နေဗျဳဒဝ်၊ ဂျာန္နဝါရဳ ၂၆
ဂကောံဒပ်စဵုဒၞါညးဍုၚ်ကွာန် PDF တံ ညံၚ်ဂွံကလေၚ်လုပ်စိုပ်ဇရေၚ်ဂၠံသြိုဟ်ညးဍုၚ်ကွာန်တံကီု၊ သွက်ဂွံကော်ဂလိုၚ်ပ္တိုန် လၟိဟ်ညးယိုက်လျိုၚ်ပၞာန်တံဂှ် ညးစၞးဗော်ပရေၚ်ဍုၚ်ကွာန်တံ ကဵုလဝ်ကသပ်ရောၚ် ကံၚ်ဇြဳပၞာန် လလောၚ်ပ္တိတ်လဝ်ပရိုၚ်ရ။
ပ္ဍဲဂိတုဂျာန္နဝါရဳ ၂၃ ကဵု ၂၄ ဂှ် ကမ္မတဳပ္ညဳပ္ညပ်ထ္မံက်ရုပ်ရဴပရေၚ်ၜိုဟ်လလမ် ကေုာံ ပရေၚ်ညဳသၟဟ်ဂကူ ကံၚ်ဇြဳပၞာန် NSPNC ကဵု ဗော်ပရေၚ်ဍုၚ်ကွာန်ဗွဲမဂၠိုၚ် သဳကၠဳလဝ် ပရေၚ်သ္ဂောံပလေဝ်သၞောဝ်သ္ဇိုၚ်ဒက်ပ္တန်၊ သီုကဵုပရေၚ်မဆက်စပ်ကဵုပေါဲရုဲမာဲရ။
ပ္ဍဲကဵုပရေၚ်သဳကၠဳကဏ္ဍနာနာသာ် ပ္ဍဲဂိတုဂျာန္နဝါရဳ ၂၄ ဂှ် ညးစၞးဗော်ပရေၚ်ဍုၚ်ကွာန်ဂမၠိုၚ် ကဵုကသပ်သဳကၠဳလဝ် ကိစ္စစပ်ကဵုပေါဲရုဲမာဲ သၞာံ ၂၀၂၅ ကေုာံ အစဳဇန် မထေက်ကဵုကၠောန် ညံၚ်ကၟိန်ဍုၚ်ဂွံညိၚ်ဝတ်တံ မဒှ်ရ။
သ္အာၚ်နူဂှ်ပၠန် PDF မဒှ်ကၠုၚ် ဒၟါနူပရေၚ်ဝါဒပရေင်ဍုင်ကွာန်တံ ညံၚ်ဂွံလုပ်စိုပ်ကၠုၚ်လ္ပာ်ညးဍုၚ်ကွာန်တံ ဂၠိုၚ်တိုန်ကၠုၚ်ဂှ်ကီု၊ တုဲပၠန် လ္ဂောံကဵုသၞောဝ်ယိုက်လျိုၚ်ပၞာန်တုဲ သွက်ဂွံကော်ဂလိုၚ်ပ္တိုန်လၟိဟ်တံဂှ် ကဵုလဝ်ကသပ်ရဂှ် ကံၚ်ဇြဳပၞာန် လလောၚ်ပ္တိတ်လဝ်ရ။
စပ်ကဵုတၚ်လလောၚ်တြး ကံၚ်ဇြဳပၞာန်တုဲ လ္ပာ်ညးစၞးဗော်တံ ကဵုလဝ်ကသပ် နွံ၊ ဟွံမွဲဂှ် နကဵုသြၚ်လောန်တိုၚ်(မ်) ဆက်စၠောံလဝ် က္ဍိုပ်သ္ကိုပ်ဂကောံဗော်ပရေၚ်ဍုၚ်ကွာန် ဥက္ကဌဗော်ညးဍုၚ်ကွာန် ဥူကိုဝ်ကိုဝ်ကျဳ ဟွံအောန်နူကဵု ၜါဝါကီုလေဝ် ဒုၚ်တဲသှ်ကဵုလဝ်ဂှ် ဟွံမွဲရ။
