ပရေၚ်ဗ္တိုက်ကဵုဒရုၚ် ပ္ဍဲတွဵုရးဍုၚ်မန်ဂှ် ကံၚ်ဇြဳပၞာန် သၠုၚ်ပ္တိုန်ကၠုၚ်အသိၚ်

မတ်မလီု၊ ဖေဖဝ်ဝါရဳ ၁

ပ္ဍဲတွဵုရးဍုၚ်မန် အပ္ဍဲဂိတုဂျာန္နဝါရဳဏံ ဒပ်ကံၚ်ဇြဳပၞာန် သၠုၚ်ပ္တိုန်အသိၚ် ဗ္တိုက်ကၠုၚ်ကဵုဒရုၚ် ကုဂကောံဇြဟတ်ပၠန်ဂတးတံကဵု ကောန်အရာပ်တံဂှ် ဂွံတီကေတ် နူကဵုတၚ်နၚ် သြၚ်လောန်တိုၚ်(မ်) မပကောံပ္ကေဝ်လဝ်ဂှ်ရ။

ဒပ်ကံၚ်ဇြဳပၞာန်ဝွံ အပ္ဍဲဂိတုဂျာန္နဝါရဳဏံ ဒၞါဲဒပ်ပၠန်ဂတး ကေုာံ ကောန်အရာပ် နူကဵုပွိုၚ်ဍုၚ်ကျာ်ထဝ်၊ ၜဳကလေၚ်၊ သဓီု၊ ဇြပ်ဗု၊ ရေဝ် ကေုာံ ပွိုၚ်ဍုၚ်ကျာ်မြဟ်တံ မဖျေံလဝ်ဗ္ဒိုပ်တံဂှ် ဗ္တိုက်လဝ်ကဵုဒရုၚ် ဟွံအောန်နူကဵု ၁၀ ဝါရ။

တၟေၚ်ဂှ်တှ်ေ ပ္ဍဲဂိတုဂျာန္နဝါရဳ ၁၆ တေံ ဒပ်ကံၚ်ဇြဳပၞာန် ဗ္တိုက်လဝ်ဘာဗ္တောန်လိက် ကွာန်(တဂေလောၚ်း) ပွိုၚ်ဍုၚ်ၜဳကလေၚ် နကဵုဒရုၚ်ဒုၚ်ချိုတ် မကၠောန်လဝ်ကဵုတဲဂှ်တုဲ စမြိုၚ်ဘာလ္ၚဵု ဇီုကပိုက်လီုလာ်အာလဝ်ရ။

ကံၚ်ဇြဳပၞာန် ရပ်စပ်ဒရုၚ်ဗ္တိုက်ကၠုၚ်ဂှ်ဝွံ ဒှ်ပွကလေၚ်ထ္ပက်ကၠုၚ်ပၞာန် ကုဒပ်ပၠန်ဂတးတံဂှ် က္ဍိုပ်သ္ကိုပ်ဂကောံလကိုဟ်ဍုၚ်ရေဝ် မဒှ်ဂကောံပၠန်ဂတးဖျေံသ္ဇိုၚ်ရေဝ် သၟဝ်တဲအလဵုအသဳညဳသၟဟ်ဂကူ NUG  ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ၜိုတ်အဲချပ်ဒးဂှ်တှ်ေ အစဳဇန်အိုတ်အောန် မစိုပ်တရဴဂှ် လ္ပာ်ဍေံတံ ကလေၚ်ကေတ်ထောံရ။ ကၠာတဲ ဂကောံဒပ်ပၠန်ဂတးတံ ဗ္တိုက်လဝ်ကဵုဒရုၚ်တုဲ ဍေံတံ ကလေၚ်ကၠောန်ကၠုၚ်သာ်ဏံရ” သာ်ဝွံ သ္ဂးရ။

အပ္ဍဲဂိတုဂျာန္နဝါရဳဂှ် ဟိုတ်နူပရေၚ်ကံၚ်ဇြဳပၞာန် ဗ္တိုက်ကၠုၚ်ကဵုဒရုၚ်ဂှ်တုဲ ညးဍုၚ်ကွာန်ကောန်အရာပ်ၜါတၠ ချိုတ်တုဲ ဟွံအောန်နူကဵုထပှ်တၠ ကလိဂွံလဝ်ဝပ်တုဲ ကောန်ဒပ်ပၠန်ဂတးပိတၠ ပြဟ်လလုဲအာလဝ်ရ။

