ်လၟေၚ်ဒဒှ်ဏံ လမျီုဂွံလုပ် ဒးဂ္စါန်ဒက်ပ္တန်ဒၟံၚ်လၟိုန်ရောၚ် သ္ဂးရ။
အခါဂှ်မှ ဒက်ပ္တန်အာ ပဋိညာဉ်ပရေၚ်ဍုၚ်ကွာန် ကေၚ်ကာမဟာမိတ် သာတုဲဒြဟတ်မခိုဟ်တံ ခိုၚ်ၚ်ကၠိုက်က်မာန်ဏောၚ် ဒဒှ်ရဒုၚ်ဂိုၚ်ကေတ်ဂှ် သမ္မတယာယဳ ဟီုရ။
အတိုၚ်အကာဲအရာလၟုဟ်မ္ဂး ဂွံဂွံဓဝ်ပတှ်ေမဟာမိတ်တံ ဗွဲမခိုၚ်ကၠိုက်ဂှ်ဝွံ ပၟိက်ဇၞော်တဴ သွက်အလဵုအသဳညဳသၟဟ်ဂကူတုဲ သွက်ပၠန်ဂတးက္ညၚ်ဂှ်လေဝ် ပၟိက်ဇၞော်ဗွဲမလောန်ရောၚ် သ္ဂးရ။
ပ္ဍဲကဵုဂကောံရပ်လွဟ်ကောန်ဍုၚ်အရၚ် မဟာမိတ် NUG ဂှ် ဗော်သွးကောန်ဂကူကရေၚ် KNU ၊ ဒပ်ပၠတရဴကောန်ဂကူချေၚ် CNF ကေုာံ ဗော်တောတက်ကောန်ဂကူကရေၚ်ဍာဲ KNPP တံ ပါလုပ်ဒၟံၚ်အဓိကတုဲ ကဵုဂကောံရပ်လွဟ်ကောန်ဍုၚ်အရၚ်တၞဟ်ဟ်တံဂှ်လေဝ် ပံၚ်တောဲဒၟံၚ်ပရေၚ်ပၞာန်တံ နွံဒၟံၚ်ရ။
ပၠန်ဂတးလၟုဟ်ဝွံ ဒှ်သွက်သ္ဂောံဗ္တိုက်သရိုဟ် သၞောတ်တၠအဝဵုပၞာန်တုဲ နကဵုအစောဲဒေသ ဆၜိုတ်စဵုဒၞါဂွံ ဒၞါဲဒေသဇကုသၟးဂှ် ဒှ်အကာဲအရာမ္ဒးပြေစိုတ်ဂွံ ဟွံသေၚ်ပုဟ်ဟီုဂှ် ဒးကၠိုဟ်ကေတ်ဏောၚ်ဂှ် သမ္မတယာယဳ ဟီုရ။
ဟိုတ်ဂှ်ရ အလုံဍုၚ်မွဲ ညံၚ်ဂွံဗၠးၜးနူသၞောတ်တၠအဝဵုပၞာန်ဂှ် ဖအိုတ်ကၠေံအစောဲဒေသတုဲ ရန်ကဵုအလုံဍုၚ်မွဲတုဲ ဒၞါဲဒေသလဵုဟွံဟီု ဂွံယိုက်ဂၠေၚ်တာလျိုၚ်ပၠန်ဂတးတံမာန်ဂှ် မိက်ဂွံကဵုဒှ်ဒၟံၚ်ဒတုဲလၟိုန်ရောၚ် ဖ္တိုက်ဖ္အောဝ်လဝ်ရ။
ပ္ဍဲကဵုကောံဓရီု သတ္တာဟတုဲကၠုၚ်တေံဂှ်လေဝ် ပ္ဍဲအရာဒက်ပ္တန် ပရေၚ်ဆက်ဆောံမဟာမိတ် ကုဂကောံမဟာမိတ်ကောန်ဍုၚ်အရၚ်တံ ဂွံခိုၚ်ကၠိုက်ဂှ် နွံပၟိက်ညံၚ်ဂွံဒှ်ဒပ်ပံၚ်ကောံ မစှ်ေကဵုနတဲဂှ် သမ္မတယာယဳ ဒူဝါလယှဳလ ဟီုပ္တိတ်လဝ်ရ။
ဂကောံဒပ် နွံသၟဝ်တဲဌာနဝန်ဇၞော်ကာစဵုဒၞါ NUG သီုဖအိုတ်ဂှ်ဝွံ သွက်ပရေၚ်ဗၠးၜး တိဍာ်ဂကောံရပ်လွဟ်ကောန်ဍုၚ်အရၚ်မဟာမိတ်တံဂှ် ပံၚ်တောဲလုပ်ဒၟံၚ်ပေါဲဗ္တိုက် ပ္ဍဲတွဵုရးဂမၠိုၚ်ရောၚ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ် အကာဲအရာပရေၚ်ပၞာန်တောတက် သၞာံ ၂၀၂၄ ဂှ်ရ။
ပရိုၚ်−သြၚ်လောန်တိုၚ်(မ်)
ဗီု−NUG