YPDF ကေုာံ ကံၚ်ဇြဳဖေဝ်ဒရာဍုၚ်မန် သွက်ဂွံဗ္တိုက်သရိုဟ်သၞောတ်တၠအဝဵုပၞာန်ဂှ် ပံၚ်တောဲအာ ပရေၚ်ဍုၚ်ကွာန် ပရေၚ်ပၞာန်ဏောၚ်

ရေဝ်၊ ဨပရဴ ၁

သွက်ဂွံလုပ်ပေါဲဗ္တိုက်ပၠန်ဂတးအာ ကံၚ်ဇြဳပၞာန်ကီု သီုဒဵုကဵုသၞောတ်တၠအဝဵုပၞာန် ရိုဟ်ကၞက်ဂွံပိုတ်အာဂှ် ကံၚ်ဇြဳဖေဝ်ဒရာဍုၚ်မန် MSFC ကဵု ဒပ်စဵုဒၞါညးဍုၚ်ကွာန်ရေဝ် YPDF တံ ပတွဵုနူဂိတုမာတ် ၃၁ တုဲ ပံၚ်တောဲအာဂှ် သီုၜါလ္ပာ် ပံၚ်တောဲလလောၚ်တြးလဝ်ရ။

နူအခိၚ်ပၠန်ဂတးက္ညၚ်စတေံဂှ်လေဝ် နကဵုဒပ်စဵုဒၞါညးဍုၚ်ကွာန်ရေဝ် YPDF သၟဝ်သ္ကိုပ်သ္ကဗိုလ်ယာန်နာၚ်ဂှ်ကဵု ကံၚ်ဇြဳဖေဝ်ဒရာဍုၚ်မန် တုပ်လဝ်စိုတ် သွက်ဂွံပံၚ်တောဲကၠောန်အာ ပ္ဍဲပရေၚ်ဍုၚ်ကွာန် ပရေၚ်ပၞာန်ရ။

ပရေၚ်ပံၚ်တောဲရေၚ်တၠုၚ်ဏံဂှ် YPDF ပါလုပ်အာ ပ္ဍဲကံၚ်ဇြဳဖေဝ်ဒရာဍုၚ်မန် နဒဒှ်မွဲဂကောံဏောၚ်တုဲ လုပ်ပေါဲဗ္တိုက်ပၠန်ဂတးအာ ကုကံၚ်ဇြဳပၞာန်သီအဝဵု ကေုာံ စဵုကဵုသၞောတ်တၠအဝဵုပၞာန် ရိုဟ်ကၞက်ဂွံပိုတ်ဏောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF နွံသၟဝ်ဌာနကာစဵုဒၞါ ကံၚ်ဇြဳဖေဝ်ဒရာဍုၚ်မန်ဂှ် သၟဝ်တိဏံလေဝ် ပံၚ်တောဲလုပ်လဝ်ပေါဲဗ္တိုက်တုဲယျတုဲ လ္ပာ်ပရေၚ်ဍုၚ်ကွာန်လေဝ် ဂွံဆက်ပံၚ်ကၠောန်အာမာန်ဂှ် ပံၚ်တောဲကၠုၚ်သာ်ဏံရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ ဂွံပလှ်ဖျေံကံၚ်ဇြဳပၞာန်ပကီုပရာပ်ဂှ်ကဵု ဂွံသိုၚ်ခၞံကၟိန်ဍုၚ်ပံၚ်ကောံဖေဝ်ဒရာဍာံဇေတ်ဂှ် တၚ်ပ္တဝ်က္ဍိုပ် တၚ်ရန်တၟံတုပ်တုဲ နူကဵု YPDF ပံၚ်တောဲပါလုပ် ကၠောန်ကၠုၚ်ကရောံ MSFC သာ်ဏံရ။ ပံၚ်တောဲကဵု ဒပ်ပၠန်ဂတးဍုၚ်မန် MSRF နွံသၟဝ်ဌာနကာစဵုဒၞါ MSFC DoD ဂှ်တုဲ လုပ်လဝ်ပေါဲဗ္တိုက်တုဲယျ။ ဟိုတ်ဂှ်ရ ဆက်အာဂတတုဲ လ္ပာ်ပရေၚ်ဍုၚ်ကွာန်ဂှ်လေဝ် ဂွံဆက်ပံၚ်တောဲကၠောန်အာမာန်ဂှ် ပိုယ်တံ မ္ဒးပံၚ်တောဲကၠုၚ်သာ်ဏံရ” သာ်ဝွံ သ္ဂးရ။

