မတ်မလီု၊ ဨပရဴ ၁
ညးဍုၚ်ကွာန် ဒးဘဲတိချဳဂမၠိုၚ် ဂွံဂွံအရီုဗၚ်ဂှ် ပၟိက်ဇၞော်ဗွဲမလောန်တုဲ အရီုဗၚ်နူညးဍုၚ်ကွာန် ဂွံစိုပ်ဇရေၚ်ညးဍုၚ်ကွာန်တံဂှ် ပ္တိတ်ဇြဟတ်ရေၚ်တၠုၚ်ဒၟံၚ်ရောၚ် ကံၚ်ဇြဳဖေဝ်ဒရာဍုၚ်မန် လလောၚ်ပ္တိတ်ကဵုလဝ်သမ္တီ ပ္ဍဲဂိတုမာတ် ၃၁ တေံရ။
ဟိုတ်နူကသဳတိသက်ကိုၚ် ပ္ဍဲဂိတုမာတ် ၂၈ တေံဂှ်တုဲ ပ္ဍဲရးသက်ကိုၚ်၊ ရးမာန္တလေဝ် ကေုာံ တွဵုရးသေံတံဂှ် မၞိဟ်ချိုတ်အာ နွံကၠုၚ်ပွဳပွူ ၂၀၀၀ တုဲ ညးဍုၚ်ကွာန်ဂၠိုၚ်ကဵုပြကောဋိကိုဋ် ဒးဒှ်လဝ်ဒဒိုက်အိုတ်ရ။
နကဵုညးဍုၚ်ကွာန်ဂမၠိုၚ် ပါဲနူဘဲတိချဳဂှ် ပဋိပက္ခပရေၚ်ပၞာန်တံဂှ်လေဝ် ဒးဒုၚ်ဒၟံၚ်ဖိုဟ်တုဲ ဒပ်ပၞာန်ကျာကံၚ်ဇြဳပၞာန်ဂှ်လေဝ် ပ္ဍဲဒေသလ္ၚဵုတံဂှ် ထောံမခတိုဟ်ဗ္တိုက်ဒၟံၚ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး ကံၚ်ဇြဳဖေဝ်ဒရာဍုၚ်မန် MSFC ရ။
ပ္ဍဲအကာဲအရာမက္တဵုဒှ်ဒၟံၚ်သာ်ဏံဂှ် ညးဍုၚ်ကွာန်ဒးဘဲတိချဳဂမၠိုၚ် နွံပၟိက်ဒၟံၚ်ကဵု ဒၞါဲမံၚ်စံၚ် ဇွောံမစၞစ ဍာ်သုၚ်ဍာ်ရပ် ကေုာံ ဂဥုဲဇဗတံ ဇၞော်ကဵုဇြဟတ်တုဲ ပ္ဍဲကဵုဏံ ညးအာယုက်ဇၞော်ဇၞော်၊ ညးဗြဴမၞုံကဵုဒၟုၚ်ဒၠေၚ် ကေုာံ ကောန်ၚာ်သၟတ် ဗွဲမဂၠိုၚ်ဂၠေၚ် နွံဒၟံၚ်ရ။
အခိၚ်လၟုဟ် နကဵုကံၚ်ဇြဳဖေဝ်ဒရာဍုၚ်မန် အရီုဗၚ်ညးဍုၚ်ကွာန်ဂမၠိုၚ် ညံၚ်ဟွံဂွံစိုပ်တဲကံၚ်ဇြဳပၞာန်တံဂှ် ပၟိက်ဇၞော်လောန်တုဲ အရီုဗၚ်ညးဍုၚ်ကွာန် ဂွံစိုပ်ဇရေၚ်ညးဍုၚ်ကွာန်တံဂှ် ဂ္စါန်ဒၟံၚ်ရောၚ် သ္ဂးရ။
ဟိုတ်ဂှ်ရ ညးဍုၚ်ကွာန် ဇာတိတွဵုရးဍုၚ်မန် စိုပ်မံၚ်ဍုၚ်သ္အာၚ်တံကီု၊ ညးဍုၚ်ကွာန်အပ္ဍဲတွဵုရးဍုၚ်မန်တံကီု ယဝ်မိက်ဂွံကဵုဒါန်မ္ဂး ကေတ်အဆက် ကုဌာနဟံၚ်ပြာ် MSFC နူကဵု Signal ကေုာံ အဳမေတံမာန်ဂှ် ကဵုလဝ်သမ္တီရ။
အရီုဗၚ်ဂမၠိုၚ် ညံၚ်ဂွံစိုပ်စဵုကဵုညးဇီုကပိုက်ဒးဘဲဒဏ်တိချဳတံဂှ် ရေၚ်တၠုၚ်အာဏောၚ်တုဲ ကေတ်အဆက် ကုဂၞန် Signal +၆၆၆၅၃၈၂၈၂၈၅ ကေုာံ အဳမေ [msfc.hotline@gmail.com] တံမာန်ဂှ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