မတ်မလီု၊ သေပ်တေမ်ဗာ (၃၀)
ပ္ဍဲဍုၚ်မတ်မလီု တွဵုရးဍုၚ်မန်ဂှ် သွက်ဂွံဒှ် safe city ဂှ် ဖအိုတ်သြန် နူကဵုသြန်ဘဏ္ဍာညးဍုၚ်ကွာန်တံ ဂၠိုၚ်ကဵုဠက်ကိုဋ်တုဲ စုတ်လဝ် CCTV တံကီုလေဝ် သွက်ညးဍုၚ်ကွာန်တံ ဖဵုဟွံမွဲပုဟ်ဂှ် ညးလ္တူဍုၚ်တံ ပါ်ပါဲလဝ်ရ။
ပ္ဍဲလ္တူဍုၚ်မတ်မလီုဂှ် ဗွဲကြဴဒပ်ပၞာန်သီအဝဵုတုဲ မ္ၚးနူပရေၚ်အာကၠုၚ်ချဳဒရာၚ် ညးဍုၚ်ကွာန်တံဂှ် သွက်ဂွံဗက်ဒၞါဲဇိုၚ် ပွမကၠတ်ပၠံၚ်ၜးတံဂးတုဲ စုတ်ကၠုၚ်လဝ် ကေမ္မရာ CCTV တံ လ္တူဍုၚ်ပြးဇးဒၟံၚ်ရ။
ဆ္ဂး အပ္ဍဲကာလဒပ်ပၞာန်သီအဝဵုဂှ် အရာပ်လ္တူဍုၚ်ဗွဲမဂၠိုၚ် အရိုဟ်ဒဒှ်တ္ၚဲ ဒးဒုၚ်ကၠတ်ဒၟံၚ်ကွဳလိုန်ဓာတ်တံ၊ ဒးဒုၚ်ဖံက်ပလီုကၠတ်ဂၠံက်တံ ကေုာံ ဒးဒုၚ်ပၠံၚ်ၜးတံ က္တဵုဒှ်ဒၟံၚ်ကီုလေဝ် လ္ပာ်ကံၚ်ဇြဳပၞာန် ကေတ်အရေဝ်ထ္မံက်ပ္တိတ်မာန်ဂှ် စဵုကဵုဟွံမွဲ အောန်ဒၟံၚ်ရ။
စကာသြန်ဘဏ္ဍာ ညးဍုၚ်ကွာန်တံတုဲ စုတ်လဝ် ကေမ္မရာ CCTV တံကီုလေဝ် ကပေါတ်ကညောတ် ပိုန်ဒြပ်ညးဍုၚ်ကွာန်တံ ဒးဒုၚ်ကၠတ်ဂၠံက်တံဂှ် ဂၠါဲထ္မံက်ပ္တိတ်မာန် ဟွံမွဲဂှ်ရ သွက်ညးဍုၚ်ကွာန်တံဂှ် ဖဵုဟွံမွဲမွဲသာ် ပွမဒးဂိဇီုကပိုက်တံဟေၚ် က္တဵုဒှ်ဒၟံၚ်ဂှ် ညးဍုၚ်မတ်မလီုမွဲတၠ ဟီုရ။
“သွက် CCTV ဏံဂှ် ညးဍုၚ်ကွာန်တံ ဒးဒုၚ်ဖအိုတ်လဝ်သၠုဲ တၟာဂလိုၚ်ကီုလေဝ် ဍာံဍာံဂှ် CCTV တံဏံ ဒှ်ကၠုၚ်မးမးအိုတ်ရ၊ သြန်သၠုဲညးဍုၚ်ကွာန်တံ ဒးဆောံလေၚ်အာ တၟာဂလိုၚ်ရ၊ ဒးဂိအာသၟးရ၊ ပ္ဍဲမတ်မလီုဂှ်တှ်ေ CCTV ဂၠိုၚ်ဒၟံၚ် ကြပ်အလုံမွဲဍုၚ်ရ၊ ဆ္ဂး ကွဳလိုန်ဓာတ်တံ မုတံကၠေံဟီုမ္ဂး ဟွံကလေၚ်ဂွံပုဟ်ဟီုဂှ် ဗၠာဲသၟိၚ်တံ ဟွံကၠောန်ကလောန်ရဏောၚ်၊ ဍေံတံ ကၠောန်ကမၠောန်ခိုဟ်ဟ်မ္ဂး ဟွံကလေၚ်ဂွံဂှ် စွံလဝ်ကၠာ သွက်ဂွံကၠေံဂှ် ဟွံမွဲပုဟ်၊ ဍေံတံ သုၚ်စောဲဟွံဂွံတုဲ ဒှ်အာရ၊ ဗၠာဲသၟိၚ်တံဂှ် သွက်ဍေံတံရ ဍေံတံသုၚ်စောဲ၊ သုၚ်စောဲ သွက်ညးဍုၚ်ကွာန်တံဟီုဂှ် ဟွံမွဲပုဟ်၊ အေဂှ်တှ်ေ ညးဍုၚ်ကွာန်တံရ ဒးဂိဏောၚ်” သာ်ဝွံ သ္ဂးရ။
ကံၚ်ဇြဳပၞာန်ဝွံ ကေမ္မရာ CCTV မစုတ်လဝ်တံဂှ် ဟွံစကာ သွက်ညးဍုၚ်ကွာန်တံမွဲသာ် စွံအဓိကကဵု သွက်ပရေၚ်ဂီုကၠီုဍေံတံဓဝ်တုဲ သုၚ်စောဲဒၟံၚ်ဂှ်ရ နကဵုညးဍုၚ်ကွာန်တံ ကပေါတ်ကညောတ်ဒြပ်ရတ်ဇကုဇကုတံဂှ် အလဵုဇကုဒးမၚ်မွဲထိၚ်ဒဝ်ဒၟံၚ်ရောၚ် သ္ဂးရ။
