ရေဝ်၊ ဂျာန္နဝါရဳ ၃၁
တွဵုရးဍုၚ်မန် ပွိုၚ်ဍုၚ်ရေဝ် ပ္ဍဲကဵုကွာန်လ္ၚဵုတံဂှ် ဟိုတ်နူကံၚ်ဇြဳပၞာန် ကၟာတ်လဒဵုသၞောတ်ဗ္ၜတ်ကၠုၚ်တုဲ ဇွောံမစၞစ စပိုတ်ကၠုၚ်ဒၟံၚ်ဂှ် ဂွံတီကေတ် နူကဵုကံၚ်ဇြဳဖေဝ်ဒရာဍုၚ်မန် ဌာနရီုဗၚ်ဟံၚ်ပြာ် ကေုာံ ပရေၚ်ဗ္စာရဏာမၞိဟ်ရ။
ပပ္တံနူသၞာံဏံမံက်တုဲ ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် လုပ်စိုပ်ကၠုၚ် ပ္ဍဲဒေသကြုၚ်လံၚ် ပွိုၚ်ဍုၚ်ရေဝ် ဒၞါဲဂကောံဇြဟတ်ပၠန်ဂတးတံ ချဳဒရာၚ်ဇြဟတ်ခိုဟ်ဂှ်တုဲ ပေါဲဗ္တိုက်ၜါလ္ပာ် က္တဵုဒှ်လဝ်ရ။
ကြဴနူပေါဲဗ္တိုက်တံဏံတုဲ စနူဂိတုဂျာန္နဝါရဳ ၁၂ တုဲဂှ် ပွမဖ္ဍိုက်ပလံၚ် ကၠေၚ်စက် ပါလုပ်သီုကဵုသ္ၚု ကေုာံ ဗၞိက်စၞစသုၚ်သ္ဇိုၚ် နူဒေသကြုၚ်လံၚ် လ္ပာ်ပွိုၚ်ဍုၚ်ရေဝ် ကွာန်သ္ကုတ်အပ္ဍဲတံဂှ် ဒပ်ကံၚ်ဇြဳပၞာန် ကၟာတ်လဒဵုလဝ်ရ။
လ္ပာ်ကံၚ်ဇြဳပၞာန် ကၟာတ်လဝ် အခေါၚ်ဖ္ဍိုက်ဏာနၚ်ဇွောံမစၞစတံဂှ်ဝွံ လအ်ကၠုၚ် ၂၀ တ္ၚဲပြၚ်ယျတုဲ ဒဒှ်မဇွောံမစၞစပိုတ်အိုတ်တံကဵု ၚုဟ်ကပေါတ်ဗၞိက်သၠုၚ်တိုန်ကၠုၚ်တံဂှ် ညးဍုၚ်ကွာန်ပါဲဒဴဘဲပၞာန်တံကီု သီုညးဒေသတံ ဒးဒုၚ်စသိုၚ်ဒၟံၚ် ဇၞော်ကဵုဇြဟတ်ရ။
ဟိုတ်နူဇွောံမစၞစပိုတ်အိုတ်ဂှ်တုဲ ညးဍုၚ်ကွာန်ပါဲဒဴဘဲပၞာန်ဂမၠိုၚ်ဝွံ လဆောဝ်လဆောဝ် ဒးစဒၟံၚ်ပုၚ်ၜိုဟ် ဒှ်ဒၟံၚ်စဵုကဵုအကာဲအရာဏံဂှ် မိသုတဇဝ် သ္ကိုပ်ဌာနပရေၚ်ဟံၚ်ပြာ် ကေုာံ ပရေၚ်ဗ္စာရဏာမၞိဟ် ကံၚ်ဇြဳဖေဝ်ဒရာဍုၚ်မန် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အတိုၚ်ဂလာန် ဌာနပရေၚ်ဟံၚ်ပြာ် ကေုာံ ပရေၚ်ဗ္စာရဏာမၞိဟ် ကံၚ်ဇြဳဖေဝ်ဒရာဍုၚ်မန်ဂှ်မ္ဂး ဘဲဒဏ်ဇွောံမစၞစပိုတ်အိုတ်ဂှ် သီုကွာန်ဝါဗိုၚ်၊ ဝါဇြေန်၊ ကွာန်အကျာံတံ မပါလုပ်ဂှ် ကွာန် ဟွံအောန်နူကဵု ၁၀ ကွာန် ဒးဒုၚ်စသိုၚ်ဒၟံၚ်ရ။
ကရောံဇွောံမစၞစပိုတ်အိုတ်ကၠုၚ်ဂှ် ၚုဟ်ကပေါတ်ဗၞိက်တံဂှ်လေဝ် သ္ၚုမွဲရိုက်မ္ဂး ဒှ်မံၚ် ၜါကိုဋ်ဘာ်ပြၚ်၊ ကၠေၚ်စက်မွဲလဳတာ ၉၀၀၀ ဒ္ကေဝ်၊ ကၠေၚ်စ၊ ကသိုန်၊ (အချိုမှုန့်) တံ မပါလုပ် ဗၞိက်စၞစသုၚ်သ္ဇိုၚ်တံဂှ်လေဝ် လ္တူဍုၚ်ရေဝ်ဂှ်တှ်ေ ၚုဟ်သၠုၚ်တိုန်ဒၟံၚ် ဗ္ဒါဲၜါဆရ။
ဟိုတ်နူပေါဲဗ္တိုက်ရေဝ်တုဲ ညးဒေသ ၁၀၀၀ ပြၚ် နူကဵုကွာန်ကြုၚ်လံၚ်၊ ကွာန်အကျာံ၊ ကွာန် (အိုၚ်ရှည်) ၊ ကွာန်ဝါဗိုၚ်၊ ကွာန်(ကမ်းနီ) ၊ ကွာန်( ရစ်ချောၚ်း) တံ ဒးပါဲဒၟံၚ်ဘဲပၞာန်တုဲ နွံပၟိက်ဒၟံၚ်ကဵု အရီုဗၚ်ဇွောံမစၞစ ကေုာံ ပဠောံၜိုဟ်၊ ယာတ်၊ ဂဥုဲဇဗ တံဂှ် ဂွံတီကေတ် ဇရေၚ်ညးမရီုဗၚ်ကဵုဒၟံၚ်ပရေၚ်ပါဲဒဴဘဲပၞာန်တံရ။
ပရိုၚ်−သြၚ်လောန်တိုၚ်(မ်)
ဗီု−Social Media