ထဝါဲ၊ ဂျာန္နဝါရဳ ၂၄
ရးတၞၚ်သဳ ပွိုၚ်ဍုၚ်ထဝါဲ ဒေသ(အရှေ့တော) ပ္ဍဲကွာန်(ဝကုန်း) ဇိုၚ်ကြုၚ် သ္ကုတ်သၟဝ်ကျာဂှ် ကောန်ကလောန်ကၠအ်သတ်မွဲတၠ ဒးမာၚ်တိုပ်တိတုဲ ဇိုၚ်ပိုတ်ကလိဂွံလဝ်ဝပ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကိုဝ်ဝေန်အံၚ် အာယုက် ၄၂ သၞာံ ဒၟံၚ်ကွာန်(ဝကုန်း) ပ္ဍဲဂိတုဂျာန္နဝါရဳ ၂၂ အခိၚ်နူဂယး ၜိုတ် ၈ နာဍဳဂှ်ဝွံ နူသ္ၚိညး တိတ်အာကၠအ်သတ် နကဵုကွဳလိုန်ဓာတ်တုဲ အခိၚ်အာဒၟံၚ်ဂှ် ဒးဂဗလဝ်ကဵု ပရေၚ်မာၚ်တိုပ်တိဗ္တိုဟ်ထ္ကးရ။
ဟိုတ်နူမာၚ်တိုပ်တိဂှ်တုဲ ကိုဝ်ဝေန်အံၚ်ဝွံ ဇိုၚ်ပါဲပိုတ်အာတုဲ ဇိုၚ်ပုၚ်ဂှ်လေဝ် နူကဵုဂၞေဟ်ဇိုၚ် ကလှ်ပိုတ်အာတုဲ ဂွံလဝ်ဝပ်သ္ကာတ်မြဟ်ဂှ်ရ ဒးတိုန်စိုပ်လွဳလွတ်ဒၟံၚ် ပ္ဍဲရုၚ်ဂဥုဲထဝါဲ ဗ္ဒမ်ကာမံက်တိုန်ရ။
အတိုၚ်ဂလာန် ညးဒေသတံဂှ်မ္ဂး မာၚ်ဏံဂှ်ဝွံ ဒှ်မာၚ်ဗော်သွးကောန်ဂကူကရေၚ် KNU ပစူလဝ်တုဲ လ္ပအာဒၞါဲတံဏံညိ ကဵုလဝ်သတိသာ်ဏံဂှ် ဂွံတီကေတ်ရ။
ကောန်ကွာန်ဗွဲမဂၠိုၚ်ဂှ်တှ်ေ ဗ္ဒါဲဗ္ဒါဲကွာန် ပ္ဍဲကဵုကၠအ်ဂူဝါ၊ ဇိုၚ်ဂြိုပ်၊ ပ္ဍဲကဵုသ္ကုတ်ဂၠံၚ်လ္ၚဵုတံဂှ် မာၚ်နွံဒၟံၚ်တုဲ ဟွံဂံၚ်အာကၠုၚ်ဒှ်ဒၟံၚ်တုဲ ကမၠောန်ကၟိတ်တံလေဝ် ဟွံဂွံကၠောန်ပုဟ်ဂှ် သ္ဂးအိုတ်ရ။
အတိုၚ်လိက်ဒုၚ်စဳရေၚ် ICBL ဂကောံချဳဒရာၚ်ပရေၚ်ကၟာတ်လဒဵုမာၚ်တိုပ်တိ ဍုၚ်နာနာ မလလောၚ်ပ္တိတ်လဝ် ပ္ဍဲဂိတုနဝ်ဝေမ်ဗာ ၂၀ တေံဂှ်မ္ဂး ဍုၚ်ဗၟာဝွံ ၜက်တိုန်သဳရဳယျာတုဲ ပ္ဍဲဂၠးတိဏံ ဒှ်ညးဇီုကပိုက်ချိုတ် ဟိုတ်နူမာၚ်တိုပ်တိဂှ် နွံကၠုၚ် စဵုကဵု ၁၀၀၀ ပြၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