အိုဝ်တာဝါ၊ ဖေဖဝ်ဝါရဳ ၄
အကြာဍုၚ်ဇိုၚ်ဝုတ်ဒိုဟ်ၜါ နကဵုလက္ချန်ပေါဲပၞာန်ပရေၚ်သွံရာန်ဗၞိက် စကၠုၚ်ဂှ် ကနေဒါ စၞောန်ပျးကၠုၚ်အကံက်အခေါန် လ္တူဍုၚ်အမေရိကာန် နဒဒှ်သ္ဂောံကလေၚ်ပလန်တဲမွဲရ။
သ္ကိုပ်ဝန်ဇၞော် ဂျက်သတေန် ထရူဒိုဝ်ဂှ် လ္တူကပေါတ်ဗၞိက် ပ္တိတ်နူအမေရိကာန် ၚုဟ်မးမၞုံ ၁၅၅ ဗဳလျာန် ကနေဒါဒဝ်ဠာ ပပ္တံနူကဵုဗဳယျာ ကေုာံ ဝိုၚ် စဵုစိုပ်ကပေါတ်အရပ်စပ်သ္ၚိ ကေုာံ ကပေါတ်ဝေၚ်ဓတ်တံဂှ် စၞောန်ပျးကၠုၚ် အကံက်အခေါန် ၂၅ တၟံကၠံရ။
သမ္မတထြာမ် မဂွိၚ်ဒၟံၚ်ကဵု ပရေၚ်ညးဆုဲပြံၚ်မံၚ်တန်တဴ ဟွံလုပ်သၞောဝ်၊ ပရေၚ်ကၠတ်သွံရာန်ဂဥုဲၜူမာဲတံဂှ် စၞောန်ပျးကၠုၚ်လဝ်အကံက်အခေါန် လ္တူကပေါတ်ဗၞိက်နူကဵုကနေဒါ ကေုာံ မက္ကသဳကိုဝ် မပၠောပ်ပ္တိုန်နၚ် လ္ပာ်အမေရိကာန်တံဂှ် ၂၅ တၟံကၠံတုဲ လ္တူကပေါတ်ဗၞိက်ကြုက်ဂှ် စၞောန်ပျးလဝ် ၁၀ တၟံကၠံရ။
သ္ကိုပ်ဝန်ဇၞော် ထရူဒိုဝ်ဂှ်တှ်ေ ပ္ဍဲအရာဒတူလိုၚ် သွက်ကောန်ဍုၚ်ကနေဒါတံဂှ် ဆုတ်ကလေၚ်အာဟွံသေၚ်ပုဟ်ဂှ် ဟီုလဝ်တုဲ နကဵုညးဍုၚ်ကွာန် သီုၜါဍုၚ်တံ ကြက်ဒးဆေၚ်အာမုက် ကုပြဒ္ဒညာအဆက်လက္ကရဴတံဏောၚ်ဂှ် သ္ဂးရ။
နကဵုညးတံ ဟွံမိက်စိုပ် အကာဲအရာလၟုဟ်ဂှ်တုဲ ဂွံဒှ်ကၠုၚ်သာ်ဏံဂှ်လေဝ် ညးတံ အာတ်မိက်လဝ်ဟွံသေၚ်ပုဟ်ဂှ် သ္ကိုပ်ဝန်ဇၞော် ဟီုရ။
လ္တူကပေါတ်ဗၞိက်အမေရိကာန် ၚုဟ်မးမၞုံ ၃၀ ဗဳလျာန်ဒဝ်ဠာဂှ် ၚုဟ်နှေန်အကံက်အခေါန် နူကဵုသ္ကိုပ်ဝန််ဇၞော်ကနေဒါ မစၞောန်ပျးလဝ်ဂှ်ဝွံ လမျီုစလုပ်အာ ပ္ဍဲဂိတုဖေဖဝ်ဝါရဳ ၄ ဂှ်ဏောၚ်တုဲ ကပေါတ်ၚုဟ်မးမၞုံ ၁၂၅ ဗဳလျာန်ဒဝ်ဠာတံဂှ်တှ်ေ ညံၚ်ကမၠောန်ကနေဒါတံ ဂွံထိၚ်ပ္ညဳမာန်ဂှ် ကဵုလဝ်အခိၚ် ၂၁ တ္ၚဲရ။
လ္ပာ်အမေရိကာန် သၠုၚ်ပ္တိုန်အကံက်အခေါန်တုဲ ဟိုတ်နူကနေဒါ ကလေၚ်ခၠေဝ်ကၠုၚ်သာ်ဏံဂှ်ရ မက္ကသဳကိုဝ် ကေုာံ ကြုက်ဂှ်လေဝ် ကၠောန်ကၠုၚ်သာ်ဏံမာန်တုဲ ၚုဟ်ကပေါတ်ဗၞိက်ဂမၠိုၚ် သၠုၚ်တိုန်ကၠုၚ် ကဵုဆမာန်ရောၚ် တၠပညာပရေၚ်ပိုန်ဒြပ်ဂမၠိုၚ် ကဵုလဝ်သတိရ။
ကနေဒါဂှ်တှ်ေ စၞောန်ပျးဏာလဝ် အကံက်အခေါန် ၂၅ တၟံကၠံ လ္တူကပေါတ်ဗၞိက်အမေရိကာန် ဗဳယျာ ကေုာံ ဝိုၚ် သီုကဵုကပေါတ်ဗၞိက်နာနာသာ်ရ။
Ref: BBC