မတ်မလီု၊ ဂျာန္နဝါရဳ ၃၁
စပ်ကဵုပရေၚ်ဍုၚ်ဗၟာတုဲ ညံၚ်ဂွံဒှ်အရာအလဵုအသဳအမေရိကာန် မ္ဒးကဵုက္ဍိုပ်၊ ညံၚ်အလဵုအသဳကြုက် ဂွံညာတ်ကၠုၚ်ဒဒှ်ဍာံ နတဲစှ်ေစှ်ေဂှ် ရေၚ်တၠုၚ်အာဏောၚ် ဒဝ်ဇြေန်မာအံၚ် ဝန်ဇၞော်ကာဍုၚ်သ္အာၚ် NUG ဟီုရ။
ပ္ဍဲကဵုပေါဲသောၚ်ကလးလိက်ပရိုၚ် ဌာနဝန်ဇၞော်ကာဍုၚ်သ္အာၚ် အလဵုအသဳညဳသၟဟ်ဂကူ NUG မကၠောန်ဗဒှ်လဝ်လ္တူလပှ်ကျာ ပ္ဍဲဂိတုဂျာန္နဝါရဳ ၂၉ ဂှ် စပ်ကဵုပရိုၚ်မဳဒဳယျာဂမၠိုၚ် သၟာန်ကၠုၚ်ဂှ်တုဲ သှ်ကဵုလဝ်ရ။
အလဵုအသဳသၟဝ်သ္ကိုပ်သ္က သမ္မတအမေရိကာန် ဒဝ်နေဝ်ထြာပ်ဂှ်တှ်ေ ပရေၚ်ရီုဗၚ် မထံက်ပၚ်ကဵုဒၟံၚ် ဍုၚ်သ္အာၚ်ဂမၠိုၚ်တံဂှ် သွက်ဂွံကလေၚ်သ္ၚဳဂၠိပ်ဂှ် ဒေါအ်ဇူအာပွိုၚ် ၉၀ တ္ၚဲ မဒှ်ရ။
စပ်ကဵုပရေၚ်ဏံတုဲ ယဝ်ကလေၚ်ကဵုအရီုဗၚ်တံဂှ်ဏောၚ်ဟီုမ္ဂး ညံၚ်ဟွံဂွံဒှ် ဗီုပြၚ်ထပိုတ်ထောံဂှ် ပရေၚ်ဍုၚ်ဗၟာဂှ်ဝွံ ပ္ဍဲကဵုမူဝါဒကာဍုၚ်သ္အာၚ် အလဵုအသဳအမေရိကာန်ဂှ် ညံၚ်ဂွံဆက်နွံဒၟံၚ် နဒဒှ်ဒၞါဲကဵုက္ဍိုပ်ဂှ် ရေၚ်တၠုၚ်အာဏောၚ် ဒဝ်ဇြေန်မာအံၚ် သ္ဂးရ။
ဂွံရေၚ်တၠုၚ်သာ်ဏံဂှ်တှ်ေ မူဝါဒမဆက်စပ်ကဵုပရေၚ်ဍုၚ်ဗၟာဂှ်ဝွံ ဆဵုဂဗကဵု ညးတာလျိုၚ် ညးစၞးကၠတ်ထဝ်ဍုၚ်အမေရိကာန် နူၜါဗော်တံဂှ်တုဲ စန်ဒက်အာဏောၚ်ဂှ် ဟီုလဝ်ရ။
ဥူတာန်သဵုနာၚ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်ဂှ်တှ်ေ စပ်ကဵုပရေၚ်ဍုၚ်ဗၟာတုဲ ညံၚ်အလဵုအသဳအမေရိကာန် ဂွံသ္ပကၠုၚ်ကာဂှ် စၟဳဟွံဂွံတုဲ ဇကုဇကု ဒးပတှ်ေကေတ်ရဏောၚ်ဂှ် သ္ၚဳဂၠိပ်လဝ်ရ။
