နေဗျဳဒဝ်၊ ဂျာန္နဝါရဳ ၃၀
လၟိဟ်မၞိဟ်လုပ်ပၞာန်ဂွံ ပ္ဍဲကဵုအရာပ်၊ ကွာန်၊ ပွိုၚ်ဍုၚ် မဆေၚ်စပ််တံဂှ် ဒစးဒုၚ်တုဲသွက်ဂွံပကောံလဝ်စရၚ် ချိုတ်တ်ပၠိုတ်တ်ဂှ်တုဲ ညံၚ်ညးမဆေၚ်စပ်ဂမၠိုၚ် ဂွံတီကေတ်မာန် ဒးရေၚ်တၠုၚ်လဝ်ဏောၚ်ဂှ် ဝန်ဇၞော်ကာစဵုဒၞါကံၚ်ဇြဳပၞာန် ဟီုရ။
ပ္ဍဲကဵုဂကောံပ္ညဳပ္ညပ်ကမၠောန် ဂကောံကော်ဘိက်သ္ဂောံလုပ်ပၞာန်−ကဆံၚ်ဗဟဵု မကၠောန်ဗဒှ်လဝ် ပ္ဍဲနေဗျဳဒဝ် ပ္ဍဲဂိတုဂျာန္နဝါရဳ ၂၈ ဂှ် သ္ကိုပ်ဗိုလ်ဇၞော်မံၚ်မံၚ်အေ ဝန်ဇၞော်ကာစဵုဒၞါ ကေုာံ ဒုသ္ကိုပ်ဝန်ဇၞော်ကံၚ်ဇြဳပၞာန် သီုကဵုဒှ်ဥက္ကဌဂကောံဂှ် ဟီုလဝ်ရ။
ဒဒှ်မကော်ဘိက်ကၠုၚ်ကဵုလုပ်ပၞာန်ဂှ်ဝွံ ဒှ်လၟေၚ်ကမၠောန်မ္ဒးကၠောန်ဍာ်ဇမၠိၚ်တုဲ ကၠောန်အာ ဗွဲမစှ်ေကဵုသၞောတ် ကၠောန်အာနကဵုပရေၚ်ကောပ်ကာဲတံမှဟေၚ် အခါဒးပကောံကၠုၚ်ဍာံဍာံမ္ဂး ကၠောန်အရာဟွံဗဗွဲကဵုသၞောဝ်တံဟွံဂွံတုဲ အကာဲအရာညးဂမၠိုၚ်ဒုၚ်တဲပတှ်ေစှ်ေစိုတ်မွဲဂှ် ကလိဂွံမာန်ရောၚ် သ္ဂးရ။
ညံၚ်ဟွံဂွံဒှ် ဗီုပြၚ်ကဵုဇြဟတ်ဂရိုဟ်ဗွဲအဓမ္မတုဲ ပကောံအာကောန်ပၞာန်တံဟွံဂွံဒှ်ဂှ် သွက်ဂွံဂိုန်ဂ္စါန်ကၠောန်အာ ဗွဲမဗဗွဲကဵု သၞောဝ်ယိုက်လျိုၚ်ပၞာန်၊ နဲသၞောဝ်ဥပဒေ၊ ကေုာံ လၟေၚ်ကမၠောန်တံဂှ် ဖ္တိုက်ဖ္အောဝ်လဝ်ရ။
ပ္ဍဲဗလးတိဏံဂှ်တှ်ေ ထ္ၜးဟိုတ်နာနာသာ်တုဲ ရပ်ဒက်ကၠုၚ်သၟတ်တံတုဲ မၞိဟ်ကဵုသြန်မာန်တံဂှ်တှ်ေ ဒးကလေၚ်နုက်ပ္တိတ်ဒၟံၚ် ကဵုစှော်ကိုဋ်တံနွံတုဲ လ္ၚဵုတံဂှ်တှ်ေ ပလံၚ်ဏာလဝ် ပ္ဍဲဒၞါဲပကောံကောန်ပၞာန်တံ နွံဒၟံၚ်ရောၚ် ညးဒေသတံ သ္ဂးအိုတ်ရ။
