လံၚ်လုၚ်၊ ဂျာန္နဝါရဳ ၂၉
ဒပ်ကံၚ်ဇြဳပၞာန် ဟိုတ်နူထ္ပက်ကရောၚ်ပၞာန်လုပ်စိုပ်ကၠုၚ် ပ္ဍဲပွိုၚ်ဍုၚ်လံၚ်လုၚ် ရးတၞၚ်သဳဂှ်တုဲ ညးဒေသနူကဵုကွာန်ပန်ကွာန် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် ဇရေၚ်ညးဒေသတံကဵု ဂကောံဇြဟတ်ပၠန်ဂတးတံရ။
စနူဂိတုဂျာန္နဝါရဳ ၂၁ တုဲကၠုၚ်တေံတုဲ ဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန် ပ္ဍဲပွဳဗွိုၚ်ဒေသ သၞေဟ်ဍာ်ဒမျိုဟ် ပွိုၚ်ဍုၚ်ဍာ်ဗုဂှ်ဝွံ နူဏံမွဲကဆံၚ် စနူဂိတုဂျာန္နဝါရဳ ၂၄ ဂှ်တုဲ လုပ်စိုပ်ထ္ပက်ကၠုၚ်ကရောၚ်ပၞာန် ပ္ဍဲပွိုၚ်ဍုၚ်လံၚ်လုၚ်ရ။
ကရောၚ်ပၞာန်ကံၚ်ဇြဳပၞာန် ဇြဟတ်ဗ္ဒါဲ ၂၀၀ ပြၚ်ပါဂှ်ဝွံ ကြဴနူထ္ပက်ကၠုၚ်ကရောၚ်ပၞာန် ပ္ဍဲဒေသနဗုလာ ပွဳဗွိုၚ်သၞေဟ်ဍာ်ဒမျိုဟ်ဂှ်တုဲဂှ် လုပ်စိုပ်ကၠုၚ်လဝ် ကွာန်မၞုံအပ္ဍဲပွိုၚ်ဍုၚ်လံၚ်လုၚ်တံ အတိုၚ်ဂၠံၚ်ဂြိုပ်ရ။
ဟိုတ်နူထ္ပက်ကၠုၚ်ကရောၚ်ပၞာန် ပ္ဍဲပွိုၚ်ဍုၚ်လံၚ်လုၚ်ဂှ်တုဲ ညးဒေသ နူကဵုကွာန် (စခန်းကြီး၊ မြို့ဟောင်း၊ ဘူချိုင်၊ မယ်အိုအနောက်) တံဝွံ ဖေက်လကိုတ်ဒၟံၚ်အိုတ်တုဲ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲ ပ္ဍဲဒဵုဂြိုပ်တံဂှ် သ္ဂးရ။
ကရောၚ်ပၞာန်ဏံဝွံ ပ္ဍဲဂိတုဂျာန္နဝါရဳ ၂၄ ဂှ် လုပ်စိုပ်ဍိုက်ဗ္တိုက်လဝ် ဗ္ဒိုပ်ဒပ်စဵုဒၞါညးဍုၚ်ကွာန် ဖျေံသ္ဇိုၚ်ဒေသ ကွာန်မူဒူသ္ကုတ်ဗၟံက်ဂှ်တုဲ ကောန်သ္ဂံၚ် PDF ပိတၠ ပြဟ်လလုဲအာလဝ်ရ။
ကရောၚ်ပၞာန်ကံၚ်ဇြဳပၞာန်ဝွံ နူကွာန်မူဒူဂှ် စံၚ်ပလီုလဝ် သ္ၚိဒၟံၚ်မွဲမတုဲ သ္ၚိဒၟံၚ်ဗွဲမဂၠိုၚ်ဂၠေၚ် ဒးဒုၚ်ပလီုလဝ်တုဲ သီုကဵုရပ်ဒက်ဏာလဝ် ကောန်ၚာ်သၟတ် အာယုက် ၁၂ သၞာံမွဲတၠ ကရောံကရောၚ်ပၞာန်ဂှ် ညးဒေသတံ ဟီုရ။
အပ္ဍဲဂိတုဒဳဇြေမ်ဗာတုဲကၠုၚ်တေံ ပ္ဍဲခရိုၚ်ထဝါဲ ရးတၞၚ်သဳဂှ် ဒပ်ကံၚ်ဇြဳပၞာန် ပန်ပှော်ကဵုလွဟ်ဇၞော် ကေုာံ ထ္ပက်ကဵုကရောၚ်ပၞာန် လုပ်စိုပ်ကၠုၚ်တုဲ ညးဍုၚ်ကွာန်ဒေသ ၂၅၉၀၀ တၠပြၚ် ထောံလသာဌာန်ဒၟံၚ် ဒးဂြိပ်ဒဴပါဲဒလေတ်လဝ်ရောၚ် ဂွံတီကေတ် အတိုၚ်လိက်ဒုၚ်စဳရေၚ် ဂကောံသုတေသန FE5 Thanintharyi ရ။
ပရိုၚ်−သြၚ်လောန်တိုၚ်(မ်)
ဗီု−Social Media