ဘာပန်၊ ဂျာန္နဝါရဳ ၂၅
ဗ္တိုက်သီဂွံလဝ် ဗ္ဒိုပ်ကတိုၚ်တိမာန်ယျကီုလေဝ် ကောန်ဒပ်ကံၚ်ဇြဳပၞာန် ဂြိပ်တိတ်နူဗ္ဒိုပ်တံဂှ်ဝွံ ဆက်ဒုၚ်ဗ္တိုက်ဒၟံၚ် နူကဵုဌာန်ဂအုပ်တမ်ဒပ် ဒပ်မၚ်ပယျဵု BGF ဂှ်တုဲ ပေါဲဗ္တိုက်သ္ကာတ်မြဟ်ဒၟံၚ်ရောၚ် သ္ကိုပ်ဗိုလ်ဇၞော်သဝ်ကလာဒိုဝ် ညးမၞုံအခေါၚ်ဟီုဂး ဒပ်မဟာ ၅ KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဗ္ဒိုပ်ဒပ်ကံၚ်ဇြဳပၞာန် နွံပ္ဍဲကွာန်ကတိုၚ်တိ ခြာနူကဵုဍုၚ်ကမမံၚ် ၁၅ မိုၚ်ပြၚ် မၞုံလ္တူဂၠံၚ်ဇၞော် ဘာပန်−ကမမံၚ် တွဵုရးကရေၚ်ဂှ် ဒပ်ပံၚ်ကောံမဟာမိတ် သၟဝ်သ္ကိုပ်သ္ကဒပ်မဟာ ၅ ဒပ်ပၞာန်ဗၠးၜးကောန်ဂကူကရေၚ် KNLA တံ စထ္ပက်လဝ်ပၞာန် ဗ္တိုက်လဝ် ပ္ဍဲဂိတုဒဳဇြေမ်ဗာ ၂၉ တေံရ။
ဗ္ဒိုပ်ကတိုၚ်တိ ဒပ်ပံၚ်ကောံပၠန်ဂတး ဒပ်မဟာ ၅ KNLA တံ မထ္ပက်ပၞာန်ဗ္တိုက်လဝ်ဂှ် ပ္ဍဲဂိတုဂျာန္နဝါရဳ ၂၃ ဂှ် ၚးတးသီဂွံလဝ်ကီုလေဝ် ကောန်ဒပ်ကံၚ်ဇြဳပၞာန်တံဝွံ ကလေၚ်တဝ်စၞေဟ်ဒုၚ်ဗ္တိုက်ဒၟံၚ် နူကဵုဌာန်ဂအုပ်တမ်ဒပ် စၟတ် (၁၀၁၃) သၟဝ်သ္ကိုပ်သ္က သ္ကိုပ်ဗိုလ်သဝ်လှကျာၚ် သၟဝ်တဲဍုၚ်ဒပ် (၁) ဒပ်မၚ်ပယျဵုကရေၚ် BGF နူကဵုဗွဲဒိုဟ်ပလိုတ်ဗ္ဒိုပ်ကတိုၚ်တိဂှ်ရ။
ဇြဟတ်ကောန်ဒပ်ကံၚ်ဇြဳပၞာန် မကလေၚ်ဒုၚ်ဗ္တိုက်ဒၟံၚ် ဇရေၚ်ဌာန်ဂအုပ်တမ်ဒပ် ၁၀၁၃ BGF ဂှ်ဝွံ သှ်ေဒၟံၚ် ၁၀၀ ပြၚ်ဏီ ဒဒှ်ရချိၚ်ခယျဂွံဂှ် သ္ကိုပ်ဗိုလ်ဇၞော်သဝ်ကလာဒိုဝ် ဟီုရ။
နူကဵုဗ္ဒိုပ်ကတိုၚ်တိဂှ် ဒပ်ကံၚ်ဇြဳပၞာန် ဆုတ်ကလေၚ်ဂြိပ်တိတ်အာလဝ် ပ္ဍဲဌာန်ဂအုပ်တမ်ဒပ် ၁၀၁၃ BGFဂှ်တုဲ ကလေၚ်ဒုၚ်ဗ္တိုက်ဒၟံၚ်ကီုလေဝ် ဌာန်ဂအုပ်တမ်ဒပ် BGF ဏံဂှ်လေဝ် နကဵုဒပ်ပံၚ်ကောံပၠန်ဂတးတံ ကြက်ဗ္တိုက်သီဂွံအာဏောၚ် သာ်ဝွံ တမ်ရိုဟ်ပရိုၚ် BGF မွဲတၠ သ္ၚဳဂၠိပ်လဝ်ရ။
ကောန်ဒပ် BGF နူဌာန်ဂအုပ်တမ်ဒပ် ၁၀၁၃ ဒပ်မၚ်ပယျဵုကရေၚ် BGF တံဂှ်တှ်ေ နူစပေါဲဗ္တိုက်ကတိုၚ်တိက္တဵုဒှ်ဂှ် နူဌာန်ဂအုပ်တမ်ဒပ် ဒၞါဲညးတံမံၚ်ဂှ် ကောန်ဒပ်သီုဖအိုတ် ပြံၚ်ဆုဲအာလဝ် ဌာန်ဂအုပ်တမ်ဒပ် BGF ၁၀၁၄ ဗ္ဒါဲဍုၚ်ကမမံၚ်တုဲယျ မဒှ်ရ။
လ္ပာ်ဒပ်ကံၚ်ဇြဳပၞာန်ဂှ်တှ်ေ အပ္ဍဲပေါဲဗ္တိုက်ကတိုၚ်တိဂှ် ထောံကၠုၚ်မခတိုဟ်ဗ္တိုက်ကၠုၚ် နူကဵုပၞာန်ကျာ အရိုဟ်တ္ၚဲ ဟွံပိုတ်သ္ကုတ်တုဲ ရုၚ်ဂဥုဲကတိုၚ်တိမပါလုပ် သ္ၚိဒၟံၚ်အပ္ဍဲကွာန်ဗွဲမဂၠိုၚ်ဂၠေၚ် ဇီုကပိုက်လီုလာ်အာလဝ်ရောၚ် တမ်ရိုဟ်ပရိုၚ်ဒေသတံ ဟီုရ။
ဟိုတ်နူပေါဲဗ္တိုက်ကတိုၚ်တိတုဲ ညးဍုၚ်ကွာန်ဒေသ ဂၠိုၚ်ကဵုလ္ၚီ နူကဵုကွာန်ကတိုၚ်တိကီု သီုကဵုကွာန်ဗ္ဒါဲဗ္ဒါဲတံဂှ်ဝွံ ဒးဂြိပ်ဒဴပါဲဒလေတ်အာ လ္ပာ်ကွာန်အပ္ဍဲပွိုၚ်ဍုၚ်ကမမံၚ်၊ မျာၚ်ကျဳၚူ ကေုာံ ပ္ဍဲပွိုၚ်ဍုၚ်ၜဳကလေၚ်တံဂှ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media