ကျာ်ဍုၚ်၊ ဂျာန္နဝါရဳ ၂၄
ပ္ဍဲဍုၚ်ကျာ်ဍုၚ် တွဵုရးကရေၚ် ဒေသဗော်သွးကောန်ဂကူကရေၚ် KNU မထိၚ်ဒက်လဝ်ဂှ် ဟိုတ်နူဒပ်ကံၚ်ဇြဳပၞာန် ထောံမခတိုဟ်တုဲ မၞိဟ်ဗြဴမွဲတၠ ချိုတ်တုဲ စမြိုၚ်လ္ၚဵု လီုလာ်အာလဝ်ရောၚ် KNU ဗဟဵု လလောၚ်ပ္တိတ်လဝ် ပ္ဍဲဂိတုဂျာန္နဝါရဳ ၂၃ တေံရ။
ပ္ဍဲဂိတုဂျာန္နဝါရဳ ၂၂ အခိၚ်နူဂယး ၜိုတ် ၇ နာဍဳဝိုက်ဂှ် ဒပ်ကျာနေဗျဳဒဝ် ကၠုၚ်စိုပ်ထောံလဝ်မခတိုဟ် ဍုၚ်ကျာ်ဍုၚ် နကဵုက္ၜၚ်ကျာဗ္တိုက် Yak-130 Jet Fighter ရ။
ဟိုတ်နူထောံလဝ်မခတိုဟ်ဂှ်တုဲ ဒတုံဗ္တိုဟ်ထ္ကးအာလဝ် ဗ္ဒါဲရုၚ်ပၠိုတ်ပၟတ် ဍုၚ်ကျာ်ဍုၚ်ဂှ်တုဲ ဒဝ်ညဵုညဵုဝေန် အာယုက် ၅၁ သၞာံ ဒၟံၚ်အရာပ်စၟတ်−၃ ဍုၚ်ကျာ်ဍုၚ် စဴကၠုၚ်နူခွါတ်ထၜိုတ်ဂှ် ဒးတုဲချိုတ်အာလဝ်ရ။
အပ္ဍဲပရေၚ်မခတိုဟ်ဗ္တိုဟ်ထ္ကးဂှ် သ္ၚိညးဍုၚ်ကွာန် သ္ၚိမၞိဟ်ဟွံမံၚ် ဗ္ဒါဲရုၚ်ပၠိုတ်ပၟတ်ကဵု သ္ၚိဗ္ဒါဲဗ္ဒါဲတံဂှ် ဇီုကပိုက်လီုလာ်အာလဝ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး KNU ဗဟဵုရ။
သၞာံတုဲကၠုၚ် ဂိတုမာတ်တေံ ဒပ်ပၞာန်ဗၠးၜးကောန်ဂကူကရေၚ် KNLA ကီု သီုဒပ်ပံၚ်ကောံ ဂကောံဇြဟတ်ပၠန်ဂတးတံ ဗ္တိုက်သီဂွံလဝ် ဍုၚ်ကျာ်ဍုၚ်ရ။
ကံၚ်ဇြဳပၞာန်ဝွံ တုဲကၠုၚ်ဂိတုဂျာန္နဝါရဳ ၂၁ တေံဂှ်လေဝ် ကၠုၚ်ထောံလဝ်မခတိုဟ် လျိုၚ်ပံၚ် ၅၀၀ ၜါမ ဗ္ဒါဲပွဳပွူကွာန်(ကျုံစိန်) ပွိုၚ်ဍုၚ်ဘာအၚ် တွဵုရးကရေၚ်ဂှ်တုဲ မၞိဟ်ဇီုကပိုက်ကလိဂွံလဝ်ဝပ်ဂှ် ဟွံမွဲဂှ် KNU ဗဟဵု လလောၚ်ပ္တိတ်လဝ်ပရိုၚ်ရ။
ပရိုၚ်−သြၚ်လောန်တိုၚ်(မ်)
ဗီု−KNU