ညံၚ်လေဝ်ပေန်၊ ဂျာန္နဝါရဳ ၃၀
ပ္ဍဲတိဍာ်ထိၚ်ဒဝ် ခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU ဂှ် အကြာတ္ၚဲတံဏံ ဟိုတ်နူဒပ်ကံၚ်ဇြဳပၞာန် ဗ္တိုက်ကၠုၚ်ကဵုလွဟ်ဇၞော် ကေုာံ ပၞာန်ကျာတံဂှ်တုဲ ကောန်အရာပ်မွဲတၠ ချိုတ်တုဲ ဒ္စါံတၠ ကလိဂွံလဝ်ဝပ်ရောၚ် KNU ဗဟဵု လလောၚ်ပ္တိတ်လဝ် ပ္ဍဲဂိတုဂျာန္နဝါရဳ ၂၉ တေံရ။
ဒပ်ကံၚ်ဇြဳပၞာန် ဖျေံသ္ဇိုၚ်ပွိုၚ်ဍုၚ်ယှိုဲကျေန် KNU ဂှ်ဝွံ တုဲကၠုၚ်ဂိတုဂျာန္နဝါရဳ ၂၄ တေံ ဟိုတ်နူပန်ပှော်လဝ်လွဟ်ဇၞော် ပ္ဍဲကွာန်ဝိုၚ်ကျောန်ဂှ်တုဲ ညးမဒှ်ကောန်ကွာန် မဝေန်ပပတုၚ် အာယုက် ၁၆ သၞာံကဵု မာၚ်အံၚ်မျေတ်မျာတ်တံ ၜါတၠ ဇီုကပိုက်ကလိဂွံလဝ်ဝပ်ရ။
လအာတုပ်သာ်ဂှ်ကီု ပ္ဍဲဂိတုဂျာန္နဝါရဳ ၂၇ ဂှ်လေဝ် ပ္ဍဲပွိုၚ်ဍုၚ်ယျိုဲကျေန် KNU ကွာန်ညံၚ်ပေန်ကျဳဂှ် ဟိုတ်နူပရေၚ်ဗ္တိုက်ပၞာန်ကျာ ကံၚ်ဇြဳပၞာန်တံတုဲ မာၚ်ထက်လေန်နာၚ်မွဲတၠမပါလုပ်ဂှ် ကောန်အရာပ်ပန်တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် အတိုၚ်တၚ်လလောၚ်တြးဂှ်ရ။
ပ္ဍဲကဵုတ္ၚဲဂှ်ရ ပ္ဍဲကွာန်နာတ်တလေန် ပွိုၚ်ဍုၚ်ကျံက်ကျဳ KNU ဂှ် ဟိုတ်နူမကမ်လွဟ်ဇၞော် ဒပ်ကံၚ်ဇြဳပၞာန် ပန်ပှော်ဏာလဝ်ဂှ် ဒတုံဗ္တိုဟ်ထ္ကးအာလဝ်တုဲ မအိအိ အာယုက် ၁၄ သၞာံ၊ ဒဝ်ဖွာဖွာ အာယုက် ၈၄ သၞာံတံ ကလိဂွံအာလဝ်ဝပ်ရ။
ပ္ဍဲဂိတုဂျာန္နဝါရဳ ၂၈ ဂှ် ဒပ်ကံၚ်ဇြဳပၞာန်ဖျေံသ္ဇိုၚ်ဍုၚ်ညံၚ်လေဝ်ပေန် ဗ္တိုက်ထောံလဝ်မခတိုဟ် နကဵုဒရုၚ်တုဲ ဒတုံဗ္တိုဟ်အာလဝ် အပ္ဍဲကွာန် (ပျဉ်းရေ) တုဲ ကောန်ကွာန်မွဲတၠ ဒဝ်သာန်မျေတ် အာယုက် ၆၉ သၞာံဂှ် ဒးကဝေက်ဗုမ်တုဲ ချိုတ်အာလဝ်ရ။
အပ္ဍဲပရေၚ်ဒပ်ကံၚ်ဇြဳပၞာန် ပန်ပှော်ဗ္တိုက်ဂှ် သ္ၚိညးဍုၚ်ကွာန်ပိုၚ် ပန်မကဵု ဘာလကျာ်ၜါမ ဇီုကပိုက်လီုလာ်အာလဝ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး KNU ဗဟဵုရ။
စပ်ကဵုတၚ်လလောၚ်တြး KNU ဗဟဵုဂှ်တုဲ လ္ပာ်ကံၚ်ဇြဳပၞာန် လလောၚ်ပ္တိတ်လဝ် မမိက်ကဵုမွဲမွဲဂှ် ဟွံဂွံဆဵုကေတ်ဏီရ။
ပရိုၚ်−သြၚ်လောန်တိုၚ်(မ်)
ဗီု−KNU