ထဝါဲ၊ ဖေဖဝ်ဝါရဳ ၁
ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲကွာန်(ရောင်းမော်) ပွိုၚ်ဍုၚ်ထဝါဲ ရးတၞၚ်သဳဂှ် ပန်ဂစိုတ်လဝ် အ္စာၝောံဗ္တောန်လိက်မွဲတၠတုဲ စံၚ်ပလီုလဝ်သ္ၚိဒ္စိတ်မရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန် ဇြဟတ် ၁၀၀ ပြၚ်ပါဂှ်ဝွံ တုဲကၠုၚ်ဂိတုဂျာန္နဝါရဳ ၃၀ တေံဂှ် လုပ်စိုပ်ထ္ပက်ကၠုၚ်ကရောၚ်ပၞာန် ပ္ဍဲကွာန် (ရောင်းမော်) နကဵုဇြဟတ်လၟိဟ်ဗွဲမဂၠိုၚ်ဂၠေၚ်ရ။
ကရောၚ်ပၞာန်ဏံဝွံ အခိၚ်လၟုဟ် စံၚ်ပလီုလဝ်သ္ၚိကွာန်(ရောင်းမော်) ဒ္စိတ်မတုဲ အ္စာဗြဴ CDM မွဲတၠ ဟွံပါဲဒလေတ် အောပ်မံၚ်ဒၟံၚ် ပ္ဍဲသ္ၚိဂှ်လေဝ် ဂစိုတ်ဏာလဝ်ဂှ် ညးဒေသတံ သ္ဂးရ။
ကရောၚ်ပၞာန်ကံၚ်ဇြဳပၞာန်ဝွံ ဒဵုကဵုအခိၚ်လၟုဟ် ဆက်ဖျေံလဝ်ဒပ် ပ္ဍဲကွာန်ဂှ်တုဲ ညးဒေသဂၠိုၚ်ကဵုလ္ၚီ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရောၚ်ဂှ် ဂွံတီကေတ်ရ။
အတိုၚ်ဂလာန်ညးဒေသတံဂှ်မ္ဂး ကရောၚ်ပၞာန်ကံၚ်ဇြဳပၞာန်ဝွံ ပ္ဍဲဂိတုဂျာန္နဝါရဳ ၂၉ ဂှ် ကြဴနူဒးဒုၚ်ဗ္တိုက်သီလဝ် ဗ္ဒိုပ်သၞေဟ်ကၚ်(ရွှေဂူ) ပ္ဍဲထဝါဲဂှ်တုဲ နကဵုက္ဍိုပ်လိက်ၚးတးတိဍာ်ဂှ် ထ္ပက်ကၠုၚ်ကရောၚ်ပၞာန် ပ္ဍဲကွာန် (ရောင်းမော်) ရ။
ဒပ်ကံၚ်ဇြဳပၞာန် ထ္ပက်လဝ်ကရောၚ်ပၞာန်ကီုလေဝ် ပေါဲဗ္တိုက်က္တဵုဒှ်လဝ်ဟွံမွဲတုဲ ၜိုန်ဂှ်ကီုလေဝ် ပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်ရောၚ် ဂွံတီကေတ် နူကဵုဂကောံဇြဟတ်ပၠန်ဂတးတံရ။
အပ္ဍဲကဵုလၟေၚ်ဒဒှ် ဗ္ဒိုပ်သၞေဟ်ကၚ်(ရွှေဂူ) ဒးဒုၚ်ဗ္တိုက်သီဂှ် ကောန်ဒပ်ကံၚ်ဇြဳပၞာန် မသုန်တၠဟွံအောန် ချိုတ်အာလဝ်တုဲ ပန်တၠ ရပ်ဂွံလဝ်ဂျိုၚ်ၚ်ဂှ် ကရောၚ်ပၞာန်ဒူရက လလောၚ်ပ္တိတ်လဝ်ပရိုၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