ဍာ်ဗု၊ ဂျာန္နဝါရဳ ၂၆
ဗ္ဒိုပ် PDF မွဲ နွံဗွဲဒိုဟ်အဂၞဲ ကွာန်မူဒူ ပွိုၚ်ဍုၚ်ဍာ်ဗု ရးတၞၚ်သဳဂှ် ဒးဒုၚ်ဍိုက်ဗ္တိုက်တုဲ ကောန်သ္ဂံၚ်ပိတၠ ကၠေံဒၟံၚ်ရောၚ် ဂွံတီကေတ် ဇရေၚ်ညးတာလျိုၚ် ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်ဍာ်ဗုတံရ။
ဗ္ဒိုပ် မဒးဒုၚ်ဍိုက်ဗ္တိုက်ဂှ်ဝွံ ဒှ်ဗ္ဒိုပ်ဒပ်စဵုဒၞါညးဍုၚ်ကွာန်ဖျေံသ္ဇိုၚ်ဒေသမွဲ ဗ္ဒိုပ် A Zero တုဲ ဒှ်အာလဝ် ပ္ဍဲဂိတုဂျာန္နဝါရဳ ၂၄ လဒေါဝ်တ္ၚဲ ၜိုတ် ၂ နာဍဳရ။
ကရောၚ်ပၞာန်ကံၚ်ဇြဳပၞာန် ဇြဟတ် ၆၀ ပြၚ်ဂှ်ဝွံ ပလီုပလာ်ဏာလဝ် အလုံဗ္ဒိုပ် A Zero မွဲဂှ်တုဲ သီဏာလဝ် သီုဇွောံမစၞစ သီုလွဟ်လက်နက်မကမ်လ္ၚဵုတံရ။
ဗ္ဒိုပ် A Zero ဏံဂှ် ဒးဒုၚ်ဍိုက်ဗ္တိုက်လဝ် အခိၚ်ကောန်ဒပ်ဗွဲမဂၠိုၚ် စိုပ်ဒၟံၚ်မုက်ပၞာန်ဂှ်ဏောၚ်ဂှ် ညးတာလျိုၚ် ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်ဍာ်ဗုမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကရောၚ်ပၞာန်ကံၚ်ဇြဳပၞာန် မဍိုက်ဗ္တိုက်အာဗ္ဒိုပ်ဂှ်ဝွံ ပ္ဍဲဂိတုဂျာန္နဝါရဳ ၂၅ ဂှ် လုပ်စိုပ်ဂၠိုက်ဂၠါဲလဝ် ဗ္ဒါဲကွာန်( ရလိုၚ်) ဂှ် ဂွံတီကေတ် ဇရေၚ်ဂကောံဇြဟတ်ပၠန်ဂတးရ။
ဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန်တုဲ ညးဒေသ ပွဳပွူ ၁၀၀၀ ပြၚ် နူကဵုကွာန်မူဒူ၊ ရလိုၚ်၊ ပဂဝ်ဇြောန်တံဝွံ ဒးပါဲဒလေတ်အောပ်မံၚ်ဒၟံၚ် ပ္ဍဲကွာန်ဗၠးဘဲတံကဵု ပ္ဍဲကၠအ်ဂူယာတံရ။
ပရိုၚ်−သြၚ်လောန်တိုၚ်(မ်)
ဗီု−Social Media