မတ်မလီု၊ ဂျာန္နဝါရဳ ၂၃
သ္ၚိမၞိဟ်ဒၟံၚ် နွံပ္ဍဲအရာပ်လ္တူဍုၚ်မတ်မလီု တွဵုရးဍုၚ်မန်တံဂှ် နကဵုဟိုတ်ၜက်ၜေတ်တုဲ မံၚ်စံၚ်ဒၟံၚ်ဂှ် ဂကောံသၟဝ်တဲကံၚ်ဇြဳပၞာန်တံ ဗက်ပလီုပလာ်ဒၟံၚ်ရောၚ် ညးဒေသတံ ဟီုရ။
အခိၚ်လၟုဟ် ဂကောံသၟဝ်တဲကံၚ်ဇြဳပၞာန်တံဂှ်တှ်ေ သ္ၚိမၞိဟ်ဒၟံၚ် နူအရာပ်လ္တူဍုၚ် အရာပ်လှိုၚ်တံကဵု အရာပ်သာယာအေတံဂှ် ၜက်ၜေတ်တုဲမံၚ်စံၚ်ဒၟံၚ်ဂးတုဲ ရပ်စပ်ဇြဟတ်ဗွဲမဂၠိုၚ်ဂၠေၚ်တုဲ ကၠောန်သ္ပပလီုပလာ်ဒၟံၚ်ရ။
မ္ဒးဗက်ပလီုပလာ် သ္ၚိမၞိဟ်ဒၟံၚ်သာ်ဏံဂှ်ဝွံ တုဲကၠုၚ်ပ္ဍဲဂိတုဂျာန္နဝါရဳ ၁၀ တေံ နူကဵုကောံဓရီု မကၠောန်ဗဒှ်လဝ် ပ္ဍဲရုၚ်ဂကောံအလဵုအသဳတွဵုရးဂှ် ဝန်ဇၞော်ပရေၚ်ဂီုကၠီု ကေုာံ ကေၚ်ကာပယျဵု ကံၚ်ဇြဳပၞာန်မခါန်ပ္တိုန်လဝ်ဂှ် ကဵုကၠုၚ်စၞောန်ပၟိၚ်ရောၚ် ဂကောံဗဂဵုလဟဵုပွိုၚ်ဍုၚ် ဟီုလဝ်ရ။
ညးဒေသမွဲတၠဂှ်တှ်ေ အခိၚ်လၟုဟ် ဂကောံသၟဝ်တဲကံၚ်ဇြဳပၞာန်တံဝွံ နူဂယးပြဟ် နကဵုဇြဟတ်မၞိဟ်မဂၠိုၚ်ဂၠေၚ်ဂှ် ကၠုၚ်စိုပ်ပလီုဏာလဝ် သ္ၚိမၞိဟ်ဒၟံၚ် ပ္ဍဲအရာပ်လှိုၚ် ဂၠံၚ်(အုတ်ဖို) ကဵု သ္ၚိနွံဒၟံၚ်သဗာန်အရာပ်သာယာအေတံဂှ်ရောၚ် ဟီုရ။
“ ဒၞါဲပလီုဂှ်တှ်ေ ဗ္ဒါဲ(အုတ်ဖို၊ သာယာအေး) ဂှ်။ ၜိုတ်နူဂယးပြဟ် မသုန်နာဍဳဝိုက်။ နကဵုဇြဟတ်မၞိဟ် ဇြဟတ်ဘူဒိုဝ်ဇြာတံဂှ်ရ။ ပလီုဒၟံၚ်ဗီုဏံ။ ပါသီုကဵုပါၚ်မုခ်ဘာလကျာ်။ ပလီုဏာတုဲယျလေဝ်” သာ်ဝွံ သ္ဂးရ။
သ္အာၚ်နူဂှ်ပၠန် သ္ၚိမၞိဟ်ဒၟံၚ် ဒးဒုၚ်ပလီုလဝ်သာ်ဏံတံဂှ် တၠကမၠောန်မစုက်လုက်ကဵုကံၚ်ဇြဳပၞာန်တံ တက်ပ္တိတ်ဂအာၚ် သွံတြးလဝ်တုဲ သိုၚ်ပ္တန်လဝ်ခိုၚ်ၚ်ကၠိုက်က်တုဲ မံၚ်ဒၟံၚ်အိုတ်ရောၚ်ဂှ် ညးဆက်ဟီုရ။