“နကဵု NUG ညံၚ်သ္ဂောံဂွံအထံက်ပၚ်ရီုဗၚ် နူကဵုကၠတ်ထဝ်အမေရိကာန်ၜါဂှ် ပ္တိတ်အာဇြဟတ်ဏောၚ် စပ်ကဵုမဟီုကၠုၚ်ဂှ်တုဲ နကဵုညးတံ ပ္တိတ်ဇြဟတ်တှ်ေ ပ္တိတ်လေဝ်။ ဆ္ဂး ပိုယ်တံဂှ်တှ်ေ ဒှ်ဍုၚ်ဗုဒ္ဓဘာသာတုဲ ဇကုဇကု ဒးပတှ်ေကေတ်ရဏောၚ်ဂှ် ညာတ်ကေတ်ရ။ ဟိုတ်ဂှ်ရ နကဵု NUG ဒဒှ်မစၟဳဒၟံၚ် ပ္ဍဲမူဝါဒထြာပ် ညံၚ်ဂွံသ္ပကၠုၚ်ကာပရေၚ်ဍုၚ်ဗၟာဂှ်ဝွံ သွက်ပၠန်ဂတးက္ညၚ်ဂှ် ပၟိက်ဟွံဇၞော်ကွေံပုဟ်ဂှ် အဲဒုၚ်ဂိုၚ်ကေတ်ရ” သာ်ဝွံ သ္ဂးရ။
အပ္ဍဲကာလ အလဵုအသဳအမေရိကာန် မဒေါအ်ဇူလဝ် အရီုဗၚ်ဂမၠိုၚ်ဂှ် ပ္ဍဲကဵုဗ္ဒိုပ်ညးဒဒိုက် ပ္ဍဲပယျဵုတံဂှ် အရာမဇီုကပိုက်တံ နွံတုဲ နကဵု NUG ပံၚ်တောဲကဵု ဌာနပရေၚ်ဗ္စာရဏာမၞိဟ်တံကဵု ဌာနပရေၚ်ထတ်ယုက်တံတုဲ ညံၚ်ဂွံဂွံအထံက်အပၚ်ရီုဗၚ်တၞဟ်ဟ်တံှဂ် ဒးဂၠါဲအာနဲကဲဏောၚ်ဂှ် သ္ဂးရ။
မွဲလ္ပာ်ဂှ်ပၠန် အလဵုအသဳကြုက် ပ္ဍဲအရာရပ်စပ်ပရေၚ်ဍုၚ်ဗၟာဂှ် ဟွံဒှ်မွဲပလိုဟ်တုဲ ရေၚ်တၠုၚ်ကၠုၚ်ဒၟံၚ် ဂတကြဴဟွံကိတ်ညဳဂှ်ဝွံ ဒှ်ဒၟံၚ်အကာဲအရာဟွံတီကေတ် ဗီုလဵုဂွံရပ်စပ်ပရေၚ်ဍုၚ်ဗၟာဂှ်ပုဟ်ဂှ် ဒဝ်ဇြေန်မာအံၚ် ပါ်ပါဲလဝ်ရ။
ပၠန်ဂတးဏံလၟုဟ်ဂှ်ဝွံ ဒှ်ပရေၚ်အပ္ဍဲဍုၚ်ဗၟာရောၚ် အခိၚ်ပြဟ်ဟ်တေံ အလဵုအသဳကြုက် ဟီုလဝ်ကီုလေဝ် ဗွဲကြဴဏံ ကဵုကၠုၚ်ဇြဟတ်ဂရိုဟ် ကုဂကောံရပ်လွဟ်ကောန်ဍုၚ်အရၚ်သ္ကုတ်သၟဝ်ကျာတံ ညံၚ်ဟွံဂွံဆက်စၠောံကဵု NUG ဂှ် သ္ဂးရ။
ကံၚ်ဇြဳပၞာန် စဵုဒၞါကဵုဒတုဲမြမောဝ်ကြုက် မၞုံအပ္ဍဲဍုၚ်ဗၟာတံ ဍာံဍာံမာန်ဟာဟီုဂှ် အလဵုအသဳကြုက် ဒှ်ဒၟံၚ်အကာဲအရာဓဝ်ပတှ်ေဟွံမွဲဒၟံၚ်ဂှ် ဂွံဆဵုကေတ်ဂှ် ညးဆက်ဟီုရ။
ဆ္ဂး ကု NUG ကေုာံ ဂကောံပၠန်ဂတးရပ်လွဟ်ကောန်ဍုၚ်အရၚ်ဂှ်လေဝ် ဒဵုကဵုအခိၚ်လၟုဟ် နကဵုကြုက် ဟွံညာတ်ကေတ်လဝ် နဒှဒ်သ္ဇက်ဂွံရုဲစှ်မွဲပုဟ်ဂှ် သ္ဂးရ။