အလုံဍုၚ်မွဲဂှ် ၜိုန်ရစုတ်လဝ် ကေမ္မရာ CCTV တံကီုလေဝ် ကြပ်အရိုဟ်တ္ၚဲ ကွဳလိုန်ဓာတ် ကၠေံခၞၚ်တံ က္တဵုဒှ်ဒၟံၚ်တုဲ ဟိုတ်နူကၠေံခၞၚ်ဒၟံၚ် သာ်ဏံဂှ်ရ ၜိုန်ရတေၚ်ကဵု ဗ္ဒိုပ်ဗၠာဲသၟိၚ် သၟဝ်တဲကံၚ်ဇြဳပၞာန်တံကီုလေဝ် မုမှဟွံတၟေၚ်ကၠုၚ်ပုဟ်ဂှ် ညးဍုၚ်ကွာန်ဒးဒုၚ်ကၠတ်ကွဳလိုန်ဓာတ်မွဲတၠ ဟီုရ။
“အတိုၚ်အကာဲအရာလၟုဟ်ရမ္ဂး ပရေၚ်ပိုန်ဒြပ်ဂှ် ဟွံခိုဟ်အိုတ်တုဲ မၞိဟ်တံဂှ်လေဝ် ဗက်ကၠောန်ဒးမံၚ်ပြးဇးရ၊ ကွဳလိုန်ဓာတ်ဟီုမ္ဂး မွဲတ္ၚဲ (၂) ဖ္ဍိုက် (၁) ဖ္ဍိုက် ကၠေံဒၟံၚ်၊ အေဗီုဏံလေဝ် နွံ၊ ဟွံကၠေံပုဟ် ထေၚ်တုဲ စွံဏာအတိုၚ်ဏံ၊ သတိဗလးအာ သာ်ဏံတုဲမ္ဂး မၞိဟ်ကၠတ်ဂှ်တှ်ေ မၚ်ကျောဝ်ဒၟံၚ်တုဲ ကၠတ်ဏာဟဂှ်ရ၊ အေဗီုဏံ ကွဳလိုန်ဓာတ်ကၠေံတံ မုတံဟီုတှ်ေ ဇကုဂှ် ဟွံစွံသတိပုဟ်လေဝ်၊ CCTV ဂှ်လေဝ် လက္ကရဴဏံမှ ကလေၚ်ဆဵုတှ်ေ ဖဵုဟွံမွဲပုဟ်၊ တေၚ်ကဵုဗၠာဲသၟိၚ်လေဝ် မုမှဟွံတၟေၚ်ကၠုၚ်ပုဟ်၊ ပရိုၚ်ရဂှ် ဟွံဂွံပုဟ်” သာ်ဝွံ သ္ဂးရ။
ကေမ္မရာ CCTV မစုတ်လဝ် လ္တူဍုၚ်မတ်မလီုတံဂှ်ဝွံ ကေမ္မရာသမ္တီမၞိဟ်တံမာန်လေဝ် ပါလုပ်တုဲ ကေမ္မရာ ဗှ်ဂၞန်ကွဳစက်ကာ ဂွံတံသၟးဟွံက ကေမ္မရာ ဂေတ်ကျောဝ် (၃၆၀) ဂွံတံ ကေုာံ ကေမ္မရာ ကေတ်စၟတ်သမ္တီမာန်တံ ပါလုပ်တုဲ ပၟတ်ပိုတ်အာမ္ဂးလေဝ် နူကဵုသေန်တာထိၚ်ဒဝ်တံဂှ် မၚ်ကျောဝ် (၂၄) နာဍဳမာန်ရ။
ဟိုတ်နူစုတ်လဝ် ကေမ္မရာ CCTV တံ လ္တူဍုၚ်ပြးဇး ဒၞါဲသှ်ေဟွံမွဲဂှ်ရ ဂၠံၚ်လုပ်ဂၠံၚ်တိတ် မၞိဟ်ကၠတ်ဂၠံက်ပၠံၚ်ၜးတံဂှ် နကဵုကောန်ဒပ်ဗၠာဲသၟိၚ် သၟဝ်တဲကံၚ်ဇြဳပၞာန်တံ တီမာန်ကီုလေဝ် ဒဵုကဵုအခိၚ်လၟုဟ် ရပ်ဂွံလဝ်တံ ဟွံမွဲဂှ်ရ ဒှ်ဒၟံၚ်သွက်ဂွံဒးပ္တိတ်သၟာန်ရဂှ် ညးဒေသတံ ဟီုရ။
သွက်ကိုန်အစဳဇန် စုတ်ကေမ္မရာ CCTV တံဂှ် တုဲကၠုၚ်အပ္ဍဲသၞာံဘဏ္ဍာ (၂) သၞာံဂှ် သုၚ်စောဲလဝ် အပံၚ်ကိုဋ်သြန် ဟွံအောန်နူကဵု (၈,၀၀၀၀) တုဲ ကမ္ပဏဳ (နောၚ်ရိုး) ကေုာံ ကမ္ပဏဳ FISCA မစုက်လုက်ကဵု ကံၚ်ဇြဳပၞာန်တံ ဂွံလဝ်တိန်ဒါ ကုကိုန်အစဳဇန်ဂှ်တုဲ ရေၚ်တၠုၚ်လဝ်ရ။
ပရိုၚ်−သြၚ်လောန်တိုၚ်(မ်)