ဍာ်ဗု၊ ဨပရဴ ၁
ကွာန်နွံပွဳပွူ ဗ္ဒါဲအပိုၚ်အခြာဒေသပရေၚ်ပိုန်ဒြပ်တၟေၚ်−ထဝါဲ ပွိုၚ်ဍုၚ်ဍာ်ဗု ရးတၞၚ်သဳဂှ် လ္ပာ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန် နကဵုဇြဟတ်ဒပ် ၉၀၀ ပြၚ်ရောၚ် ဂွံတီကေတ် ဇရေၚ်ဒပ်ပၠန်ဂတးတံရ။
ဒပ်ကံၚ်ဇြဳပၞာန်ဝွံ စနူဂိတုမာတ် ၂၉ တုဲကၠုၚ်တေံတုဲ လုပ်စိုပ်ထ္ပက်ကၠုၚ်ကရောၚ်ပၞာန် ပ္ဍဲကဵုကွာန်(စခန်းကြီး) မဒှ်ကွာန်နွံပွဳပွူအပိုၚ်အခြာဒေသပရေၚ်ပိုန်ဒြပ်တၟေၚ်ထဝါဲဂှ်တုဲ ပွဳပွူမံၚ်မကာန်ဂှ်လေဝ် ထပ်တြးလဝ် ဇြဟတ် ၜိုတ် ၁၀၀ ပြၚ်ရ။
ပ္ဍဲဂိတုမာတ် ၃၁ တေံဂှ်လေဝ် နူကွာန်(ကံပေါက်) ကံၚ်ဇြဳပၞာန် ထပ်လုပ်စိုပ်ကၠုၚ် လ္ပာ်ကွာန်ဇြာဒဳ နကဵုဇြဟတ်ဒပ် ၜိုတ် ၃၀၀ ပြၚ်ဂှ်တုဲ ပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်ရ။
ကရောၚ်ပၞာန်ဒပ်ကံၚ်ဇြဳပၞာန် လုပ်စိုပ်ကၠုၚ်ဂှ်ဝွံ သွက်ဂွံၚးတးတိဍာ် ပွဳပွူဒေသပရေၚ်ပိုန်ဒြပ်တၟေၚ်ထဝါဲဂှ် ဒှ်မာန်ရောၚ် ညးတာလျိုၚ် ဒပ်စဵုဒၞါဖျေံသ္ဇိုၚ်ဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူဒပ်ကံၚ်ဇြဳပၞာန် ထ္ပက်ကရောၚ်ပၞာန်လုပ်စိုပ်ကၠုၚ်တုဲ ပ္ဍဲကဵုဒေသ (ပယ၊ ခွေးမဖော၊ ခေါၚ်ပြန်၊ ဒိုက်တကော်၊ ခရၚ်းချောၚ်း ကေုာံ နဘုလယ်) တံ ပေါဲဗ္တိုက်ဇၞော်ဒှ်ကၠုၚ်ဂှ်ဂွိၚ်ဒၟံၚ်တုဲ ညးဒေသဂၠိုၚ်ကဵုလ္ၚီ ထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ်ရ။
အတိုၚ်ဂလာန် ညးဒေသတံဂှ်မ္ဂး ဒေသကရောၚ်ပၞာန်ဒပ်ကံၚ်ဇြဳပၞာန် လုပ်စိုပ်ကၠုၚ်တံဂှ် ထပိုတ်လဝ် သီုလာၚ်ဖုၚ်၊ လာၚ်အေန်တာနိတ်တံရောၚ် သ္ဂးအိုတ်ရ။
တုဲကၠုၚ် ပ္ဍဲဂိတုမာတ် ၂၄ ကဵု ၂၅ တေံဂှ်လေဝ် မွဲဒမြိပ်ကွာန်(လဲရှောၚ်) ဗ္ဒါဲဒေသပရေၚ်ပိုန်ဒြပ်တၟေၚ်ထဝါဲဂှ် ပေါဲဗ္တိုက်တံ က္တဵုဒှ်လဝ်တုဲ ၜါလ္ပာ်ဇီုကပိုက်ချိုတ်အာတံလေဝ် နွံလဝ်ရ။
ကြဴနူဍုၚ်ရုယှာ ဂွံတၚ်တုပ်စိုတ် သ္ဂောံဓလိုက်တမ်ရိုဟ် ပ္ဍဲကဵုဒေသပရေၚ်ပိုန်ဒြပ်ထဝါဲတုဲဂှ် ကံၚ်ဇြဳပၞာန်ဝွံ သုၚ်စောဲဇြဟတ်တုဲ သွက်ဂွံထ္ပက်ကၠုၚ်ပၞာန် ကုဒပ်စဵုဒၞါညးဍုၚ်ကွာန် နွံပ္ဍဲဒေသတံဏံဂှ် ပ္တိတ်ကၠုၚ်ဇြဟတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