မတ်မလီု၊ ဂျာန္နဝါရဳ ၂၆
ကံၚ်ဇြဳပၞာန်တွဵုရးဍုၚ်မန် ကေုာံ သ္ဇိုၚ်ဝန်နူဌာနမဆေၚ်စပ်ဂမၠိုၚ် ပံၚ်ကောံတုဲ ထံက်ပၚ်ကဵုလဝ်ဒါန် ကုကောန်ပၞာန်ကံၚ်ဇြဳပၞာန် စိုပ်မံၚ်မုက်ပၞာန်တံဂှ် ဂွံတီကေတ် အတိုၚ်လိက်ပရိုၚ်တြးဝါဒတံ မလလောၚ်ပ္တိတ်လဝ် ပ္ဍဲဂိတုဂျာန္နဝါရဳ ၂၅ တေံရ။
ဂကောံကံၚ်ဇြဳပၞာန်တွဵုရး သၟဝ်က္ဍိုက်ပ်သ္ကိုပ်ဝန်ဇၞော်တွဵုရးဍုၚ်မန် ဥူအံၚ်ကျဳတုၚ်ဂှ်ကဵု သ္ဇိုၚ်ဝန်နူဌာနအလဵုအသဳဂမၠိုၚ်ဝွံ သွက်ကောန်ပၞာန်ကံၚ်ဇြဳပၞာန် စိုပ်မံၚ်မုက်ပၞာန်တံဂှ် ကဵုလဝ်ဒါန်ဇွောံမစၞစ ၚုဟ်မးမၞုံ ၃၀၀ ကိုဋ်ဒ္ကေဝ်ပြၚ်ရ။
ဇွောံမစၞစကဵုလဝ်ဒါန်ဂမၠိုၚ်ဂှ် ဒုသ္ကိုပ်ဗိုလ်ဇၞော် နူဌာန်ဂအုပ်ပၞာန်ရးအဂၞဲ ဖျေံသ္ဇိုၚ်မတ်မလီု မၞုံယၟု ကိုဝ်ဝ်အံၚ်ဂှ် ဒုၚ်ကေတ်လဝ်တဲတုဲ ပလံၚ်ဗစိုပ်ကဵုအာ ဇရေၚ်ကောန်ပၞာန်စိုပ်မုက်ပၞာန်တံဏောၚ်ဂှ် သ္ဂးရ။
ပ္ဍဲကဵုဇွောံမစၞစ မကဵုလဝ်ဒါန်ဂမၠိုၚ် ခၞါကကှ်ကှ်၊ ခၞါဍာ်ကဝ်ခရံက်၊ ခၞါနာနာ၊ ကကဠာ၊ ကဝ်ဖဳမေတ်၊ တဳမေတ်၊ ဍာ်တှ်၊ ကသိုန်ဗ္ကေတ်၊ ကွာၚ်နာနာ ကေုာံ ဂဥုဲဇဗသွက်ကာတၟေၚ်တံလေဝ် ပါလုပ်ရ။
ဒပ်ကံၚ်ဇြဳပၞာန် ကျဒၟံၚ်ပၞာန် ဇၟာပ်ပေါဲဗ္တိုက်အလုံဍုၚ်မွဲဂှ်ဝွံ ပ္ဍဲကဵုလိက်ပရိုၚ်တြးဝါဒတံဂှ် ဒဒှ်ရဌာနအလဵုအသဳနာနာတံကဵု ညးဍုၚ်ကွာန်တံ ထံက်ပၚ်ကဵုဒၟံၚ်ဒါန် စၞစစၞသုၚ် ကုကောန်ပၞာန်စိုပ်မံၚ်ပၞာန်တံဂှ် ထ္မံက်ထ္ၜးဒၟံၚ် မွဲဏှမွဲဏှရ။
ပရိုၚ်−သြၚ်လောန်တိုၚ်(မ်)
ဗီု−MRTV