လ္ဂုၚ်၊ ဂျာန္နဝါရဳ ၂၅
ပ္ဍဲကဵုလၟေၚ်ကမၠောန်ပရေၚ်ၜိုဟ်လလမ်ဍုၚ်ဗၟာ ကေုာံ ပရေၚ်ကောန်ဂကူဂွံကလေၚ်သာဓာအာညးသ္ကံတံှဂ် နကဵုဍုၚ်ကြုက် စပ်ကဵုမကဵုကၠုၚ်အရီုဗၚ်တံဂှ်တုဲ ဒဒှ်ရစွံတဴၚုဟ်မးဂှ် ဒုသ္ကိုပ်ဝန်ဇၞော်ကံၚ်ဇြဳပၞာန် သ္ကိုပ်ဗိုလ်ဇၞော် တေန်အံၚ်သာန် ဟီုရ။
ရုၚ်ကလုတ်ကြုက် မဆေၚ်စပ်ကဵုဍုၚ်ဗၟာ ဖျေံသ္ဇိုၚ်လ္ဂုၚ် ကၠောန်ဗဒှ်လဝ် အခန်ကၞာကၠောံသၞာံတၟိကြုက် ပ္ဍဲဂိတုဂျာန္နဝါရဳ ၂၃ ဂှ်တုဲ စၞးက္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ် တိုန်စိုပ်ဟီုလဝ်ဂလာန်ရ။
လ္တူပရေၚ်ဍုၚ်ကြုက် မကဵုကၠုၚ်ဇြဟတ်ထံက်ဂလာန် ဟွံပိုတ်သ္ကုတ် မၞုံကဵုသဘဴပတုဲဖဵုတံဂှ် အပ္ဍဲဒေသကီု သီုကဵုဗွိုၚ်ဍုၚ်သ္အာၚ်တံကီု ဒဒှ်ရစွံတဴၚုဟ်မး ဗွဲမလောန်တုဲ ဍုၚ်ကြုက် ဒဒှ်မကၠိုဟ်ကဵု၊ ဒဒှ်မကဵုကၠုၚ်အရီုဗၚ်သာ်ဝွံတံဂှ်လေဝ် စွံၚုဟ်မးရောၚ် သ္ဂးရ။
အပ္ဍဲပရေၚ်ပၞာန်သီအဝဵုဏံ စပ်ကဵုပရေၚ်ဍုၚ်ဗၟာတုဲ နကဵုကြုက် ရန်ကဵုဒတုဲမြမောဝ်ကိုန်စဳမာန်ညးတံတုဲ ကၠောန်ကၠုၚ်လဝ် ပရေၚ်ပ္ညဳပ္ညပ် အကြာကံၚ်ဇြဳပၞာန်ကဵု ဂကောံရပ်လွဟ်ကောန်ဍုၚ်အရၚ် မစုက်လုက်ကဵုညးတံဂှ်ရ။
အတိုၚ်တၚ်နၚ် ISP-Myanmar ဂှ်မ္ဂး ပ္ဍဲကဵုရးသေံသ္ကုတ်သၟဝ်ကျာကဵု ဍုၚ်ဗၟာသ္ကုတ်လဒေါဝ်ဂှ် ပ္ဍဲကဵုကိုန်စဳမာန်ပရေၚ်ဓလိုက်တမ်ရိုဟ်ကြုက် မစှ်ေကဵုဗျူဟာ နွံ ၂၃ ဂှ် ၁၃ ဂှ်တှ်ေ ဂကောံရပ်လွဟ်ကောန်ဍုၚ်အရၚ်တံကဵု PDF တံ ထိၚ်ဒက်ဂွံလဝ်ပေၚ်ၚ်ရ။
ဟိုတ်နူပရေၚ်ပၞာန် ၁၀၂၇ ဂကောံမဟာမိတ်ကောဒေံပိဂကောံ မက္တဵုဗဒှ်လဝ်ညံၚ်ဒပ်ကံၚ်ဇြဳပၞာန် ဂွံဒေါမ်ကၟာၚ်စှ်ဂှ်ေတုဲ သွက်ပရေၚ်ဒေသပယျဵုဂွံညိၚ်ဝတ် အကြာဂကောံၜါလ္ပာ် ဂွံဂွံတၚ်တုပ်စိုတ်ဟိုၚ်ဂေန်ဂှ် အလဵုအသဳကြုက် လုပ်စိုပ်ပ္ညဳပ္ညပ်လဝ်အကြာရ။