သ္အာၚ်နူဂှ်ပၠန် အပ္ဍဲပရေၚ်ဗ္တိုက်ကဵုဒရုၚ်ဂှ် ဘာဗ္တောန်လိက်၊ စမြိုၚ်ပရေၚ်ဘာသာတံ မပါလုပ် သ္ၚိမၞိဟ်ဒၟံၚ် ဟွံအောန်နူကဵု ၁၅ မ ဇီုကပိုက်လီုလာ်အာလဝ်ရ။

ကံၚ်ဇြဳပၞာန် ရပ်စပ်ဒရုၚ်တုဲ ဗ္တိုက်ကၠုၚ်ဂှ်ဝွံ ညံၚ်ဂွံဇၞးပရေၚ်ပၞာန်တုဲ ဝေၚ်ဒၟံၚ်ဗျူဟာမွဲဂှ် ညးတာလျိုၚ် ဂကောံဒပ်စဵုဒၞါညးဍုၚ်ကွာန် ဍုၚ်ဇြပ်ဗု မွဲတၠ ဟီုရ။

“ပ္ဍဲကဵုပိုယ်တံဂှ် ဗ္တိုက်ကၠုၚ်ကဵုဒရုၚ်တံ နွံကၠုၚ်။ ဗ္တိုက်ကၠုၚ်ဂၠိုၚ်ၚ်ဂှ်ဟွံသေၚ်ကီုလေဝ် အတေံညိ အဏံညိဂှ်နွံ။ ညအ်ဂှ် လ္ပာ်ဍေံတံ ဝေၚ်ဒၟံၚ်ဗျူဟာမွဲရောၚ် ညာတ်ကေတ်ရ” သာ်ဝွံ သ္ဂးရ။

အတိုၚ်တမ်ပရိုၚ်သြၚ်လောန်တိုၚ်(မ်) အပ္ဍဲဒပ်ပၞာန် မဟီုလဴထ္ၜးလဝ်ဂှ်မ္ဂး အပ္ဍဲတွဵုရးဍုၚ်မန် ပရေၚ်ရပ်စပ်ဗ္တိုက်ကၠုၚ်ကဵုဒရုၚ်တံဂှ် ဌာန်ဂအုပ်ပၞာန်ရးအဂၞဲ ဖျေံသ္ဇိုၚ်မတ်မလီု ကောပ်ကာဲဒၟံၚ်အဓိကရောၚ် ဂွံတီကေတ်ရ။

ပ္ဍဲကဵုဒရုၚ် ဒပ်ကံၚ်ဇြဳပၞာန် ရပ်စပ်ဒၟံၚ်ဂမၠိုၚ်ဂှ် ဒရုၚ်ကၠောန်ပ္တိတ်နူဍုၚ်ကြုက် ပါလုပ်ဂၠိုၚ်အိုတ်တုဲ ဂကူဒရုၚ်ဂမၠိုၚ်ဂှ်တှ်ေ Fixed Wings, Kamikaze Drone, CH-2, CH-4 သၟးဟွံက ဒရုၚ် CZ 55 UAV တံလေဝ် ပါလုပ်ကၠုၚ်ရ။

နူကဵုဗွိုၚ်ဒပ်ပၞာန် CDM တံဂှ်တှ်ေ ပ္ဍဲကဵုပရေၚ်ပၞာန်ဗလးတိတံဂှ် ကံၚ်ဇြဳပၞာန် ဇြဟတ်ပရေၚ်ဗ္တိုက် မဍိုန်လျကၠုၚ်ဒၟံၚ်ဂှ်ဝွံ သၠုၚ်ပ္တိုန်ကၠုၚ်အသိၚ် ပရေၚ်ပၞာန်ကဵုဒရုၚ်တံမာန်တုဲ ဂကောံပၠန်ဂတးတံ ထေက်ကဵုဒးဒစးဒုၚ်ပလေဝ်လဝ်ဂှ် ကဵုလဝ်သတိရ။

ပရိုၚ်−သြၚ်လောန်တိုၚ်(မ်)

ဗီု−Social Media