မတ်မလီု၊ ဨပရဴ ၁
ပ္ဍဲကဵုကၟိန်ဍုၚ်ဗၟာ ဒၞါဲဒေသ ၆ အခိၚ်ဒးမံၚ်ဘဲဒဏ်တိချဳ ဗွဲမသ္ကာတ်မြဟ်ဂှ် ပ္ဍဲတွဵုရးဍုၚ်မန် သွက်ဂွံကၠောန်ဗဒှ်သ္ဘၚ်အတး မိပ်ပ်ဂှ် လ္ပာ်ကံၚ်ဇြဳပၞာန် ဒစးဒုၚ်ပလေဝ်ပလေတ်ဒၟံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ဂ။
ကံၚ်ဇြဳပၞာန်တွဵုရးဍုၚ်မန်ဝွံ ညံၚ်သ္ဘၚ်အတးဂွံမိပ်ဂှ် စသိုၚ်ဒၟံၚ်ကၞာထးဗဟဵု ပ္ဍဲဂၠံၚ်ဇိုၚ်ၜဳ ဍုၚ်မတ်မလီုဂှ်တုဲ ကၞာထးဆေၚ်စပ်ကဵုဌာနလ္ၚဵုတံဂှ်လေဝ် သွက်ဂွံသိုၚ်ခၞံဂှ် ပလေဝ်ပလေတ်ဒၟံၚ်ရ။
အပ္ဍဲဒေသဂှ်တှ်ေ ဂကောံပရဟိတလ္ၚဵုတံကဵု သၟတ်လ္ၚဵုတံ သွက်ဂွံကဵုဒါန် ကုဒေသဒးဘဲဒဏ်တိချဳတံဂှ် ဗက်ဒုၚ်ဒၟံၚ်ဒါန်တံ နွံကီုလေဝ် ကံၚ်ဇြဳပၞာန်ဂှ်တှ်ေ ကဵုက္ဍိုပ်ကဵုပေါဲသ္ဘၚ်တုဲ ကၠောန်ဒၟံၚ်ရ။
ညးဒေသမတ်မလီုမွဲတၠဂှ်တှ်ေ ကံၚ်ဇြဳပၞာန် ညံၚ်သ္ဘၚ်အတးဂွံမိပ်စဳအာဂှ် သိုၚ်ဒၟံၚ်ကၞာထးဗဟဵု ပ္ဍဲဍုၚ်မတ်မလီုတုဲ မွဲလ္ပာ်ဂှ်တှ်ေ ချိုတ်ဒၟံၚ်နွံကီုလေဝ် ဟိုတ်နူကၠောန်ဒၟံၚ်ပေါဲသ္ဘၚ်သာ်ဏံဂှ်တုဲ ဒးညှာစိုတ်ကဵုဒေသတၞဟ်ဟ်တံဂှ်ရောၚ် သာ်ဝွံ ပါ်ပါဲလဝ်ရ။
“ကၞာထးဗဟဵုဂှ်တှ်ေ သိုၚ်ဂှ်သိုၚ်ဒၟံၚ်ယျ။ ဍေံတံဂှ်တှ်ေ ဗီုလဵုဒှ်ဒှ် အကာဲအရာသာ်လဵုဒှ်ဒှ် ပေါဲသ္ဘၚ်မိပ်တံဏံဂှ်တှ်ေ ကၠောန်မံၚ်ဟဂှ်ရဏောၚ်။ ဒှ်ဒၟံၚ်ဒဵုကဆံၚ်ဏံကီုလေဝ် ဍေံတံ ဂွံမိပ်သ္ဘၚ်အတးဂှ် နူလၟုဟ် သိုၚ်ဒၟံၚ်ကၞာထးတံဂှ်တှ်ေ ဍေံဟွံခိုဟ်ပုဟ်။ မွဲလ္ပာ်ဂှ်ပၠန် မၞိဟ်ဂမၠိုၚ် ချိုတ်ဒၟံၚ်တုဲ ၜိုတ်ပ္ဍဲတွဵုရးဍုၚ်မန်ပိုယ်မွဲရ ဒၞါဲလဵုရံၚ်ၚ် ပေါဲသ္ဘၚ်တံဆက်ဒၟံၚ်တုဲ ဒးညှာစိုတ်ကဵုညးတၞဟ်ရ” သာ်ဝွံ ဟီုရ။
သ္အာၚ်နူဂှ်ပၠန် ဟိုတ်နူဘဲဒဏ်တိချဳတုဲ နဗ္ၜတ်အလုုံဍုၚ်မွဲ ပရေၚ်လီုလာ်ဆောံလေၚ်ဂၠိုၚ်ဒၟံၚ်တုဲ အခိၚ်ပရေၚ်ဒးချိုတ်တံ သၠုၚ်တိုန်ဒၟံၚ်ဂှ် နကဵုတွဵုရးဍုၚ်မန် ကၠောန်ဒၟံၚ်ဗီုပြၚ်ၜိုဟ်သြိုဟ်ဒၟံၚ်ဂှ်ဝွံ ဒှ်ဟွံထေက်တုဲ သၟတ်တံလေဝ် ဟိုတ်နူဘဲတိချဳဂှ်တုဲ စိုတ်လုပ်စအာ ပ္ဍဲသ္ဘၚ်အတးတံဏံဟွံသေၚ်ပုဟ်ဂှ် ညးဆက်ဟီုရ။
