မတ်မလီု၊ ဂျာန္နဝါ၇ဳ ၂၉
နကဵုတၚ်ထ္ၜးဟိုတ်မမာဲဗၠေတ်မှာတုဲ ကံၚ်ဇြဳပၞာန်သီလဝ်အဝဵုဂှ် သွက်ပေါဲရုဲမာဲ သၞာံ ၂၀၂၅ ညးတံ မကၠောန်ဗဒှ်အာဂှ် လ္ပာ်ကံၚ်ဇြဳပၞာန်တွဵုရးဍုၚ်မန် ပလေတ်ပလေတ်ကၠုၚ်ဒၟံၚ် သွက်ဂွံစပကောံစရၚ်မာဲတံရ။
အတိုၚ်လိက်ပရိုၚ်တြးဝါဒတံ ထ္မံက်ထ္ၜးလဝ်ဂှ်မ္ဂး ကံၚ်ဇြဳပၞာန်တွဵုရးဍုၚ်မန်ကဵု ကောန်ဂကောံကဝ်မယှေန်ပေါဲရုဲမာဲ ကဆံၚ်ကၟိန်ဍုၚ် ကံၚ်ဇြဳပၞာန်တံဂှ်ဝွံ ပ္ဍဲဂိတုဂျာန္နဝါရဳ ၂၇ ဂှ် ဆဵုဂဗသဳကၠဳလဝ် ပ္ဍဲရုၚ်အလဵုအသဳတွဵုရး ဍုၚ်မတ်မလီုရ။
ပ္ဍဲပေါဲဆဵုဂဗဏံဂှ် ညံၚ်စရၚ်မာဲ ပေါဲရုဲမာဲ ဂွံဍိုက်ပေၚ်ဍာံပြဂှ် စရၚ်လၟိဟ်မၞိဟ် နူကမ္မတဳကံက်ကပှ်စရၚ် ကဆံၚ်တွဵုရး၊ ခရိုၚ် ကေုာံ ကဆံၚ်ပွိုၚ်ဍုၚ်တံ မပလံၚ်ဗစိုပ်နၚ်ဂှ်ကဵု စရၚ်လၟိဟ်မၞိဟ် လဝကတံဂှ် သွက်ဂွံဗကိတ်စၟဳတ်ဂှ်ကီု၊ စပ်ကဵုလၟေၚ်ကမၠောန်စပ်ကဵုပေါဲရုဲမာဲတံဂှ်လေဝ် သဳကၠဳလဝ်ဂှ် ထ္မံက်ထ္ၜးလဝ်ရ။
ဆ္ဂး လၟေၚ်ကမၠောန်ဗွဲလစှ်ေ စပ်ကဵုဂွံပကောံစရၚ်မာဲတံဂှ်ကဵု အခိၚ်ကာလတံဂှ်တှ်ေ လ္ပာ်ကံၚ်ဇြဳပၞာန် လလောၚ်ပ္တိတ်လဝ်ပရိုၚ်မွဲမွဲဂှ် ဟွံဂွံဆဵုကေတ်ရ။
ဥက္ကဌ သမဂ္ဂကွးဘာ တက္ကသိုလ်မတ်မလီု မာံတဇြေန်ဥူဂှ်တှ်ေ ကံၚ်ဇြဳပၞာန် ပ္တိတ်ကၠုၚ်ဇြဟတ် ဂွံလုပ်သၞောဝ် နူကဵုပေါဲရုဲမာဲဏံဂှ်တုဲ အလုံညးဍုၚ်ကွာန်မွဲ နွံပၟိက်ဒးထ္ၜးပျး ဒဒှ်ရဟွံဒုၚ်တဲဂှ်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဂ္စါန်ကၠောန်ဒၟံၚ်ပေါဲရုဲမာဲဏံဟီုဂှ် အဓိပ္ပာယ်ဍေံဂှ်တှ်ေ ဒဒှ်မဗဗွဲဓဝ်၊ ဟွံဗဗွဲဓဝ်ဂှ် ကၠောန်ကေတ်အတေၚ်မှဂွံဏောၚ်။ ကၠောန်ကေတ်အတေၚ်မှ ဒှ်ဏောၚ်ဂးတုဲ ဖန်လဝ်ရ။ ပိုယ်တံ ဟွံဒုၚ်တဲပုဟ် ၜိုတ်လဵုဟီုဟီု ဍေံတံဂှ်တှ်ေ ဆက်ကၠောန်အာဒၟံၚ်ဟဂှ်ရဏောၚ်။ အရာဍေံတံကၠောန်ဒၟံၚ်ဂှ် ပိုယ်တံဟွံဒုၚ်တဲမ္ဂး ဗီုဟွံဒုၚ်တဲဂှ် ဒးထ္ၜးဏောၚ်။ ညအ်ဂှ် ညးဍုၚ်ကွာန်ဂမၠိုၚ် ဒးပူဗိုၚ်ပါလုပ်ကဵုဏောၚ်” သာ်ဝွံ သ္ဂးရ။
