မတ်မလီု၊ ဂျာန္နဝါရဳ ၂၈
ကြဴနူစၞောန်ပျးသၞောဝ်ယိုက်လျိုၚ်ပၞာန်တုဲ ပ္ဍဲတွဵုရးဍုၚ်မန် ဍုၚ်မတ်မလီုဂှ် ညးသၟတ်ဂမၠိုၚ် ဒးဒုၚ်ရပ်ဆက်ဒၟံၚ်တုဲ ဗွဲမဂၠိုၚ်ဝွံ ထပိုတ်လဝ်အဆက် ကုဂြောဝ်ဂတာဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန် ကျဒၟံၚ်ပၞာန်ဇၟာပ်ပေါဲဗ္တိုက် အလုံဍုၚ်မွဲဂှ်ဝွံ သွက်ဂွံဗပေၚ်ဇြဟတ်ဂှ်တုဲ ပ္ဍဲဂိတုဂျာန္နဝါရဳ ၂၃ ဂှ် စၞောန်ပျးလဝ် နဲသၞောဝ်ဥပဒေပရေၚ်ယိုက်လျိုၚ်ပၞာန် ဇၟာပ်သၟတ်လုပ်ပၞာန်ဂွံ တိတ်ဍုၚ်သ္အာၚ်ဟွံဂွံတုဲ မဒးလုပ်ပၞာန်ဂှ်ရ။
ကြဴနူစၞောန်ပျးနဲသၞောဝ်ဥပဒေ ပရေၚ်ယိုက်လျိုၚ်ပၞာန်ဏံတုဲဂှ် လ္တူဍုၚ်မတ်မလီု ဂကောံပံၚ်ကောံကံၚ်ဇြဳပၞာန်တံ ကၟာတ်လဒဵုစၟဳတ် ရပ်ဒက်ဒၟံၚ် သၟတ်အပ္ဍဲဒေသတံ နကဵုဟိုတ်ပရေၚ်ဂီုကၠီုဂှ် ဂၠိုၚ်တိုန်ကၠုၚ်ရ။
ညးဒေသမတ်မလီုမွဲတၠဂှ်တှ်ေ ပရေၚ်ရပ်ဒက်ကံၚ်ဇြဳပၞာန်ဂှ်ဝွံ ကြဴနူလလောၚ်ပ္တိတ်နဲသၞောဝ်ဥပဒေတုဲဂှ် သာတုဲဂံၚ်ကၠောန်ကၠုၚ်တုဲ အခိၚ်တ္ၚဲလေဝ် ကၟာတ်လဒဵုရပ်ဒက်ဒၟံၚ်တံ နွံဒၟံၚ်ရောၚ် ဟီုရ။
“လၟုဟ်ဂှ် ရပ်ဒၟံၚ် သီုတ္ၚဲသီုဗ္တံ။ အခိၚ်ဗ္တံတှ်ေ သာပရေံရ။ လၟုဟ်ဂှ် ၝတံဏံ ပရေံကၠုၚ်ကွေံကွေံ။ အခိၚ်ဗ္တံတှ်ေ မွဲသာ်ၜါရာဟွံမွဲတှ်ေ သၟတ်တံ ဟွံတိတ်ရပုဟ်။ ပ္တိတ်လဝ်နဲသၞောဝ်ဥပဒေဏံတုဲ သာတုဲ ဂံၚ်ကၠောန်ဂံၚ်ပကၠုၚ်ရ” သာ်ဝွံ သ္ဂးရ။
အတိုၚ်ဂလာန်ညးဒေသတံဂှ်မ္ဂး ပ္ဍဲကဵုညးသၟတ် ဒးဒုၚ်ရပ်လဝ်တံဂှ် သၟတ်အာယုက်ပေၚ်တုဲတံကီု ကောန်ၚာ်သၟတ်အာယုက်ဟွံပေၚ်ဏီတံကီုဂှ် ရပ်ဒက်ဒၟံၚ် နကဵုနဲကဲနာနာ ကၠောန်သ္ပဒၟံၚ်တုဲ အပ္ဍဲဒေသ ပရေၚ်ဒှ်ဓဝိၚ်တံ သၠုၚ်တိုန်ဒၟံၚ်ရ။