အတိုၚ်လိက်လလောၚ်ပရိုၚ် နူကဵုဂကောံဗဂဵုလဟဵုပွိုၚ်ဍုၚ် သၟဝ်တဲကံၚ်ဇြဳပၞာန်ဂှ်မ္ဂး ဟိုတ်နူတၚ်စၞောန် ဝန်ဇၞော်ပရေၚ်ဂီုကၠီုကဵု ကေၚ်ကာပယျဵုဂှ်တုဲ နကဵုယၟုသ္ကိုပ်အုပ်ဓုပ် ဂကောံဗဂဵုလဟဵုပွိုၚ်ဍုၚ် အပ္ဍဲအရာပ်လှိုၚ်ကဵု အရာပ်သာယာအေဂှ် မ္ဒးပလီုလဝ် စမြိုၚ်ၜက်ၜေတ် အပ္ဍဲဂအာၚ်တိ သမၠဲ ၁၁.၂၃၉ ဨက မဂွံလဝ်အခေါၚ် လန/၃၉ ဂှ်ရောၚ် သ္ဂးရ။
သ္အာၚ်နူဂှ်ပၠန် စမြိုၚ်သှ်ေဒၟံၚ် အပ္ဍဲဂအာၚ်တိတံဏံဂှ်လေဝ် အပ္ဍဲဂိတုဂျာန္နဝါရဳ စၟတ်တ္ၚဲ ၃၀ ဏံ စွံလက္ကရဴအိုတ်တုဲ သွက်ဂွံကလေၚ်ပလီု ဗွဲမပြဟ်ဂှ် ပလံၚ်ဗစိုပ်လဝ်လိက်ရ။
အပ္ဍဲတ္ၚဲမစၟတ်လဝ်ဂှ် ယဝ်ဟွံပလီုကၠေံစမြိုၚ်တံဂှ်မ္ဂး ကေတ်အာရေဝ် ဗွဲမဗဗွဲကဵုသၞောဝ်ပရေၚ်ဗဂဵုလဟဵုတွဵုရးဂှ်ဏောၚ်ဂှ် ဂးကီုလေဝ် ကၠာဟွံဂွံစိုပ်တ္ၚဲမစၟတ်လဝ်ဂှ် ဗက်ပလီုပလာ်ဒၟံၚ်တံ နွံရောၚ် ညးဒေသတံ ဟီုရ။
အတိုၚ်ဂလာန်ညးဒေသတံဂှ်မ္ဂး ပ္ဍဲကဵုဂကောံသၟဝ်တဲကံၚ်ဇြဳပၞာန်တံ မဗက်ပလီုဒၟံၚ် စမြိုၚ်ၜက်ၜေတ်တံဂှ် သီုဘာလကျာ် မပါလုပ်ဂှ် သ္ၚိမၞိဟ်ဒၟံၚ် အပံၚ်ဖအိုတ်ဂၠိုၚ်ကဵုကၠံ နွံမာန်ရောၚ် ဟီုဂးဒၟံၚ်ကီုလေဝ် နကဵုသြၚ်လောန်တိုၚ်(မ်) သ္ပဒတန်ဟွံမာန်ဏီရ။
ပ္ဍဲဍုၚ်မတ်မလီုဂှ်တှ်ေ ကြဴနူပၞာန်သီအဝဵုတုဲ ဌာနမဆေၚ်စပ် နူသၟဝ်တဲကံၚ်ဇြဳပၞာန်တံ ကေတ်ၚုဟ်တုဲ တိလိၚ်စလဝ်တံဂှ် ကလေၚ်သီကေတ်ဒၟံၚ်တံ နွံတုဲ တိအရာပ်ပိုၚ် သ္ကိုပ်အုပ်ဓုပ်ကံၚ်ဇြဳပၞာန်မခါန်ကၞက်ပ္တိုန်လဝ် မသွံတြးလဝ်တံသၟးဟွံက သီုတိဝါတံဂှ်လေဝ် ကလေၚ်သီကေတ်ဒၟံၚ်တံ နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