တယိတ်ချံၚ်၊ ဂျာန္နဝါရဳ ၃၀
ဒပ်ကံၚ်ဇြဳပၞာန် လုပ်စိုပ်ထ္ပက်ကၠုၚ်ကရောၚ်ပၞာန် ပ္ဍဲရးတၞၚ်သဳ ပွိုၚ်ဍုၚ်တယိတ်ချံၚ် သ္ကုတ်သၟဝ်ဂှ်တုဲ ညးဒေသ ၂၀၀၀ ပြၚ် နူကဵုကွာန် ၇ ကွာန်ဂှ် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရောၚ် ညးမရီုဗၚ်ကဵုပရေၚ်ပါဲဒဴဘဲပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန် ဇြဟတ် ၆၀ ပြၚ်ပါဂှ်ဝွံ နူဗ္ဒိုပ်ဝေန်ပဂှ် စနူဂိတုဂျာန္နဝါရဳ ၂၇ အခိၚ်နူဂယးဂှ်တုဲ ထ္ပက်ကၠုၚ်ကရောၚ်ပၞာန် ချဳဒရာၚ်ကၠုၚ် လ္ပာ်ပွိုၚ်ဍုၚ်တယိတ်ချံၚ် သ္ကုတ်သၟဝ်ဂှ်ကဵု ပွဳပွူကွာန်ချံၚ်ဝပျေန်ရ။
ဟိုတ်နူဒပ်ကံၚ်ဇြဳပၞာန် ထ္ပက်ကရောၚ်ပၞာန် ချဳဒရာၚ်ကၠုၚ်ဂှ်တုဲ ညးဒေသ ၂၀၀၀ ပြၚ် နူကဵုကွာန် (ချောင်းဝပြင်၊ သရက်ပင်အိုင်၊ ရေချိုချောင်း၊ ဂုံညှင်းဆိပ်၊ ဆီတော၊ ချောက်ချောင်း) တံဝွံ ဒးပါဲဒလေတ်ဒၟံၚ် ပ္ဍဲဒဵုဂြိုပ်မကြပ်တံကဵု ဗ္ဒိုပ်ပါဲဒဴဘဲပၞာန်တံရ။
ပ္ဍဲကဵုဏံ ကွာန် (ရေချိုချောင်း ကဵု ကွာန်ဂုံညှင်းဆိပ်) တံ ဒးပါဲဒလေတ်ဒၟံၚ် အလုံကွာန်မွဲတုဲ ကွာန်လ္ၚဵုတံဂှ်တှ်ေ ဟိုတ်နူနွံဒၟံၚ်ဗ္ဒါဲဂၠံၚ် ထ္ပက်ကရောၚ်ပၞာန်တံဂှ်တုဲ ညးဒေသၜိုတ်ကဝက်ပြၚ်ရဟေၚ် ဒစးဒုၚ်ပါဲဒလေတ်လဝ်ဂွံဂှ် ကောန်ဂကောံရီုဗၚ်ပါဲဒဴဘဲပၞာန် ပွိုၚ်တိုက်(တောင်ပျောက်) မွဲတၠ ဟီုရ။
ပ္ဍဲဂိတုဂျာန္နဝါရဳ ၂၇ ဂှ်လေဝ် ဒပ်ကံၚ်ဇြဳပၞာန် မစိုပ်ကၠုၚ်ပ္ဍဲကွာန်ချံၚ်ဝပျေန်ဂှ်ဝွံ ရပ်ဒက်ဏာလဝ် ညးဒေသဗွဲမဂၠိုၚ်ဂၠေၚ်တုဲ ကျာ်ဇၞော်အ္စာ နွံပိုန်ဘာကွာန်ဂှ် ဒုၚ်လျိုၚ်တုဲ ကလေၚ်ဗၠးကဵုလဝ်ရောၚ် သ္ဂးရ။
ပ္ဍဲကဵုညးဒေသ ဒးပါဲဒလေတ်ဒၟံၚ်ဂမၠိုၚ် ၜိုတ် ၁၀၀ ပြၚ်ရ ကၠုၚ်စိုပ်မံၚ်ဒၟံၚ် ပ္ဍဲဗ္ဒိုပ်ကဵုအရီုဗၚ်ညးပါဲဒဴဘဲပၞာန် ပွိုၚ်တိုက်(တောၚ်ပျောက်) ဂှ် နွံတုဲ မၞိဟ်သှ်ေတံဂှ်တှ်ေ ဒးပါဲဒလေတ်ဒၟံၚ် ပ္ဍဲဒဵုဂြိုပ်မကြပ်တံကဵု ပ္ဍဲကၠအ်ဂူယာတံဂှ် ဂွံတီကေတ်ရ။
ဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန်ဂှ်ဝွံ စိုပ်ဒၟံၚ်ပ္ဍဲကွာန် (သဲလမ်း) ဗ္ဒါဲကွာန် (ဂုံညှင်းဆိပ်) ပွိုၚ်ဍုၚ်တယိတ်ချံၚ် သ္ကုတ်သၟဝ်ဂှ်တုဲ မၚ်တောပ်ဗ္တိုက်ဒၟံၚ်တံဂှ် ကၠောန်သ္ပဒၟံၚ်ရောၚ် သ္ဂးရ။
အတိုၚ်လိက်ဒုၚ်စဳရေၚ် ဂကောံသုတေသနဖျေံသ္ဇိုၚ်ဒေသ FE5 Tanintharyi ဂှ်မ္ဂး ပ္ဍဲရးတၞၚ်သဳဂှ် အပ္ဍဲဂိတုဒဳဇြေမ်ဗာ သၞာံတုဲကၠုၚ်တေံ ဟိုတ်နူပေါဲဗ္တိုက်တံကဵု ပရေၚ်ဗ္တိုက်ပၞာန်ကျာတံတုဲ ညးဒးထောံလသာသ္ၚိဌာန် ဒးဂြိပ်ဒဴပါဲဒလေတ်တံ နွံလဝ် စဵုကဵု ၆၅၈၀၀ ပြၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