ဟိုတ်ဂှ်ရ နကဵုအလဵုအသဳညဳသၟဟ်ဂကူ NUG ဂှ်တှ်ေ ကဵုအလဵုအသဳကြုက်ဂှ် ၜိုန်ဒှ်တဴမွဲလ္ပာ်ဓဝ်ကီုလေဝ် ညံၚ်ပရေၚ်ဆက်ဆောံ ဂွံတောတက်ကၠုၚ်ဂှ် ရေၚ်တၠုၚ်ဒၟံၚ်ရောၚ် ဒဝ်ဇြေန်မာအံၚ် ဟီုရ။
ဥူတာန်သဵုနာၚ်ဂှ်တှ်ေ ညံၚ်လစွံစိုတ်ပရေၚ်ဆက်ဆောံ လ္ပာ်ကြုက်တံ ဂွံပြံၚ်လှာဲကၠုၚ်ဂှ် ညံၚ်ကံၚ်ဇြဳပၞာန် ဂွံကျအာဂှ် နွံပၟိက်ဒးဗ္တိုက်ပလီုကၠေံ သၞောတ်တၠအဝဵုပၞာန်ရ နွံဂှ် သ္ၚဳဂၠိပ်လဝ်ရ။
“ပၠန်ဂတးက္ညၚ်ဏံ ညံၚ်ဂွံအံၚ်ဇၞး ဗွဲမပြဟ် ညံၚ်ကံၚ်ဇြဳပၞာန်တံ ဂွံကျအာ ညံၚ်ဂွံပလီုကၠေံ သၞောတ်တၠအဝဵုပၞာန်မာန်ဂှ် ဂွံပ္တိတ်အာဇြဟတ်ဂှ်ရနွံ။ ကဵုနဲတၞဟ်ဟ် ကဵုနဲကလုတ်တမာန်တံ မုတံှဂ် ကၠောန်ဟွံဂွံပုဟ်။ မူဟိုတ်ရောတှ်ေ ကြုက်ဂှ် ဒှ်ဍုၚ်ကောန်မျူနေတ်ဏောၚ်။ ပရေၚ်တၠအဝဵုအုပ်ဓုပ်ရ ဒှ်ဏောၚ်။ ဟိုတ်ဂှ်ရ အာလှေံလှန်ကြုက် ကဵုပရေၚ်ဒဳမဝ်ကရေဇြဳ ပရေၚ်ဖေဝ်ဒရေဝ်တံဂှ် ဗီုလဵုမှ ဟွံဒှ်ကလောန်ပုဟ်” သာ်ဝွံ သ္ဂးရ။
စပ်ကဵုပရေၚ်ဍုၚ်ဗၟာတုဲ နကဵုအလဵုအသဳကြုက် ဂွံညာတ်ကၠုၚ် ဒဒှ်ဍာံ နတဲစှ်ေစှ်ေမာန်ဂှ် နကဵုဂကောံဇြဟတ်ပၠန်ဂတးတံ ဒးရေၚ်တၠုၚ်အာ နဲကဲဂွံဒက်ပ္တန် သၞောတ်ကၟိန်ဍုၚ်ပံၚ်ကောံ သၞောတ်ပရေၚ်ဍုၚ်ကွာန် မစဵုဒၞါအာဒတုဲဖဵုကြုက် ဍာ်ဇမၠိၚ်မာန်ဂှ်ဏောၚ်ဂှ် ဒဝ်ဇြေန်မာအံၚ် ဟီုရ။
ရေၚ်တၠုၚ်အာ ပရေၚ်ညိၚ်ဝတ် ပ္ဍဲဗလးတိဏံ နတဲစှ်ေစှ်ေမာန်မှဟေၚ် ဗီုပြၚ်ကြုက်ညာတ်ကေတ် လ္တူပရေၚ်ဍုၚ်ဗၟာတံဂှ် ၜိုတ်ဒးရး ပြံၚ်လှာဲကၠေံမာန်ဏောၚ် ညာတ်ကေတ်သာ်ဏံတုဲ တၚ်ကော်ဆဴတံ နွံဒၟံၚ်ဇၞော်ဇၞော်ရောၚ် သ္ဂးရ။
ပရိုၚ်−သြၚ်လောန်တိုၚ်(မ်)
ဗီု−NUG