ညးဒေသမတ်မလီုမွဲတၠပၠန်ဂှ်လေဝ် ကံၚ်ဇြဳပၞာန်ဝွံ မ္ၚးနူကဵုသ္ဘၚ်အတးဂှ် ပေါဲသ္ဘၚ်တၞဟ်ဟ်တံဂှ်လေဝ် ကၠောန်ဒၟံၚ်အဆက်က်တုဲ အခိၚ်ညးဍုၚ်ကွာန်တံ မိပ်ဟွံမာန်ဒှ်ဒၟံၚ်ဂှ် ကၠောန်ဒၟံၚ်ညံၚ်သ္ဘၚ်အတးဂွံမိပ်ဂှ်ဝွံ ဟွံမွဲကဵုစိုတ်ဗ္စာရဏာရောၚ် ပါ်ပါဲလဝ်ရ။
“အတးမွဲဓဝ်ဟွံသေၚ်ပုဟ်။ ပေါဲသ္ဘၚ်ဂှ် ဟွံပိုတ်ပုဟ်။ ပ္ဍဲကဵုပိုယ်ဂှ်တှ်ေ လ္ပဟီုရ။ ပ္ဍဲတွဵုရးဍုၚ်မန်ဂှ်တှ်ေ ပေါဲသ္ဘၚ်ဂၠိုၚ်လောန်။ ဒးဟီုတပ်ပ်မ္ဂး အခိၚ်မိပ်ဟွံမာန်ဒှ်ဒၟံၚ်ဂှ် ဍေံတံ ကၠောန်ဒၟံၚ်ဗီုဏံလၟိုန်ရဏောၚ်။ ဒးဟီုမ္ဂး သိုၚ်ကၞာထးပ္ဍဲအတးဏံတုဲ သြန်ဒးအိုတ်လဝ်ဂှ် မုဂုန်ဖဵုဟွံမွဲပုဟ်။ သီုကဵုဒှ်အာ စိုတ်ဗ္စာရဏာဟွံမွဲ။ ဂမြၚ်ညာန်စၚ်ခြၚ်လေပ်တံ ဟွံမွဲလေဝ် ဟီုဂွံရ” သာ်ဝွံ သ္ဂးရ။
အခိၚ်ညးဍုၚ်ကွာန်တံ ဒးဂဗဒၟံၚ်ကဵုဘဲနာနာသာ်ဂှ် နကဵုကံၚ်ဇြဳပၞာန်တွဵုရးဍုၚ်မန် ကဵုက္ဍိုပ်ကဵုပေါဲသ္ဘၚ်တုဲ ကၠောန်ဒၟံၚ်ဂှ်ဝွံ စိုတ်ဗ္စာရဏာဟွံမွဲ ဒှ်တုဲ ပရေၚ်ဆာန်ဍူလ္တူမၞိဟ်တံလေဝ် ဟွံမွဲဒှ်ဂှ် ညးဆက်ဟီုရ။
မွဲလ္ပာ်ဂှ်ပၠန် ဥူအံၚ်ကျဳတုၚ် သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန်ခါန်ကၞက်လဝ်ဂှ်ဝွံ သ္ဘၚ်အတးအပ္ဍဲတွဵုရးဍုၚ်မန်ဏံဂှ် ကၠောန်ဗဒှ်အာမိပ်ပ်ဏောၚ် တုဲကၠုၚ်ဂိတုမာတ် ၂၅ တေံ ဟီုကၠုၚ်လဝ် ပ္ဍဲကောံဓရီုပ္ညဳပ္ညပ်ကမၠောန် သွက်သ္ဂောံကၠောန်ဗဒှ်သ္ဘၚ်အတး ဗွဲမအံၚ်ဇၞး မကၠောန်ဗဒှ်လဝ် ပ္ဍဲရုၚ်အလဵုအသဳတွဵုရးဂှ်ရ။
သ္အာၚ်နူဂှ်ပၠန် ညံၚ်သ္ဘၚ်အတးဂွံမိပ်ဂှ် ပ္ဍဲဍုၚ်မတ်မလီု ကဵုကၠောန်စုတ်လဝ် သၚ်္ကြာန်တွာ်တုဲ ညံၚ်သ္ဘၚ်အတးဂွံကၠောန်ဗဒှ်ဗွဲမအံၚ်ဇၞးမာန်ဂှ်လေဝ် ဒက်လဝ်ကမ္မတဳကမၠောန် ၁၅ သာ်တုဲ ကဵုလဝ်တာလျိုၚ်ရောၚ် သ္ဂးရ။
ပ္ဍဲတွဵုရးဍုၚ်မန်ဂှ်တှ်ေ တုဲကၠုၚ်ဂိတုမာတ် ၂၈ အခိၚ်လဒေါဝ်တ္ၚဲဂှ် တိချဳအာလဝ် ဇၞော်ကဵုဇြဟတ်တုဲ လၟိဟ်မၞိဟ်ဂၠိုၚ်ကဵုလ္ၚီ ဒးချိုတ်အာလဝ်တုဲ ပရေၚ်ဇီုကပိုက်လီုလာ်ဆောံလေၚ်တံလေဝ် ဂၠိုၚ်လဝ်တုဲ ဒဵုကဵုအခိၚ်လၟုဟ် ဒးဆက်ကၠောန်ဒၟံၚ် ပရေၚ်ရီုဗၚ်ဟံၚ်ပြာ်တံဖိုဟ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ
ဗီု− ဗီုတြေံ