ဂွံပလှ်ဖျေံ ကံၚ်ဇြဳပၞာန် ဗွဲမပြဟ်ဂှ်ကီု ညံၚ်ကၟိန်ဍုၚ်ပံၚ်ကောံဖေဝ်ဒရာဍာံပြမွဲ မဒုၚ်လျိုၚ်ကဵုပရေၚ်ၜိုဟ်လလမ်၊ အခေါၚ်အရာမၞိဟ် ကေုာံ အခေါၚ်တုပ်သၟဟ် ဂွံမံက်ဂတဝ်ကၠုၚ်ဗွဲမပြဟ် ရန်တၟံသာ်ဏံတုဲ သွက်ဂွံပံၚ်တောဲကၠောန်အာ မွဲကရောံမွဲစွံ မဒှ်ရ။

ဟိုတ်ဂှ်ရ ညးစၞးတာလျိုၚ် နူကဵုဒပ်စဵုဒၞါညးဍုၚ်ကွာန်ရေဝ် YPDF ကဵု ကံၚ်ဇြဳဖေဝ်ဒရာဍုၚ်မန် MSFC တံ သီုၜါလ္ပာ် ဆဵုဂဗသဳကၠဳလဝ် ပ္ဍဲဂိတုမာတ် ၂၃ ဗွဲမဍုက်ကေဝ်ရ။

နကဵုဒပ်စဵုဒၞါညးဍုၚ်ကွာန်ရေဝ် YPDF ပါလုပ်ကၠုၚ် ပ္ဍဲကံၚ်ဇြဳဖေဝ်ဒရာဍုၚ်မန် MSFC နဒဒှ်ဂကောံမွဲဂကောံရတုဲ ညံၚ်ရဴဂကောံပရေၚ်ဍုၚ်ကွာန်၊ ပရေၚ်ပၞာန်တၞဟ်ဟ်တံဂှ် ပါလုပ်ကၠုၚ် သၟဝ်ပၠတရဴ MSFC ဟွံသေၚ်ပုဟ်ဂှ် နာဲနဂါ သောၚ်ထ္ၜးလဝ်ရ။

ကံၚ်ဇြဳဖေဝ်ဒရာဍုၚ်မန်ဝွံ ဒှ်ဖေဝ်ဒရာယူနေတ် သ္ပစၞးတွဵုရးဍုၚ်မန်မွဲ ဒက်ပ္တန်လဝ် နကဵုညးစၞးဂကောံပၠန်ဂတးရပ်လွဟ် ဒုၚ်သ္ဇိုၚ်ကဵုကောန်ဂကူမန် အပ္ဍဲဍုၚ်မ္ၚးဍုၚ်တံ၊ ဂကောံပရေၚ်ဍုၚ်ကွာန် ကေုာံ ဂကောံဗော်သွးမှာဇန်တံရ။

ဒပ်စဵုဒၞါညးဍုၚ်ကွာန်ရေဝ်ဂှ်လေဝ် ဒတူလိုၚ်ကၠုၚ်လဝ် နဒဒှ်ဂကောံစဵုဒၞါညးဍုၚ်ကွာန် ဖျေံသ္ဇိုၚ်ဍုၚ်ရေဝ်၊ ခရိုၚ်မတ်မလီု၊ တွဵုရးဍုၚ်မန် နွံသၟဝ်ဌာနဝန်ဇၞော်ကာစဵုဒၞါ အလဵုအသဳညဳသၟဟ်ဂကူ NUG ရ။

ညးဒုၚ်လျိုၚ်ဂကောံ ဗိုလ်ယာန်နာၚ်ဂှ်တှ်ေ ဟိုတ်နူဟွံမိက်ယိုက်လျိုၚ် ဒုညးဒုၚ်လျိုၚ် ခရိုၚ်မတ်မလီု ဒပ်စဵုဒၞါညးဍုၚ်ကွာန် တွဵုရးဍုၚ်မန်ဂှ်တုဲ ပ္ဍဲဂိတုမာတ် ၁၈ တေံ နုက်တိတ်လဝ်ရ။

အခိၚ်လၟုဟ် ပ္ဍဲကဵုဂကောံပၠန်ဂတးရပ်လွဟ် သ္ပစၞးဂကူမန် ကေုာံ တွဵုရးဍုၚ်မန်တံဂှ် YPDF ကေုာံ MSFC တံ ပံၚ်တောဲကၠုၚ် နကဵုပရေၚ်ဍုၚ်ကွာန်၊ ပရေၚ်ပၞာန်တုဲ ဒပ်ရပ်လွဟ်ပန်ဒပ်ဂှ်တှ်ေ ပံၚ်တောဲချဳဒရာၚ်ဒၟံၚ် ပရေၚ်ပၞာန် နဒဒှ်ကရောၚ်ပၞာန်ရာမညရ။

ပရိုၚ်−သြၚ်လောန်တိုၚ်(မ်)

ဗီု−YPDF