ထဝါဲ၊ ဨပရဴ ၂၉
ပ္ဍဲကဵုပေါဲဗ္တိုက်သီဗ္ဒိုပ် (ဟားလီးကွေ့) ကွာန်မံၚ်မေဝ်ယှံၚ် ပွိုၚ်ဍုၚ်ထဝါဲ ရးတၞၚ်သဳဂှ် လ္ပာ်ကံၚ်ဇြဳပၞာန်ဂှ် ဗိုလ်ဇၞော်မွဲတၠကဵု ကောန်ဒပ်မွဲတၠ ချိုတ်အာလဝ်တုဲ ၁၆ တၠ ရပ်ဂွံလဝ်ဂျိုၚ်ၚ်ရောၚ် ဂွံတီကေတ် ဇရေၚ်ကရောၚ်ပၞာန်ဒူရကရ။
ဗ္ဒိုပ်(ဟားလဳးကွေ့) ကံၚ်ဇြဳပၞာန် မဖျေံလဝ်ဒပ် နကဵုဇြဟတ် ပွဳပွူ ၃၀ ဂှ် ဒပ်ပံၚ်ကောံစဵုဒၞါညးဍုၚ်ကွာန်တံ စဗ္တိုက်ကၠုၚ်လဝ် ပ္ဍဲဂိတုဨပရဴ ၂၆ အခိၚ်နူဂယး ၜိုတ် ၆ နာဍဳဂှ်တုဲ အခိၚ်ဇိုၚ်သဝ်တ္ၚဲ ၜိုတ် ၅ နာဍဳဝိုက်ဂှ် သီဂွံလဝ် အလုံဗ္ဒိုပ်မွဲရ။
ဟိုတ်နူဒပ်ပံၚ်ကောံစဵုဒၞါညးဍုၚ်ကွာန်တံ ဗ္တိုက်ကၠုၚ်ဂှ်တုဲ နူ ၆ နာဍဳဂယး စဵုကဵုဇိုၚ်သဝ်တ္ၚဲ ၅ နာဍဳဂှ် ပေါဲဗ္တိုက်ၜါလ္ပာ် ဒှ်လဝ်တုဲ လ္ပာ်ကံၚ်ဇြဳပၞာန်ဂှ် ဗိုလ်ဇၞော်မွဲတၠကဵု ကောန်ဒပ်မွဲတၠ ချိုတ်အာလဝ်တုဲ စံၚ်ပလီုလဝ်ဗ္ဒိုပ်ဂှ်ရောၚ် သ္ဂးရ။
သ္အာၚ်နူဂှ်ပၠန် အပ္ဍဲပေါဲဗ္တိုက်သီဗ္ဒိုပ်ဂှ် ရပ်ဂွံလဝ် လ္ပာ်ကံၚ်ဇြဳပၞာန် ၁၆ တၠ ဂျိုၚ်ၚ်တုဲ သီဂွံလဝ် လွဟ်လက်နက်မကမ် ဗွဲမဂၠိုၚ်ဂၠေၚ်ရောၚ် ညးတာလျိုၚ် လလောၚ်ပရိုၚ် ဒပ်စဵုဒၞါညးဍုၚ်ကွာန် ပွိုၚ်ဍုၚ်ဍာ်ဗု ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲပေါဲဗ္တိုက်ၜါလ္ပာ်ဂှ် လ္ပာ်ဒပ်ပံၚ်ကောံ စဵုဒၞါညးဍုၚ်ကွာန်တံဂှ် ကောန်သ္ဂံၚ်မွဲတၠ ကလိဂွံဝပ် ဟွံဒးဂွိၚ်တုဲ နူကဵုဗ္ဒိုပ် မဖျေံလဝ်သ္ဇိုၚ် ဗ္ဒါဲဗ္ဒိုပ် (ဟားလီးကွေ့) ကွာန်မံၚ်မေဝ်ယှံၚ်ဂှ် ဘိုၚ်ပန်ကဵုဒၟံၚ်လွဟ်ဇၞော် ကြပ်အရိုဟ်တ္ၚဲတုဲ ပန်ပှော်ဗ္တိုက်လဝ် နူကဵုပၞာန်ကျာ ဟွံအောန်နူကဵု ၂ ဝါရောၚ် သ္ဂးရ။
အပ္ဍဲပေါဲဗ္တိုက်ဂှ် ဟိုတ်နူကံၚ်ဇြဳပၞာန် ပန်ပှော်ကဵုလွဟ်ဇၞော်တုဲ ဒတုံဗ္တိုဟ်ထ္ကးအာလဝ် အပ္ဍဲကွာန်(ဇဟာ)တုဲ သမ္ဘာတၠသ္ၚိၜါတၠ ချိုတ်အာလဝ်တုဲ ခမဳသၚ်ၜါဇကုလေဝ် ကလိဂွံလဝ်ဝပ်ရောၚ် ဂွံတီကေတ်ရ။
ဗ္ဒိုပ်ဒပ် (ဟားလီးကွေ့) ဝွံ သၞာံတုဲကၠုၚ် ပ္ဍဲသၞာံ ၂၀၂၄ လဒေါဝ်သၞာံဂှ် ပ္ဍဲကဵုသ္ကုတ်ဂၠံၚ်ဍာ်ဗု−ထဝါဲ လ္တူဂၠံၚ်ဇၞော်ရေဝ်−ထဝါဲဂှ် ထပ်သၠဲပ္တိုန်လဝ်တုဲ ဒှ်ဗ္ဒိုပ်ဒပ် မသိုၚ်ခၞံလဝ် နကဵုဗာန်ကာဂမၠိုၚ် ဗွဲမခိုၚ်ကၠိုက်ရ။
ပရေၚ်ဗ္တိုက်ဏံဂှ် ဒပ်ပၞာန်ဗၠးၜးကောန်ဂကူထဝါဲ DNLA သ္ကိုပ်သ္ကတုဲ ဒပ်စဵုဒၞါညးဍုၚ်ကွာန်ဍာ်ဗု (YPDF) ၊ ဒပ်မဟာ (၄) KNU တမ်ဒပ် (၁၂) ဒပ်စြေက် (၅) ၊ ကရောၚ်ပၞာန်ကဴဝဴ၊ Dawei Guerrilla Revolutionary Force (DGRF) ၊ Tavoy People Liberation Force (TPLF) ၊ ဒပ်စြေက်ဒဝ်ဏ (၇) ၊ Sky Ghost Drone Force၊ ဂကောံဒပ်သၞံၚ်တိုၚ်ဖေဝ်ဒရာ၊ ဂကောံဒပ်စဵုဒၞါညးဍုၚ်ကွာန်(အရှေ့တော) တံ ပံၚ်တောဲဗ္တိုက်လဝ်ရ။
ပ္ဍဲဂိတုဨပရဴ ၁၉ တုဲကၠုၚ်တေံဂှ်လေဝ် ဒပ်ပံၚ်ကောံ ဂကောံဇြဟတ်ပၠန်ဂတး သၟဝ်သ္ကိုပ်သ္က ဒပ်ပၞာန်စဵုဒၞါကောန်ဂကူကရေၚ် KNLA တအ် ဗ္တိုက်သီဂွံလဝ် ဗ္ဒိုပ်ကံၚ်ဇြဳပၞာန် ဗ္ဒိုပ်ဗျူဟာထဳထ မၞုံပ္ဍဲဒေသ (အရှေ့တော) ပွိုၚ်ဍုၚ်ထဝါဲဂှ်ရ။
ပရိုၚ်−သြၚ်လောန်တိုၚ်(မ်)
ဗီု−ကရောၚ်ပၞာန်ဒူရက