မတ်မလီု၊ ဂျာန္နဝါရဳ ၃၁
ပ္ဍဲတွဵုရးဍုၚ် သွက်ပရေၚ်ကဏ္ဍရဝ်ဗာ ဂွံဖောအ်ဗြေဝ်တောတက်ဂှ် တၚ်အာတ်မိက်သၟာဂူယာတဵုရဝ်ဗာတံဂှ် စဵုကဵုလအ်ကၠုၚ်ပွိုၚ်မွဲဂိတုပြၚ်ကီုလေဝ် လ္ပာ်ကံၚ်ဇြဳပၞာန် ကလေၚ်ကၠုၚ်ပရိုၚ် ဟွံမွဲဏီပုဟ်ဂှ် တၠကမၠောန်ရဝ်ဗာတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သွက်ပရေၚ်ကဏ္ဍရဝ်ဗာ ဂွံဖောအ်ဗြေဝ်တောတက်ဂှ် တုဲကၠုၚ် ပ္ဍဲဂိတုဒဳဇြေမ်ဗာ ၁၇ တေံ ကံၚ်ဇြဳပၞာန် တွဵုရးဍုၚ်မန်ကဵု ဂကောံတၠကမၠောန်ရဝ်ဗာ၊ ညးမဆက်စပ်ကဵုကဏ္ဍရဝ်ဗာတံ ပံၚ်ကောံတုဲ ကၠောန်ဗဒှ်လဝ် ပေါဲသဳကၠဳရုၚ်ကမၠောန်ရ။
သွဟ်မတိတ်ကၠုၚ် နူကဵုပေါဲသဳကၠဳရုၚ်ကမၠောန်ဏံဂှ် သွက်ဂွံပ္တိုန်ထ္ၜး သီုကဵုတၚ်နၚ်တံကီု၊ သွဟ်မတိတ်ကၠုၚ်တံဂှ် ဘိုၚ်သောၚ်ကလးကဵုဏောၚ်ဂှ် လ္ပာ်ကံၚ်ဇြဳပၞာန် ကဵုလဝ်ကတိကီုလေဝ် ဒဵုကဵုအခိၚ်လၟုဟ် ထ္မံက်ရုပ်ရဴ ရေၚ်တၠုၚ်ကဵုလဝ် ဟွံမွဲဏီရ။
တၠကမၠောန်ရဝ်ဗာ ဟွံမိက်ထ္မံက်ယၟုမွဲတၠဂှ်တှ်ေ သွဟ်တိတ်ကၠုၚ် နူကဵုပေါဲသဳကၠဳရုၚ်ကမၠောန်တံဂှ် ပ္တိုန်ထ္ၜးလဝ် ဇရေၚ်ကံၚ်ဇြဳပၞာန် ဗွဲလစှ်ေကီုလေဝ် ဒဵုကဵုလအ်ကၠုၚ်ပွိုၚ်မွဲဂိတုပြၚ်ဂှ် ထ္မံက်ရုပ်ရဴရေၚ်တၠုၚ်ကဵုလဝ် ဟွံမွဲဏီပုဟ်ဂှ် ဟီုရ။
“ပိုယ်တံ ပ္တိုန်ထ္ၜးလဝ် သွဟ်ပေါဲရုဲမာဲတုဲယျ။ ဒဵုကဵုတ္ၚဲဏံ မုမှထ္မံက်ရုပ်ရဴရေၚ်တၠုၚ်လဝ်ဂှ် ဟွံမွဲဏီပုဟ်။ မွဲဂိတုလေဝ် ပြၚ်အာယျ။ ပိုယ်တံဂှ် ဂ္ဇအ်မၚ်ဒၟံၚ်ဖိုဟ်ရ။ မုလိက်ပၟိၚ်မွဲမှလေဝ် ဟွံတိတ်ကၠုၚ်ပုဟ်။ အရာပိုယ်တံ နွံပၟိက်ဂှ်တှ်ေ သွက်ဂွံရီုဗၚ်ကဵု အရာမက္တဵုဒှ်ဒၟံၚ်သၟဝ်တိဏံရ” သာ်ဝွံ သ္ဂးရ။
