ပ္ဍဲထဝါဲ ဗ္ဒိုပ်သၞေဟ်ကၚ်ဒပ်ပၞာန်ၜါ ဒးဒုၚ်ဗ္တိုက်သီ

ထဝါဲ၊ ဂျာန္နဝါရဳ ၃၁

ဗ္တိုက်သီဂွံလဝ် ကုန်ဗ္ဒိုပ်ကံၚ်ဇြဳပၞာန် ကေုာံ သၞေဟ်ကၚ်စၟဳတ်ဒဒန်(ရွှေဂူ) မခြာဒၟံၚ်ကဵုဍုၚ်ထဝါဲ ရးတၞၚ်သဳ ၅ မိုၚ်ဂှ် ကရောၚ်ပၞာန်ဒူရက မဒှ်ကရောၚ်ပၞာန်ပၠန်ဂတး လလောၚ်ပ္တိတ်လဝ်ပရိုၚ် တ္ၚဲဏံရ။

ဗ္ဒိုပ်သၞေဟ်ကၚ်ၜါဏံဂှ် ပ္ဍဲဂိတုဂျာန္နဝါရဳ ၂၉ အခိၚ်လဒေါဝ်တ္ၚဲ ၂ နာဍဳဂှ် ဒပ်ပံၚ်ကောံ ဂကောံဇြဟတ်ပၠန်ဂတးတံ လုပ်စိုပ်ဗ္တိုက်လဝ်တုဲ ဂွံၜိုတ်ပွိုၚ်မသုန်နာဍဳဂှ် သီဂွံလဝ် သီုၜါဗ္ဒိုပ်ရ။

အပ္ဍဲပေါဲဗ္တိုက်သီဗ္ဒိုပ်ဂှ် ကောန်ဒပ်ကံၚ်ဇြဳပၞာန် ဟွံအောန်နူကဵုမသုန်တၠ ချိုတ်တုဲ ပန်တၠ ရပ်ဂွံလဝ်ဂျိုၚ်ၚ်တုဲ ကောန်ဒပ်သှ်ေတံ ဂြိပ်ဗၠးအာဂှ် သ္ကိုပ်ကရောၚ်ပၞာန်ဒူရက ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

အပ္ဍဲပေါဲဗ္တိုက်ဂှ် သီဂွံလဝ်မကမ်လွဟ်လက်နက် နူကံၚ်ဇြဳပၞာန် ဗွဲမဂၠိုၚ်ဂၠေၚ်တုဲ ဗ္ဒိုပ်သၞေဟ်ကၚ်ၜါဂှ်တှ်ေ စံၚ်ပလီုလဝ်ရောၚ် သ္ဂးရ။

ပရေၚ်ဗ္တိုက်ဏံဂှ် ကရောၚ်ပၞာန်ဒူရက အာက္ဍိုပ်တုဲ ဒပ်ပၞာန်ဗၠးၜးကောန်ဂကူဓဝါဲ DNLA ၊ ဒပ်စဵုဒၞါညးဍုၚ်ကွာန်ဍာ်ဗု YPPDF ၊ ဒပ်ဒရုၚ်(ဖက်ဒရယ်ဓူဝံကြယ်) ကေုာံ ကရောၚ်ပၞာန်ဒံၚ်ညဳနံၚ် ဒပ်ပံၚ်ကောံတံ ပါလုပ်ဗ္တိုက်လဝ်ရ။

ကြဴနူပေါဗ္တိုက်သီဗ္ဒိုပ်တုဲဂှ် ဂကောံဒပ်ကံၚ်ဇြဳပၞာန် ဇြဟတ် ၈၀ ပြၚ်ပါ နူကဵုတမ်ဒပ်ကံၚ်ဇြဳပၞာန်တံဂှ်ဝွံ ကၠုၚ်စိုပ်ဖျေံလဝ်ဒပ် ပ္ဍဲပွဳပွူဗ္ဒါဲသၞေဟ်ကၚ်ဒဒန်(ရွှေဂူ) ဂှ် ဂွံတီကေတ် အတိုၚ်ဂလာန်ညးဒေသတံရ။

ပရိုၚ်−သြၚ်လောန်တိုၚ်(မ်)

ဗီု−ကရောၚ်ပၞာန်ဒူရက