ရေဝ်၊ ဂျာန္နဝါရဳ ၂၅
ဗ္ဒိုပ်ဒပ်ကံၚ်ဇြဳပၞာန်ၜါ ဖျေံသ္ဇိုၚ်ဍုၚ်ခေါဇာ ပွိုၚ်ဍုၚ်ရေဝ် တွဵုရးဍုၚ်မန်ဂှ် ဒးဒုၚ်ဗ္တိုက်လဝ်တုဲ ကောန်ဒပ်ကံၚ်ဇြဳပၞာန် ထပှ်တၠ ချိုတ်တုဲ ပိတၠ ဇီုကပိုက်ကလိဂွံလဝ်ဝပ်ရောၚ် ဒပ်ပၠန်ဂတးမန်တံ လလောၚ်ပ္တိတ်လဝ်ပရိုၚ်ရ။
ပ္ဍဲဂိတုဂျာန္နဝါရဳ ၂၃ အခိၚ်နူဂယး ၜိုတ် ၈ နာဍဳ ဒပ်ပၠန်ဂတးတံ လုပ်စိုပ်ဗ္တိုက်လဝ် သၞေဟ်ကၚ်စၟဳတ်ဒဒန်(မီးတိုင်) ကံၚ်ဇြဳပၞာန် မၞုံဗ္ဒါဲဍုၚ်ခေါဇာဂှ်ရ။
ဟိုတ်နူပရေၚ်ဗ္တိုက်ဂှ်တုဲ ပရေၚ်ပန်ပှော်က္တဵုဒှ်လဝ် ပွိုၚ် ၄၀ မိနေတ်တုဲ အခိၚ်ဒပ်ပၠန်ဂတးတံ ကလေၚ်ဆုတ်ဂှ် ညံၚ်တမ်ဒပ်ခလရ စၟတ် ၃၁ ဖျေံသ္ဇိုၚ်ခေါဇာ ကဵုကၠုၚ်အရီုပၞာန်ဟွံဂွံဂှ်လေဝ် ကၟာတ်လဒဵုဗ္တိုက်ဒၟံၚ်တံ ကၠောန်သ္ပလဝ်ရ။
ကောန်ဒပ်ကံၚ်ဇြဳပၞာန် ဇီုကပိုက်ချိုတ်အာ အပ္ဍဲပေါဲဗ္တိုက်တံဂှ် သ္ပဟိုတ်ကဵုတမ်ရိုဟ်ပရိုၚ်သၟဝ်တိတံကဵု ရဲကဵုပရိုၚ်နူအပ္ဍဲဒပ်တံဂှ်တုဲ သ္ပဒတန်မာန်လဝ်ရောၚ် နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အခိၚ်ဒှ်ပေါဲဗ္တိုက်ဂှ် မ္ၚးနူဒပ်ခလရ ၃၁ ဂှ် နူကဵုက္ၜၚ်ပၞာန် နွံဇိုၚ်ၜဳ(တရုတ်ထောင်) ဂှ် ဘိုၚ်ပန်ပှော်ကဵုလဝ်လွဟ်ဇၞော်တုဲ ဟိုတ်နူပေါဲဗ္တိုက်ၜါလ္ပာ်တုဲ ညးဒေသဍုၚ်ခေါဇာလ္ၚဵုတံ ဒးဂြိပ်ဒဴပါဲဒလေတ်အာလဝ် လ္ပာ်ဍုၚ်ရေဝ် နွံလဝ်ရ။
လအာတုပ်သာ်ဂှ်ကီု ပ္ဍဲဒေသကြုၚ်လံၚ်ဂှ်လေဝ် တုဲကၠုၚ်ပ္ဍဲဂိတုဂျာန္နဝါရဳ ၈ တေံ ဟိုတ်နူပေါဲဗ္တိုက်ၜါလ္ပာ် မစက္တဵုဒှ်လဝ်ဂှ်တုဲ ညးဒေသဂၠိုၚ်ကဵုလ္ၚီ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တုဲ ဒဵုကဵုအခိၚ်လၟုဟ် စဴဌာန်ဒၟံၚ်ဟွံမာန်ဏီရ။
ပရိုၚ်−သြၚ်လောန်တိုၚ်(မ်)
ဗီု−MSRF