အတိုၚ်ဂလာန် တၠကမၠောန်ရဝ်ဗာတံဂှ်မ္ဂး သွက်ကဏ္ဍရဝ်ဗာ ဂွံဖောအ်ဗြေဝ်တောတက်ကၠုၚ်ဂှ် ပ္ဍဲအရာဖ္ဍိုက်ပလံၚ်ဗစိုပ်ရဝ်ဗာတံဂှ် ညံၚ်ဟွံဂွံအာတ်မိက်သြန်တံကီု၊ သွက်ဂွံဖအောန်ဖျေံကဵု စေဝ်ပၞောန်မခုတ်ပ္တန်လဝ်တံဂှ်ကီု တၚ်နၚ်သာ်ဏံ ၂၀ ပြၚ်ဂှ် ပ္တိုန်ထ္ၜးအာတ်မိက်လဝ် ဇရေၚ်ကံၚ်ဇြဳပၞာန်ရ။
ဆ္ဂး ဒဵုကဵုအခိၚ်လၟုဟ် ပ္ဍဲအရာဖ္ဍိုက်ပလံၚ်ရဝ်ဗာတံဂှ် သၞေဟ်ကၚ်စၟဳတ်ကံၚ်ဇြဳပၞာန်တံ အာတ်မိက်ဒၟံၚ်သြန်လှုဲ ဂၠိုၚ်ကဵုဆကီု၊ ပ္ဍဲအရာဖ္ဍိုက်ဏာနၚ် ကပေါတ်ဗၞိက်ရဝ်ဗာအပြောံတံဂှ်လေဝ် အာတ်လိက်ထံက်ဂလာန်၊ စၟတ်တဲသ္ပစၟတ်သမ္တီတံဂှ်တုဲ အာတ်မိက်ဒၟံၚ်သြန်တံဖိုဟ်ဂှ် တၠကမၠောန်ရဝ်ဗာဂမၠိုၚ် သ္ဂးအိုတ်ရ။
လ္ပာ်ကံၚ်ဇြဳပၞာန်ဂှ်တှ်ေ တၠကမၠောန်ရဝ်ဗာဂမၠိုၚ် သွက်ဂွံကၠောန်ညံၚ်ရဝ်ဗာဂွံတိတ်ဂၠိုၚ် ကဵု ညံၚ်ဍာ်ဒကေဝ်ဂွံခိုဟ်၊ သွက်ဂွံကၠောန်ပ္တိတ် ဗၞိက်ပ္တိတ်ၚုဟ်မးသၠုၚ်ၚ်တံ၊ သွက်ဂွံပလံၚ်ပ္တိုန်ဍုၚ်သ္အာၚ်တံသၟးဟွံက အတိုၚ်လၟေၚ်စေဝ်ပၞောန်မခုန်ပ္တန်လဝ်တံဂှ် သွံတြး ဗွဲမဗၠးၜးမာန်ရောၚ် ကဵုလဝ်ကတိရ။
ကမၠောန်ရဝ်ဗာ အပ္ဍဲဒေသတံဝွံ ပ္ဍဲလက်ထက်ကံၚ်ဇြဳပၞာန်ဏံဂှ် ဟိုတ်နူကပေါတ်တမ်တံကဵု ဗၞိက်နာနာတံ ခရိတ်အိုတ်ဂၠိုၚ်ဒၟံၚ်ကီု၊ ဟိုတ်နူသၞောဝ်ယိုက်လျိုၚ်ပၞာန်တုဲ ကောန်ကလောန်စိုန်သ္ကီုတံ အောန်စှ်ေကၠုၚ်ကီု၊ ဟိုတ်နူအကာဲအရာပရေၚ်ဂီုကၠီုတုဲ ကၠအ်ရဝ်ဗာခွါတ်ထၜိုတ်ဟွံဂွံဂှ် နွံဒၟံၚ်ကဵုကိုဋ်ရ။
တွဵုရးဍုၚ်မန်ဝွံ ရံၚ်ကဵုဗ္ၜတ်အလုံဍုၚ်မွဲမ္ဂး ဒှ်တွဵုရးထၜိုတ်တိတ်ကၠုၚ်အိုတ်မွဲတုဲ ပရေၚ်တဵုလွဳရဝ်ဗာဂှ်တှ်ေ မသုန်ကိုဋ်ဨကပြၚ်နွံတုဲ လၟေၚ်သၞာံ လျိုၚ်တာန်ထၜိုတ် တိတ်ဒၟံၚ်မွဲကိုဋ်ပြၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