သဓီု၊ ဂျာန္နဝါရဳ ၂၅
တွဵုရးဍုၚ်မန် ပ္ဍဲပွိုၚ်ဍုၚ်သဓီုကဵု ပွိုၚ်ဍုၚ်ကျာ်ထဝ်တံဂှ် ဟိုတ်နူဒပ်ကံၚ်ဇြဳပၞာန် ပန်ပှော်ကဵုလွဟ်ဇၞော်ကီု သီုကဵုဗ္တိုက်ကဵုဒရုၚ်တံဂှ်တုဲ ကောန်ၚာ်သၟတ်မွဲတၠ မပါလုပ် ညးဍုၚ်ကွာန်ကောန်အရာပ် ၜါတၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် နူကဵုခရိုၚ်သဓီု KNU ရ။
ပ္ဍဲဂိတုဂျာန္နဝါရဳ ၂၃ အခိၚ်ဗ္တံ ၜိုတ် ၃ နာဍဳဂှ် ဒပ်ကံၚ်ဇြဳပၞာန် ကၠုၚ်စိုပ်ထောံဏာလဝ်မခတိုဟ်ၜါမ ပ္ဍဲပွိုၚ်ဍုၚ်ကျာ်ထဝ် ကွာန်ခယဲဂှ်တုဲ သဝ်အေဝ်သဵု ဒၟံၚ်ကွာန်ဝေန်ကာန် နွံဒၟံၚ်လ္တူဂၠံၚ်ကွာန်ဂှ် ဇီုကပိုက်ကလိဂွံလဝ်ဝပ်ရ။
ပ္ဍဲကဵုတ္ၚဲဂှ်ရ တမ်ဒပ်ကံၚ်ဇြဳပၞာန် ခမရ စၟတ် ၉ ပန်ပှော်ကၠုၚ်လွဟ်ဇၞော် ပ္ဍဲကွာန်ထိုအ်ဂဝ်ကျိုဝ်ဂှ်တုဲ သဝ်ကျဝ်ထက်ဟုၚ် အာယုက် ၁၃ သၞာံ ဇီုကပိုက်ကလိဂွံလဝ်ဝပ်ရ။
ဟိုတ်နူဒပ်ကံၚ်ဇြဳပၞာန် ပန်ပှော်ဗ္တိုက်လဝ်ဂှ်တုဲ ရုၚ်ပလေဝ်ကွဳစက် ရုၚ်တြေံတြေံ ကဵု သ္ၚိမွဲမ ဇီုကပိုက်လီုလာ်အာလဝ်တုဲ ညးဍုၚ်ကွာန်ဒေသတံလေဝ် ဒးဂွိၚ်ဖေက်လကိုတ်ဒၟံၚ်အိုတ်ဂှ် ညးမၞုံအခေါၚ်ဟီုဂး ဗော်သွးကောန်ဂကူကရေၚ် KNU ပဒိုဝ်သဝ်အေနာၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲဂိတုဏံ ဒပ်ကံၚ်ဇြဳပၞာန် ဒဒှ်မပန်ပှော်ကဵုလွဟ်ဇၞော်၊ ထောံဖျေံမခတိုဟ် နကဵုဒရုၚ် ပ္ဍဲတိဍာ်အုပ်ဓုပ် ခရိုၚ်သဓီု KNU ပ္ဍဲကဵုလ္ပာ်ကွာန် နူအပ္ဍဲပွိုၚ်ဍုၚ်ၜဳကလေၚ်ကဵု ပွိုၚ်ဍုၚ်သဓီု၊ ပွိုၚ်ဍုၚ်ကျာ်ထဝ်တံဂှ် ဆက်ကၠောန်သ္ပဒၟံၚ်ရ။
တုဲကၠုၚ် ပ္ဍဲဂိတုဂျာန္နဝါရဳ ၂၁ တေံဂှ်လေဝ် ပ္ဍဲကဵုကွာန်(ၚှက်ပျောတော) ပွိုၚ်ဍုၚ်ကျာ်ထဝ်ဂှ် ဒပ်ကံၚ်ဇြဳပၞာန် ဟိုတ်နူပန်ပှော်လဝ်လွဟ်ဇၞော်တုဲ ညးဍုၚ်ကွာန်ကောန်အရာပ် မွဲတၠ ချိုတ်တုဲ ပိတၠ ဇီုကပိုက်ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီု−KNU