နူကဵုညးမစုက်လုက်ကဵုကံၚ်ဇြဳပၞာန်တံဂှ်မွဲကဆံၚ် ကဵုသြန်ကဵုစှော်ကိုဋ်တုဲ ဒးကလေၚ်နုက်ပ္တိတ်ဒၟံၚ် သၟတ်ဒးဒုၚ်ရပ်တံ နွံတုဲ လ္ၚဵုတံဂှ်တှ်ေ ပလံၚ်ဏာ ပ္ဍဲဒၞါဲပကောံကောန်ပၞာန်တံ နွံဒၟံၚ်ဂှ် ညးဒေသတံ ဟီုလဝ်ရ။
အပ္ဍဲဒေသဂှ်တှ်ေ ဗွဲကြဴဏံ သၟတ်ဗွဲမဂၠိုၚ် ဒးဒုၚ်ရပ်ဒၟံၚ်သၟးဟွံက သၟတ်အာယုက်ဟွံပေၚ်လ္ၚဵုတံလေဝ် ကၠေံဒၟံၚ်နွံရ။
ညးမစုက်လုက်ကဵု ဂြောဝ်ဂတာသၟတ် မကၠေံဒၟံၚ်မွဲတၠဂှ်တှ်ေ သၟတ်အာယုက်ဟွံပေၚ်ဏီတံ ကၠေံကၠုၚ်ဒၟံၚ် နွံကၠုၚ်တုဲ ၜိုတ်ကလေၚ်ဂၠါဲကီုလေဝ် ဟွံဆဵုပုဟ်ဂှ် ဟီုရ။
“ကောန်ၚာ်ဂှ် အာယုက် ၁၆ ၊ တိတ်အာ နူဂယး ၜိုတ် ၆/၇ နာဍဳ။ ခယျကေတ်ဂှ်တှ်ေ တိတ်မ္ၚးမွဲလစုတ်တုဲ စဴသ္ၚိလဇုဲ။ မၚ်ဂှ်မၚ်ဒၟံၚ်ရ။ ဟွံကလေၚ်စိုပ်ကၠုၚ်ဟဂှ်။ ဟွံကလေၚ်စိုပ်တုဲ ဗက်ဂၠါဲ။ ပ္ဍဲကဵုသၞေဟ်ကွဳစက်တံဂှ်လေဝ် ဟွံဆဵုပုဟ်” သာ်ဝွံ သ္ဂးရ။
စပ်ကဵုညးသၟတ်ဂမၠိုၚ် ကၠေံဒၟံၚ်သာ်ဏံတုဲ အာတေၚ် ဇရေၚ်ကောန်ဒပ်သၟဝ်တဲကံၚ်ဇြဳပၞာန်တံဂှ်မ္ဂးလေဝ် ၜိုတ်ဆချူသမ္တီလဝ်သၟးတုဲ ဂွံဘိုၚ်ဂၠါဲကဵု ဟွံမွဲပုဟ်ဂှ် ညးဆက်ဟီုရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ သွက်တန်ဗ္တောန်ကွတ်ပၞာန်ဂှ် ဗီုကၠာတေံ လိၚ်စုတ်စၞးဟွံဂွံရတုဲ နကဵုနဲကဲနာနာသာ် ရပ်ဒက်ကၠုၚ် သၟတ်အပ္ဍဲဒေသတံတုဲ ပလံၚ်ဗစိုပ်ဒၟံၚ်တန်ဗ္တောန်ကွတ်ပၞာန်တံ နွံကၠုၚ်ရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) ပ္ကောံပ္ကေဝ်ဂွံလဝ်ဂှ်မ္ဂး ပ္ဍဲတွဵုရးဍုၚ်မန် တန်ဗ္တောန်ကွတ်ပၞာန် နူလၟေၚ် ၁ စဵုစိုပ်လၟေၚ် ၉ ဂှ် သၟတ် ၁၈၀၀ ပြၚ် ဒးဒုၚ်ပကောံပဒၟံၚ်ကောန်ပၞာန်ရ။
ပရိုၚ်−သြၚ်လောန်တိုၚ်(မ်)
ဗီု−CJ