ဝန်ဇၞော်ကာစဵုဒၞါဂှ်တှ်ေ နကဵုညးတာလျိုၚ်ဂမၠိုၚ် ရေၚ်တၠုၚ်ကၠုၚ်ဒၟံၚ် လ္တူသၞောဝ်ယိုက်လျိုၚ်ပၞာန်တံ မဟွံဗဗွဲကဵုသၞောဝ်တံဂှ် ဂွံဆဵုကေတ်မ္ဂး ကေတ်အာအရေဝ် ဗွဲမစိုပ်တရဴဏောၚ်တုဲ ဂဗုတ်ကေတ်အရေဝ်၊ ကေတ်ဒၟံၚ်အရေဝ်တံလေဝ် နွံဒၟံၚ်ဖိုဟ်ဂှ် ဒုၚ်ကၠုၚ်ဝန်ရ။
တုဲကၠုၚ်အကြာတံဏံ စပ်ကဵုပရေၚ်ကော်ဘိက်သ္ဂောံလုပ်ပၞာန်ဂှ်တုဲ ကုသ္ဇိုၚ်ဝန်ကၟိန်ဍုၚ် မအာတ်သြန် မလှာဲလဝ်မၞိဟ် မကၠောန်သ္ပလဝ်သာ်ဏံတံဂှ် ကေတ်အာအရေဝ် ဗွဲမဗဗွဲကဵုသၞောဝ်တံရောၚ် လလောၚ်ပ္တိတ်လဝ်ပရိုၚ်ရ။
ဂကောံအုပ်ဓုပ်ကွာန်အရာပ်၊ ဂကောံပွိုၚ်ဍုၚ်ဂမၠိုၚ် ပ္ဍဲပရေၚ်သြန်လှုဲတံဂှ် ညံၚ်ပရေၚ်ဟွံဗဗွဲကဵုသၞောဝ်တံ ဟွံဂွံမွဲဂှ် သွက်ဂွံရေၚ်တၠုၚ်အာ ဗွဲမဗဗွဲကဵုလၟေၚ်ကမၠောန်တံမာန်ဂှ် ညးတာလျိုၚ်အဆံၚ်ၚ်တံ သွက်ဂွံစၟဳတ်ကောပ်ကာဲအာဂှ် နွံပၟိက်ရောၚ် ဝန်ဇၞော်ကာစဵုဒၞါ သ္ဂးရ။
ရန်ကဵုပရေၚ်စဵုဒၞါကၟိန်ဍုၚ်တုဲ ညးမလုပ်ပၞာန်ဂွံ အကြာအာယုက်မသၞောတ်ဗ္ၜတ်လဝ် လ္ဂောံကဵုသၞောဝ်ဂှ်မ္ဂး အခိၚ်ကာလမစၟတ်လဝ်ဂှ် ညံၚ်ဂွံယိုက်တာလျိုၚ် ဗွဲမပြေပြံၚ်မာန် သွက်ဂွံရေၚ်တၠုၚ်အာဂှ် ကဵုလဝ်စၞောန်ရ။
နကဵုဂကောံကော်ဘိက်သ္ဂောံလုပ်ပၞာန်−ကဆံၚ်ဗဟဵုဂှ်မ္ဂး ညံၚ်စရၚ်အၚ်ဂွံဍာံပြ၊ ဍာ်ဇမၠိၚ် ညံၚ်ဂွံစုတ်စရၚ်သမ္တီလောဲသွာဂှ် ထ္မံက်ဒၟံၚ်ရုပ်ရဴ သၞောတ်ကောပ်ကာဲတၚ်နၚ်ပူဂဵု ညးမယိုက်လျိုၚ်ပၞာန်တံဂှ် ကဵုလဝ်သမ္တီရ။
ဂွံဖ္ဍိုက်ဗပေၚ် တၚ်နွံပၟိက်ဇြဟတ်ပၞာန်တံဂှ် ညးအာယုက်ပေၚ်တုဲတံဂှ် ကၟာတ်လဒဵုအခေါၚ်တိတ်ဍုၚ်သ္အာၚ်တုဲ နဲသၞောဝ်ဥပဒေယိုက်လျိုၚ်ပၞာန် မတံၚ်ပၠောပ်သၟတ်တံ အပ္ဍဲပၞာန်ဂှ် ပ္ဍဲဂိတုဂျာန္နဝါရဳ ၂၃ တေံ ကံၚ်ဇြဳပၞာန် သ္ပဒတန်စၞောန်ပျးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−MOI