ဆ္ဂး တၚ်တုပ်စိုတ်ဏံဂှ်ဝွံ အပ္ဍဲရးသေံသ္ကုတ်သၟဝ်ကျာ ပယျဵုကြုက်ဂှ် လမျီုလုပ်အာ ၜိုတ် ၅ ဂိတုပြၚ်ဓဝ်ရတုဲ ပရေၚ်ပၞာန် ၁၀၂၇ သ္ကုတ်ဒုတိယ ကလေၚ်စတုဲ ကံၚ်ဇြဳပၞာန် ဒးဗလးလဝ်တဲ စဵုကဵုဌာန်ဂအုပ်ပၞာန်ရး ၜါရ။
ကြဴနူဂှ်တုဲ ဟိုတ်နူအလဳုအသဳကြုက် ကဵုကၠုၚ်ဇြဟတ်ဂရိုဟ်တုဲ ဂကောံရပ်လွဟ်ကောန်ဍုၚ်အရၚ် ပ္ဍဲပယျဵု နူသ္ကုတ်သၟဝ်ကျာ လ္ၚဵုတံဂှ်ဝွံ ဂွံသဳကၠဳပရေၚ်ၜိုဟ်လလမ် ကုကံၚ်ဇြဳပၞာန်ဂှ် ဒှ်ဒၟံၚ်ဒတုဲရောၚ်ဂးတုဲ လလောၚ်ပ္တိတ်ကၠုၚ်တၚ်လလောၚ်တြးဂမၠိုၚ်ရ။
ဟိုတ်ဂှ်ရ သ္ပဟိုတ်ကဵု ပရေၚ်အလဵုအသဳကြုက် လုပ်ပ္ညဳပ္ညပ်ကဵုအကြာဂှ်တုဲ ကံၚ်ဇြဳပၞာန် ကေုာံ ဒပ်ကဝ်က MNDAA တံ ထ္ပက်လဝ်စၟတ်တဲ လိက်ကသုက်ဒေါအ်ပန်ပှော်ဂှ် ဌာနကာဍုၚ်သ္အာၚ်ဍုၚ်ကြုက် ဟီုပ္တိတ်လဝ် ပ္ဍဲဂိတုဂျာန္နဝါရဳ ၂၀ တေံရ။
နကဵုအလဵုအသဳကြုက် ဂွံထ္မံက်အာရုပ်ရဴ ညံၚ်အကာဲအရာအပ္ဍဲဍုၚ် ကေုာံ ဍုၚ်ဗၟာသ္ကုတ်သၟဝ်ကျာ ဂွံကလေၚ်ညိၚ်ဝတ်အာ အသိၚ်ဂွံဍိုန်စှ်ေအာဂှ် စၟဳစလဝ်တုဲ ဂွံပါလုပ်အာ နူကဵုအခန်ကဏ္ဍ မပတုဲဖဵုမာန်တံဂှ် ဆန္ဒနွံရောၚ် နူသၞာံတုဲတေံရ ကဵုကၠုၚ်လဝ်သမ္တီရ။
ကံၚ်ဇြဳပၞာန်ဂှ်တှ်ေ အပ္ဍဲသၞာံ ၂၀၂၅ ဏံ ညးဍုၚ်ကွာန်အကြာၜါဍုၚ်ဏံ ဗွဲမအံၚ်ဇၞး တတ်ကၠောံအာတၚ်ကော်ဆဴနာနာမာန်တုဲ အကြာၜါဍုၚ် သၠဲပ္တိုန်အာပရေၚ်ပံၚ်တောဲ နဒဒှ်မိဿဟာဲခိုဟ် ဍုၚ်ဇိုၚ်ဝုတ်ဒိုဟ်ခိုဟ်တံမာန်ဏောၚ် ဒဒှ်ရပတှ်ေစှ်ေစိုတ်ပေၚ်ၚ်ဂှ် ဟီုရ။
ပရေၚ်ဆက်ဆောံကလုတ်တမာန်ၜါဍုၚ် ပ္ဍဲခေတ်တၟိဏံဂှ်တှ်ေ နူကဵုပရေၚ်လှာဲဂတး၊ ပရေၚ်ပံၚ်တောဲရေၚ်တၠုၚ်ကြပ်ပ်ဏံ ဒဵုကဵုကဆံၚ်ပရေၚ်ဆက်ဆောံအဖဝ်မိတ် မစှ်ေကဵုမဟာဗျူဟာဂှ် သၠုၚ်ပ္တိုန်အာ ပရေၚ်ဆက်ဆောံၜါဍုၚ်ဏံမာန်ရောၚ် ကံၚ်ဇြဳပၞာန် လလောၚ်ပ္တိတ်ကဵုလဝ်ပရိုၚ်ရ။
ပရိုၚ်−သြၚ်လောန်တိုၚ်(မ်)
ဗီု−MOI