ၜဳကလေၚ်၊ ဂျာန္နဝါရဳ ၂၈
ပ္ဍဲတွဵုရးဍုၚ်မန် ပွိုၚ်ဍုၚ်ၜဳကလေၚ် ဗ္ဒါဲကွာန်မေဝ်ပလဳဂှ် ဟိုတ်နူအကာဲအရာပေါဲဗ္တိုက် မက္တဵုဒှ်ဒၟံၚ်ဂှ်ကဵု ဟိုတ်နူပရေၚ်ပၞာန်ကြံၚ်မ္ၚိုဟ်ဒၟံၚ်ဂှ်တုဲ ညးဒေသဒးပါဲဒလေတ်ဘဲပၞာန် ၃၀၀၀ ပြၚ် စဴဌာန်ဒၟံၚ်ဟွံမာန်ဏီပုဟ်ဂှ် ညးတာလျိုၚ်ခရိုၚ်သဓီု ဗော်သွးကောန်ဂကူကရေၚ် KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စဵုကဵုဂိတုဂျာန္နဝါရဳ ၂၇ ဏံ မွဲဒမြိပ်ပွဳပွူကွာန်မေဝ်ပလဳဂှ် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA ကဵု ဒပ်ကံၚ်ဇြဳပၞာန်တံ ဆေၚ်လဝ်မုက်ပၞာန်ဖိုဟ်တုဲ ပေါဲဗ္တိုက်တံလေဝ် က္တဵုဒှ်ဒၟံၚ် မွဲဏှမွဲဏှရောၚ် သ္ဂးရ။
ဟိုတ်နူအကာဲအရာပရေၚ်ပၞာန်ကြံၚ်မ္ၚိုဟ်ဒၟံၚ်ဂှ်တုဲ ညးဒေသဂမၠိုၚ်ဝွံ ဂွံစဴဌာန်ဒၟံၚ်ညးတံ ဒှ်ဟွံမာန်ဏီဂှ်ကီု၊ ဟိုတ်နူကံၚ်ဇြဳပၞာန် ပန်ကဵုလွဟ်ဇၞော်ကြာန်န်၊ ထောံမခတိုဟ် နကဵုက္ၜၚ်ကျာ၊ ဒရုၚ်တံဂှ်တုဲ ညးဍုၚ်ကွာန်ကောန်အရာပ်ဂမၠိုၚ်ဝွံ ဒဒှ်ရဒးမံၚ်ဒၟံၚ် နကဵုဓဝ်ဖေက်ဂှ် ညးအုပ်ကာခရိုၚ်သဓီု KNU ပဒိုဝ်သဝ်အေနာၚ် ဟီုရ။
ဒးပါဲဒလေတ်ဒၟံၚ်ဘဲပၞာန် တ္ၚဲလအ်ကၠုၚ်တုဲ ပ္ဍဲညးဍုၚ်ကွာန်တံဂှ် ကမၠောန်ကၟိတ်ဟွံပြေပြံၚ် ဒှ်တုဲ အခက်အခုဲပရေၚ်စသုၚ်မံၚ်စံၚ်တံလေဝ် နွံကၠုၚ်ဂှ်ရ နွံပၟိက်ဒၟံၚ်ကဵု အရီုဗၚ်ဂမၠိုၚ်ရ။
ညးဍုၚ်ကွာန်ပါဲဒဴဘဲပၞာန်တံဂှ် ဒပ်မဟာ ၁ KNU ၜိုတ်သ္ပမာန်ရီုဗၚ်ကဵုဒၟံၚ်ကီုလေဝ် ဟိုတ်နူလၟိဟ်မၞိဟ်ပါဲဒဴဘဲပၞာန် ဂၠိုၚ်တုဲ တၚ်နွံပၟိက်လေဝ် နွံဒၟံၚ်ရောၚ် သ္ဂးရ။
ပပ္တံနူဂိတုဂျာန္နဝါရဳမံက်တုဲ ကုန်ဗျူဟာနွံအပ္ဍဲဒပ် ခမရ ၄၀၅ ဖျေံသ္ဇိုၚ်မေဝ်ပလဳဂှ် လ္ပာ်ဒပ်ပံၚ်ကောံပၠန်ဂတးတံ ကၟာတ်လဒဵုဗ္တိုက်ဒၟံၚ် နွံတုဲ အပ္ဍဲကာလပေါဲဗ္တိုက်ဂှ် လ္ပာ်ကံၚ်ဇြဳပၞာန် ထောံလဝ်မခတိုဟ် နကဵုက္ၜၚ်ကျာဗ္တိုက် ၃ ဝါရ။
လ္ပာ်ကံၚ်ဇြဳပၞာန် ထောံမခတိုဟ်နကဵုပၞာန်ကျာကီု၊ ပန်ပှော်ဒၟံၚ်ကဵုလွဟ်ဇၞော်တံကီုဂှ်တုဲ ညးဒေသ ၃၀၀၀ ပြၚ် နူကဵုဂကောံကွာန်မေဝ်ပလဳ၊ အသူချံၚ်၊ ပဳတိ ကွာန်ၜိုတ် ၁၅ ကွာန်ဂှ်ဝွံ ဒးအောပ်မံၚ်ဒၟံၚ် ပ္ဍဲကွာန်ဗၠးဘဲတံကဵု ပ္ဍဲဒဵုဂြိုပ်တံရ။
အပ္ဍဲဂိတုဂျာန္နဝါရဳ ပရေၚ်ပၞာန်ကြံၚ်မ္ၚိုဟ်ဒၟံၚ်ဏံဂှ် ပ္ဍဲပွိုၚ်ဍုၚ်ၜဳကလေၚ်ဂှ် ဟိုတ်နူလွဟ်ဇၞော် ဒပ်ကံၚ်ဇြဳပၞာန် မပန်ပှော်လဝ်ဂှ်တုဲ ညးဍုၚ်ကွာန်ကောန်အရာပ် ၂ တၠ ချိုတ်တုဲ ဟွံအောန်နူကဵု ၄ တၠ ကလိဂွံလဝ်ဝပ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