ဒံၚ်ကုက်၊ ဂျာန္နဝါရဳ ၂၉
ပ္ဍဲကဵုရးဗဂေါ၊ ရးမဂွဵု ကေုာံ ရးဨရာဝတဳ မဆက်စပ်ဒၟံၚ်ကဵုတွဵုရးရခေၚ်ဂှ် ဒှ်မံၚ်ပေါဲဗ္တိုက်ၜါလ္ပာ် ကုဒပ်ကံၚ်ဇြဳပၞာန်တုဲ သီဂွံလဝ်ဗ္ဒိုပ်ဒပ်ပၞာန်ပိဂှ် ပ္ဍဲဂိတုဂျာန္နဝါရဳ ၂၇ တေံ ဒပ်ပၞာန်ရခေၚ် AA လလောၚ်ပ္တိတ်လဝ်ပရိုၚ်ရ။
ဗ္ဒိုပ်(မိုးထိတောင်) ကံၚ်ဇြဳပၞာန် နွံပွိုၚ်ဍုၚ်(တောၚ်ကုတ်) ပယျဵုတွဵုရးရခေၚ်ကဵု ရးဗဂေါဂှ် ထ္ပက်ပၞာန် ပွိုၚ်မသုန်တ္ၚဲတုဲ ပ္ဍဲဂိတုဂျာန္နဝါရဳ ၂၆ လဒေါဝ်တ္ၚဲ ၜိုတ် ၁၁ နာဍဳဂှ် သီဂွံလဝ် အလုံဗ္ဒိုပ်မွဲရ။
လအာတုပ်သာ်ဂှ်ကီု ဗ္ဒိုပ်ဒပ်ကံၚ်ဇြဳပၞာန် ပွိုက် ၂၆၃ နွံအပ္ဍဲရးဨရာဝတဳ ပယျဵုရခေၚ်−ဨရာဝတဳဂှ် ပ္ဍဲဂိတုဂျာန္နဝါရဳ ၂၆ လဒေါဝ်တ္ၚဲဂှ် သီဂွံလဝ်တုဲ၊ ဗ္ဒိုပ်ဒပ် ပွိုက် ၃၆၉ ဂှ် တုဲကၠုၚ်ဂိတုဂျာန္နဝါရဳ ၂၁ အခိၚ်ဇိုၚ်သဝ်တ္ၚဲဂှ် သီဂွံလဝ်ရောၚ် AA သ္ဂးရ။
အပ္ဍဲပေါဲဗ္တိုက်သီဗ္ဒိုပ်ဂှ် သီဂွံလဝ်လွဟ်လက်နက်မကမ် ကေုာံ ကပေါတ်အရပ်စပ်ပၞာန် နူကံၚ်ဇြဳပၞာန် ဗွဲမဂၠိုၚ်ဂၠေၚ်တုဲ လၟိဟ်ကောန်ဒပ်ကံၚ်ဇြဳပၞာန်တံ မဒးချိုတ်အာတံဂှ် AA လလောၚ်ပ္တိတ်ကဵုလဝ်သမ္တီဂှ် ဟွံမွဲရ။
မွဲလ္ပာ်ဂှ်ပၠန် ဗ္ဒါဲကွာန်(ဂုတ်စီးရိုး) ဍုၚ်(ငဖဲ) ရးမဂွဵု ပယျဵုတွဵုရးရခေၚ် လ္တူဂၠံၚ်ကွဳစက် အာမ်−ပဒါန်ဂှ် ပ္ဍဲဂိတုဂျာန္နဝါရဳ ၂၇ တေံ ဒပ်သၟဝ်တဲကံၚ်ဇြဳပၞာန် ခမရ ၄၁၉၊ ခမရ ၁၄ ဒပ်ပံၚ်ကောံတံကဵု ဒပ်ရခေၚ်တံ က္တဵုဒှ်လဝ်ပေါဲဗ္တိုက်ရောၚ် ကဵုလဝ်သမ္တီရ။
ပ္ဍဲပွဳပွူဗ္ဒါဲဍုၚ်သေတ်တိုဲ AA သ္ဂောံသီသှ်ေဒၟံၚ်ဂှ်လေဝ် ၜါလ္ပာ်က္တဵုဒှ်ပရေၚ်ပန်ပှော် သီုကဵုလွဟ်ဇၞော်၊ သနာ်ပါ၊ သီုကဵုဒရုၚ်တံဂှ် က္တဵုဒှ်ဒၟံၚ်ကြပ်အရိုဟ်ဒဒှ်တ္ၚဲရောၚ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−MOI