က္ဍိုပ်သ္ကိုပ်ပၞာန် ကျဒၟံၚ်ပၞာန် ဇၟာပ်ပေါဲဗ္တိုက် အလုံဍုၚ်မွဲဂှ်ဝွံ အပ္ဍဲသၞာံ ၂၀၂၅ ဏံ ကၠောန်ဗဒှ်အာပေါဲရုဲမာဲဏောၚ်ဂှ် ပ္ဍဲဂိတုဂျာန္နဝါရဳ ၁၅ တေံ လလောၚ်ပ္တိတ်ဟီုကၠုၚ်လဝ် ဗွဲမလုပ်သၞောဝ်ရ။
ပ္ဍဲကဵုပွိုၚ်ဍုၚ် ကံၚ်ဇြဳပၞာန်ထိၚ်ဒက်ဂွံလဝ် ပ္ဍဲကဵု ၁၆၁ ပွိုၚ်ဍုၚ်ဂှ် သွက်ဂွံကၠောန်အာပေါဲရုဲမာဲ သ္ကုတ်ညးကဵုညးဂှ် ကမ္မယှေန်ပေါဲရုဲမာဲကၟိန်ဍုၚ် ကံၚ်ဇြဳပၞာန် ပလေဝ်ပလေတ်လဝ်ရ။
ဒံက်တာသဳရိမန်ဆာန် ညးမၞုံအခေါၚ်ဟီုဂး ဒပ်စဵုဒၞါဍုၚ်မန် MSDF ဂှ် ပေါဲရုဲမာဲကံၚ်ဇြဳပၞာန် ကၠောန်ဗဒှ်အာဂှ်ဝွံ ဒှ်ဖဵုသွက်ညးဍုၚ်ကွာန်ဟွံသေၚ် ဒှ်သွက်တၠအဝဵုပၞာန် အာယုက်ဂွံဂၠိၚ်ဟေၚ်ဂှ်ရ သွက်ဂွံဒစဵုဒစးညးသ္ကအ်အိုတ်ဂှ် ဖ္တိုက်ဖ္အောဝ်လဝ်ရ။
“ပေါဲရုဲမာဲ ကံၚ်ဇြဳပၞာန် ကၠောန်ဗဒှ်ဂှ်တှ်ေ သွက်အလုံဍုၚ်မွဲကီု သွက်ညးဍုၚ်ကွာန်ကောန်ဍုၚ်အရၚ်တံကီုဂှ် ဒှ်ဖဵုဟွံသေၚ်ပုဟ်ဟီုဂှ် ညးဍုၚ်ကွာန်ဂမၠိုၚ် တီကေတ်လဝ်ခိုဟ်ဟ်အိုတ်ရ။ ပေါဲရုဲမာဲအလီဏံဂှ်တှ်ေ ညံၚ်သၞောတ်တၠအဝဵုပၞာန် အာယုက်ဂွံဂၠိၚ်သၟးရတုဲ ညးဍုၚ်ကွာန်ဂမၠိုၚ် ညံၚ်ဂွံဒစဵုဒစးဗ္တိုက်သရိုဟ်အာ ပေါဲရုဲမာဲဏံအိုတ်ဂှ် မိက်ဂွံဖ္တိုက်ဖ္အောဝ်ရ” သာ်ဝွံ သ္ဂးရ။
ဇြဟတ်ရာမညဖေဝ်ဒရာခေတ်တၟိ NRFF ဂှ်တှ်ေ ပ္ဍဲတွဵုရးဍုၚ်မန် ပေါဲဗ္တိုက်သီဍုၚ် ဟွံဂွံဒှ်ကၠုၚ်ဏီဂှ် ယဝ်ဆက်ဒှ်ဒၟံၚ် အတိုၚ်အကာဲအရာလၟုဟ်မ္ဂး ကံၚ်ဇြဳပၞာန် ကၠောန်ဗဒှ်ကၠုၚ်ပေါဲရုဲမာဲ လှဲလှဲလးလးမာန်ရောၚ် သၞာံတၟိမံက်ဏံ လလောၚ်ပ္တိတ်လဝ် လိက်ဒုၚ်စဳရေၚ်ရ။
ပေါဲရုဲမာဲဂှ်တှ်ေ ပ္ဍဲပွိုၚ်ဍုၚ်မတ်မလီု၊ ပွိုၚ်ဍုၚ်ၜါသွာၚ် ကေုာံ ပွိုၚ်ဍုၚ်ပံၚ်တံဂှ် ကၠောန်ဗဒှ်အာ တၟံကၠံပေၚ်ၚ်မာန်တုဲ ပ္ဍဲတွဵုရးသှ်ေတံဂှ် နကဵုအရီုဗၚ်ဒပ်ဂီုကၠီုတံကဵုဒှ် နကဵုသၞောတ်ကဵုမာဲအဳလက်ထရဝ်နေတ်တံကဵုဒှ် ဒဵုဗ္ၜတ်မွဲမွဲ ကၠောန်ဗဒှ်မာန်ဏောၚ်ဂှ် NRFF သ္ၚဳဂၠိပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−MOI