နကဵုကံၚ်ဇြဳပၞာန် ပ္ဍဲကဵုပေါဲဗ္တိုက်ဆေၚ်မုက်တံဂှ် ဒးဆေၚ်ဒၟံၚ်မုက်ကဵုပရေၚ်ကျဗြံတံဂှ်တုဲ ညံၚ်ကောန်ဒပ်စဵုဒၞါညးဍုၚ်ကွာန် PDF တံ ဂွံလုပ်စိုပ်အပ္ဍဲဗွိုၚ်သၞောဝ်ဂှ် စန်ဒက်ဖျေံလာပ်ဗဇဴတံ ကၠောန်သ္ပဒၟံၚ်ရ။
ဆ္ဂး ပ္ဍဲဗလးတိဏံဂှ်တှ်ေ ကောန်ဒပ်ကံၚ်ဇြဳပၞာန်တံရဟေၚ် ဂၠိုၚ်ကဵုကၠံ ဖျေံကၠုၚ်လွဟ် ပစူကၠုၚ်အလာံဗု ဇရေၚ်ဂကောံရပ်လွဟ်ကောန်ဍုၚ်အရၚ်တံကဵု ဂကောံပၠန်ဂတးတံရ။
မွဲလ္ပာ်ဂှ်ပၠန် အတိုၚ်ၝောံပိုဒ် ၅၃ မပါလုပ် ပ္ဍဲနဲသၞောဝ်ဥပဒေ သ္ဂောံယိုက်လျိုၚ်ပၞာန် ကံၚ်ဇြဳပၞာန် မသ္ပဒတန်စၞောန်ပျးလဝ် ပ္ဍဲဂိတုဂျာန္နဝါရဳ ၂၃ ဂှ်မ္ဂး ယဝ်ဒှ်ကောန်ဗော်ပရေၚ်ဍုၚ်ကွာန်မ္ဂး အပ္ဍဲကာလဒးယိုက်လျိုၚ်ပၞာန်ဂှ် ဒးသမ္တီကေတ် ဒဒှ်ရနုက်တိတ်နူဗော်မဆေၚ်စပ်တံတုဲတုဲဂှ် ထ္မံက်ထ္ၜးလဝ်ရ။
အပ္ဍဲပရေၚ်သဳကၠဳ ဗော်ပ္ညဳပ္ညပ်ပရေၚ်ၜိုဟ်လလမ်ကံၚ်ဇြဳပၞာန် NSPNC ကဵု ဗော်ပရေၚ်ဍုၚ်ကွာန်ဗွဲမဂၠိုၚ်ဂှ် သွက်ဂွံပလေဝ်သၞောဝ်သ္ဇိုၚ်ဒက်ပ္တန်ဂှ် ကလိဂွံလဝ် တၚ်တုပ်စိုတ် ၄၃ တၚ်တုဲယျဂှ် လ္ပာ်ဗော်ဂမၠိုၚ် ဟီုပ္တိတ်ကၠုၚ်လဝ်ရ။
ပေါဲသဳကၠဳပွိုၚ်ၜါတ္ၚဲဂှ်တှ်ေ ဥက္ကဌ NSPNC ဒုသ္ကိုပ်ဗိုလ်ဇၞော် ထောန်န်နံၚ်ကဵု ကမ္မတဳပရေၚ်ပ္ညဳပ္ညပ်ဂမၠိုၚ်၊ က္ဍိုပ်သ္ကိုပ်ဂကောံဗော်ပရေၚ်ဍုၚ်ကွာန်ဂမၠိုၚ် ဥူကိုဝ်ဝ်ကျဳကဵု ညးစၞးကေၚ်ကာဂကောံဂမၠိုၚ် တိုန်စိုပ်လဝ်ရောၚ် ကံၚ်ဇြဳပၞာန် လလောၚ်ပ္တိတ်လဝ်ပရိုၚ်ရ။
ပရိုၚ်−သြၚ်လောန်တိုၚ်(မ်)
ဗီု−MOI