ကအ်သံၚ်၊ ဂျာန္နဝါရဳ ၂၈
ရးတၞၚ်သဳ ပွိုၚ်ဍုၚ်ကအ်သံၚ် အကြာကွာန်ဟာတ်သဒေန် ကဵု ကွာန်ချာန်ဖာန် အပ္ဍဲကဵုပရေၚ်ပန်ပှော် ဂိတုဂျာန္နဝါရဳ ၂၇ အခိၚ်နူဂယးဂှ် က္ဍိုပ်သ္ကိုပ်ပၞာန်ညးဍုၚ်ကွာန် ကွာန်ဟာတ်သဒေန် ဒးပြဟ်လလုဲအာလဝ်ဂှ် ဂကောံဒပ်စဵုဒၞါဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂိတုဂျာန္နဝါရဳ ၂၇ အခိၚ်နူဂယး ၜိုတ် ၁၁ နာဍဳ က္ဍိုပ်သ္ကိုပ်ပၞာန်ညးဍုၚ်ကွာန် ကၠုၚ်နူရာန်ဖျာ နူကွာန်ချာန်ဖာန် စဴကၠုၚ်ကွာန်ဟာတ်သဒေန် နကဵုကွဳလိုန်ဓာတ်၊ က္ဍိုပ်သ္ကိုပ်ပၞာန်ညးဍုၚ်ကွာန် မၞုံယၟု မျေတ်ဇြိုယ် (ကော်) ခံၚ်ဖျူ အာယုက်မၞုံ ၅၅ သၞာံဂှ် ပန်ပသောၚ်ထောံလဝ်ရောၚ် သ္ဂးရ။
အခိၚ်ညးစဴကၠုၚ်ကဵုကွဳလိုန်ဓာတ် အခါတတ်ကၠအ်သတ်ဗြဴကၠေၚ်ဂှ် ပန်ပသောၚ်ထောံလဝ်တုဲ ချိုတ်အာလဝ် ပ္ဍဲဒၞါဲဒှ်ပရူဂှ်တုဲ သီဂွံလဝ်လွဟ် ဟွံမွဲဂှ် ကောန်သ္ဂံၚ်ဒပ်စဵုဒၞါဒေသမွဲတၠ ဟီုရ။
မျေတ်ဇြိုယ် ကော် ခံၚ်ဖျူဂှ်ဝွံ ဒှ်က္ဍိုပ်သ္ကိုပ်ပၞာန်ညးဍုၚ်ကွာန် ကွာန်ဟာတ်သဒေန်တုဲ သီုဒှ်က္ဍိုပ်သ္ၚိကၠံကွာန်တုဲ ရပ်လွဟ် ဗက်သ္ပမာန်ဒၟံၚ်ညးဍုၚ်ကွာန် အကြာကွာန်တံ နွံဂှ်ရ ၜိုန်ကဵုလဝ်သတိကဵုလိက်ကီုလေဝ် ဟွံဒ္ဂေတ်ဗက်မွဲသာ် ဆက်ကၠောန်ဒၟံၚ်ဂှ်တုဲ မ္ဒးပသောၚ်ထောံလဝ်သာ်ဏံရောၚ် သ္ဂးရ။
ဟိုတ်နူဒးဒုၚ်ပန်ဂစိုတ်လဝ် နကဵုသေနာတ် ကြပ်ပ်ဂှ်တုဲ မျေတ်ဇြိုယ် ကော် ခံၚ်ဖျူဂှ်ဝွံ နကဵုဝပ်ဒးအာကြဴက္ဍိုပ်ဂှ် ချိုတ်အာလဝ် ပ္ဍဲဒၞါဲဒှ်ပရူဂှ် ဂွံတီကေတ်ရ။
ပရေၚ်ပန်ပှော်ဒှ်တုဲ အခိၚ်ကောန်ဒပ်ဂမၠိုၚ် ဆုတ်ကလေၚ်ကၠုၚ်ဂှ် ကောန်ဒပ်ကံၚ်ဇြဳပၞာန်တံ စိုပ်ကၠုၚ်တုဲ ကပှ်ကေတ်ဇွ ပလံၚ်ပ္တိုန်ဏာလဝ် ရုၚ်ဂဥုဲကအ်သံၚ်ရောၚ် သ္ဂးရ။
သၞာံတုဲကၠုၚ် ပ္ဍဲဂိတုနဝ်ဝေမ်ဗာ ၄ အခိၚ်ဗ္တံဂှ်လေဝ် ပ္ဍဲပွိုၚ်ဍုၚ်ကအ်သံၚ် ဍုၚ်ခမံက်ကျဳ အရာပ်စၟတ် ၄ ဂၠံၚ်မျခွါညဵု ညးဗြဴသ္ကိုပ်အုပ်ဓုပ် ဒဝ်ဝေန်ဌေ ဒးဒုၚ်ပန်ဂစိုတ်လဝ်ပ္ဍဲသ္ၚိတုဲ ဒဒှ်ရချိုတ်အာလဝ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media