နေဗျဳဒဝ်၊ မာတ် ၂၈
ပေါဲသဳကၠဳပရေၚ်ၜိုဟ်လလမ် ကံၚ်ဇြဳပၞာန်သီအဝဵု သ္ကိုပ်သ္ကကၠောန်ဗဒှ်လဝ် ပ္ဍဲနေဗျဳဒဝ်ဂှ်ဝွံ သွက်ပရေၚ်ၜိုဟ်လလမ် ဂွံတန်တဴဗွဲမလအ်လဂှ် ဒှ်အထံက်အရီုတၟာဂလိုၚ်ရောၚ် နာဲအံၚ်မ္ၚဵု ကေၚ်ကာဗဟဵု ဗော်ဍုၚ်မန်တၟိ ဟီုရ။
ကံၚ်ဇြဳပၞာန်သီအဝဵုဝွံ အကြာအကာဲအရာပရေၚ်ဍုၚ်ကွာန် ဟွံညိၚ်ဝတ်ဂှ် နူဂိတုမာတ် ၂၄ စဵုကဵု ၂၆ ဂှ် ကၠောန်ဗဒှ်လဝ်ပေါဲသဳကၠဳ ပ္ဍဲနေဗျဳဒဝ် နကဵုက္ဍိုပ်လိက်ပေါဲသဳကၠဳပရေၚ်ၜိုဟ်လလမ်ရ။
ကြဴနူပေါဲသဳကၠဳဏံတုဲဂှ် နာဲအံၚ်မ္ၚဵုဂှ်တှ်ေ ပေါဲသဳကၠဳပွိုၚ်ပိတ္ၚဲဏံဂှ်ဝွံ ဒှ်အထံက်အရီု သွက်ပရေၚ်ၜိုဟ်လလမ် တၟာဂလိုၚ်တုဲ သွက်ပရေၚ်ၜိုဟ်လလမ် ဂွံတန်တဴဗွဲမဗိုန်ခိုၚ်ဂှ်လေဝ် ဒှ်အထံက်အရီုတၟာဂလိုၚ်ရောၚ် ပရိုၚ်မဳဒဳယျာတြးဝါဒ ကံၚ်ဇြဳပၞာန်တံ သၟာန်ကၠုၚ်လဝ်ဂှ် ကလေၚ်သှ်ကဵုလဝ်ရ။
သ္အာၚ်နူဂှ်ပၠန် ပရေၚ်ၜိုဟ်လလမ်၊ ပရေၚ်ညိၚ်ဝတ် ကေုာံ ပရေၚ်ဖောအ်ဗြေဝ်တံဂှ်ဝွံ မွဲကုမွဲ ဆက်စပ်ဒၟံၚ်ညးသ္ကအ်တုဲ စပ်ကဵုဂွံတိုန်စိုပ်ပေါဲသဳကၠဳပွိုၚ်ပိတ္ၚဲဂှ်တုဲ သွက်ညးတံ ဒှ်အထံက်အရီုတၟာဂလိုၚ်တုဲ တၚ်နၚ်ဂွံတီကေတ် နူပေါဲသဳကၠဳတံဂှ်လေဝ် ကလေၚ်ပါ်ပရအ်အာကဵု ညးဍုၚ်ကွာန်တံကဵု ဗော်မ္ဂး ဒှ်ဂုန်ဖဵုဂၠိုၚ်ဏောၚ်ဂှ် ဟီုဂးလဝ်ရ။
နာဲဂံၚ်သကာ ညးမၞုံအခေါၚ်ဟီုဂး ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD ဂှ်တှ်ေ ဗော်ဍုၚ်မန်တၟိ တိုန်စိုပ်လဝ် ပေါဲသဳကၠဳနေဗျဳဒဝ်ဂှ်ဝွံ ဝးပ္ကဝ်လဝ် တၚ်သ္ဂုတ်သွာတ်ကောံဓရီုဗော် မရနုက်ကဵု ၁၁ ဝါဂှ်ရောၚ် ပါ်ပါဲလဝ်ရ။
ကံၚ်ဇြဳပၞာန်ဂှ်တှ်ေ ဟိုတ်သ္ဂောံကၠောန်ဝိုၚ်တက်ကျာပရေၚ်ၜိုဟ်လလမ်ဂှ်ဝွံ ရန်ကဵုတၠပညာ၊ တၠကွတ်ပညာ၊ ညးမဒယှ်တှ် နူကဵုကဏ္ဍနာနာတံ ဂွံစွံအာရီု ပါလုပ်ရေၚ်တၠုၚ်ကၠုၚ် ပ္ဍဲကဵုလၟေၚ်ကမၠောန်ပရေၚ်ၜိုဟ်လလမ်တံမာန်ဏောၚ်ဂှ် သ္ဂးလဝ်ရ။
ပေါဲသဳကၠဳပရေၚ်ၜိုဟ်လလမ် ကံၚ်ဇြဳပၞာန် ကၠောန်ဗဒှ်ဂှ်တှ်ေ ကမ္မတဳပ္ညဳပ္ညပ်ထ္မံက်ရုပ်ရဴပရေၚ်ၜိုဟ်လလမ် ကေုာံ ပရေၚ်ညဳသၟဟ်ဂကူ ၊ ညးစၞး JMC ၊ ဗော်ပရေၚ်ဍုၚ်ကွာန်ဂမၠိုၚ်၊ ဂကောံရပ်လွဟ်ကောန်ဍုၚ်အရၚ် ထ္ပက်လဝ်စၟတ်တဲ NCA တံ ကေုာံ ညးကော်ဘိက်လဝ်ဂမၠိုၚ် တိုန်စိုပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−MOI