ပ္ဍဲတွဵုရးဍုၚ်မန် ဟိုတ်နူဝိုၚ်ဝေၚ်တုဲ ပရေၚ်ကၠတ်ဂၠံက်ပၠံၚ်ၜးတံ ဒှ်ကၠုၚ်ဂၠိုၚ်ဒၟံၚ်

မတ်မလီု၊ ဨပရဴ ၂၉

အလုံတွဵုရးမန်မွဲ ကံၚ်ဇြဳပၞာန် ကဵုလဝ်အခေါၚ်ဝိုၚ်ဝေၚ် ညံၚ်ကဵုမလုပ်သၞောဝ်ဂှ်တုဲ အပ္ဍဲဒေသဂှ် ပရေၚ်ကၠတ်ဂၠံက်ပၠံၚ်ၜးတံ က္တဵုဒှ်ဂၠိုၚ်ဒၟံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ကံၚ်ဇြဳပၞာန်ဝွံ အပ္ဍဲဒေသဂှ် ကၠောန်ကၠုၚ်ဒၟံၚ်ဝိုၚ်ဝေၚ် ကရောံပေါဲဇာတ် နကဵုယၟုနာနာတုဲ အရိုဟ်ဒဒှ်တ္ၚဲ ပရေၚ်ကၠတ်ဂၠံက်ပၠံၚ်ၜးတံ က္တဵုဒှ်ဒၟံၚ် ဒၞါဲဌာန်ပြးဇးရ။

ဟိုတ်နူဝိုၚ်ဝေၚ်တုဲ အပ္ဍဲဒေသဂှ် ဂစိုတ်ဂယိုၚ်မၞိဟ်တုဲပၠံၚ်ၜး၊ ကၠတ်ကွဳလိုန်ဓာတ်၊ ကၠတ်ဖုၚ်တံကီု သီုကဵုကၠတ်ဂၠံက်ဒၟံၚ်ကပေါတ်တၞဟ်ဟ်တံဂှ်လေဝ် က္တဵုဒှ်ဒၟံၚ် လၟေၚ်ဒဒှ်တ္ၚဲရ။

ညးဒေသမွဲတၠဂှ်တှ်ေ ပရေၚ်ကၠတ်ဂၠံက်ပၠံၚ်ၜးတံ က္တဵုဒှ်ဒၟံၚ် အပ္ဍဲဒေသ လၟေၚ်ဒဒှ်တ္ၚဲဂှ်ဝွံ ဒှ်ဟိုတ်နူဝိုၚ်ဝေၚ်ဏောၚ်တုဲ ယဝ်ရရပ်ဂွံညးမကၠတ်တံဂှ်မ္ဂးလေဝ် ကံၚ်ဇြဳပၞာန် ကေတ်ကၠုၚ်အရေဝ် ဗွဲမစိုပ်တရဴ ဟွံမွဲပုဟ်ဂှ် ဟီုရ။

“ဝိုၚ်ဝေၚ်တံဂှ် ဂၠိုၚ်ကွေံကွေံ။ ပ္ဍဲတွဵုရးဍုၚ်မန်ဂှ် ဝိုၚ်ဝေၚ်တံဏံ ဂၠိုၚ်လောန်ဂှ်ရ ပရေၚ်ပၠံၚ်ၜး၊ ပရေၚ်ကၠတ်ဂၠံက်တံဂှ်တှ်ေ ဒှ်ကၠုၚ်ရ။ ပ္ဍဲကွာန်ပိုယ် ယဝ်ရပ်ဂွံတုဲ အာအပ်ဇရေၚ်ဗၠာဲသၟိၚ်တံမ္ဂး ခြာဟွံလအ် ကလေၚ်ဗၠးကၠုၚ်ပၠန်ရ။ ဒှ်ဒၟံၚ်သာ်ဏံ” သာ်ဝွံ သ္ဂးရ။

သ္အာၚ်နူဂှ်ပၠန် ပရေၚ်ကၠတ်ဂၠံက်ပၠံၚ်ၜးတံဂှ်ဝွံ ဒှ်ဒၟံၚ်သီုဗ္တံသီုတ္ၚဲတုဲ နကဵုညးမကၠတ်ဂၠံက်ဂမၠိုၚ် ဒက်ဂကောံတုဲ ကလိလောန်ဒၟံၚ်ဒုဟ်ဒဏ်တံဂှ်ရ ဟွံဒးကဵုအခိုက်မ္ဂး ဂၠါဲကၠုၚ်သၞ သီုဘဲအန္တရာယ်လမျီုတံ နွံဂှ် ညးဆက်ဟီုရ။

ညးဒေသမွဲတၠပၠန်ဂှ်လေဝ် ပရေၚ်ကၠတ်ဂၠံက်ပၠံၚ်ၜးတံ က္တဵုဒှ်ဒၟံၚ် ဒၞါဲပြးဇးဂှ်ဝွံ လ္ပာ်ကံၚ်ဇြဳပၞာန် ဒၟါနူကဵုလဝ်အခေါၚ်ပံက်ဝိုၚ်ဝေၚ် ၁၂ ရာသဳဏောၚ်ဂှ် ညးဟီုကၠုၚ် လညာတ်ညးရ။

“ပရေၚ်ကၠတ်ဂၠံၚ်ပၠံၚ်ၜးတံဂှ်တှ်ေ စုၚ်လေၚ်ဒၟံၚ်ဟဂှ်။ ကၠတ်ပ္ဍဲကၠအ်၊ ပ္ဍဲကွာန်၊ ပ္ဍဲဂၠံၚ်၊ ကၠတ်ထပိုတ်သီုဇုက်ပၟတ်တံဂှ်ရ။ ဝိုၚ်ဝေၚ်တံဂှ်တှ်ေ အဏံ ပံက်လဝ်စှ်ၜါရာသဳတုဲ ဟိုတ်နူအရာတံဏံလေဝ် ပါကီုရ” သာ်ဝွံ သ္ဂးရ။

ကံၚ်ဇြဳပၞာန်ဂှ်တှ်ေ မ္ၚးနူဟွံရပ် ညးမပၠံၚ်ၜးကၠတ်ဂၠံက်တံဂှ် ကေတ်ကၠုၚ်အရေဝ် ဗွဲမစိုပ်တရဴလေဝ် ဟွံမွဲဂှ်ရ ညးမကၠတ်ဂၠံက်ပၠံၚ်ၜးတံ ဂွံကၠုၚ်သဂံၚ်တုဲ ပၠံၚ်ၜးကၠုၚ်ဂတမတ်တံ ဒှ်ကၠုၚ်ဂှ် ညးဆက်ဟီုရ။

မွဲလ္ပာ်ဂှ်ပၠန် ကံၚ်ဇြဳပၞာန်ဝွံ ထ္ၜးကၠုၚ်ဟိုတ် နကဵုပရေၚ်ဂီုကၠီုတုဲ ထ္ၜးဇြဟတ် ဂေတ်ဂေၚ်ဒၟံၚ်ကီု၊ ဒၞါဲမၞိဟ်အာကၠုၚ်ဂၠိုၚ် ဒၞါဲဟွံထေၚ်လဝ်တံဂှ် ကၟာတ်လဒဵုစၟဳတ်ကီု၊ စၟဳတ်စရၚ်ကၟုဲတံဂှ် ကၠောန်ဒၟံၚ်ကီုလေဝ် ရပ်ဂွံလဝ် ညးမပၠံၚ်ၜးကၠတ်ဂၠံက်တံဂှ် စဵုကဵုဟွံမွဲ အောန်ကြဳဒၟံၚ်ရ။

သ္အာၚ်နူဂှ်ပၠန် ဂၠံၚ်လုပ်တိတ်ဍုၚ်၊ ဒၞါဲဂၠံၚ်ပိပန်သွာၚ်၊ သီုအပ္ဍဲဍုၚ်တံဂှ်လေဝ် ၜိုန်စုတ်လဝ်ကမ္မရာ CCTV ပေၚ်ထာတ်ကီုလေဝ် ရပ်ဂွံကၠုၚ် ညးမကၠတ်ဂၠံက်ပၠံၚ်ၜးတံ ဟွံမွဲတုဲ ယဝ်ရဒးဒုၚ်ကၠတ်ပၠံၚ်ၜးတံဂှ်မ္ဂး ဒှ်ဒၟံၚ်အကာဲအရာ ညးဒးညးဒုၚ်ဏောၚ်ဂှ် ညးဒေသတံ ဟီုကၠုၚ်အိုတ်ရ။

ပ္ဍဲတွဵုရးဍုၚ်မန်ဂှ်တှ်ေ အပ္ဍဲကာလပၞာန်သီအဝဵုပွိုၚ်ပန်သၞာံပြၚ်ဏံ ကဵုလဝ်အခေါၚ်ကၠောန်ဝိုၚ်ဝေၚ် သၠဲသၠဲလးလး ညံၚ်ရဴမလုပ်သၞောဝ်ကီုဂှ်ရ နဒဒှ်ပြဒ္ဒညာအဆက်လက္ကရဴဂှ် ပရေၚ်ပၠံၚ်ၜးကၠတ်ဂၠံက်ဒၟံၚ်တံလေဝ် က္တဵုဒှ်ဒၟံၚ် မွဲဏှမွဲဏှရ။

ပရိုၚ်−သြၚ်လောန်တိုၚ်(မ်)

ဗီု−CJ