နေဗျဳဒဝ်၊ ဨပရဴ ၂၉
ဒပ်ကံၚ်ဇြဳပၞာန် မဒးဆေၚ်ဒၟံၚ်မုက်ကဵုပေါဲဗ္တိုက် ပွိုၚ်ပန်သၞာံပြၚ် ကုဂကောံရပ်လွဟ်အလုံဍုၚ်မွဲ မပၠန်ဂတးဒၟံၚ် ကုသၞောတ်တၠအဝဵုပၞာန်ဂှ်ဝွံ သွက်ဂွံကၠောန်ပ္တိတ်လွဟ်ပၞာန် မၞုံကဵုအစောံစရာဲမသၠုၚ်တံဂှ် က္ဍိုပ်သ္ကိုပ်ပၞာန် ဟီုရ။
ပ္ဍဲကဵုအသေအဟာန် တ္ၚဲဒပ်ကၠောန်ပ္တိတ်ကပေါတ်ကာစဵုဒၞါ ရတုဗိုတ် မရနုက်ကဵု ၇၅ ဝါ မကၠောန်ဗဒှ်လဝ် ပ္ဍဲၝောံခန်ဌာန်ဂအုပ်ဒပ် ပ္ဍဲနေဗျဳဒဝ် ပ္ဍဲဂိတုဨပရဴ ၂၆ ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုဏာလဝ်ရ။
ပ္ဍဲဍုၚ်ဗၟာ ကြဴနူဂွံဗၠးၜးတုဲဂှ် က္ဍိုပ်သ္ကိုပ်ဒပ်ပၞာန်ဂမၠိုၚ်ဝွံ ညံၚ်ဂွံကၠောန်ပ္တိတ်မကမ်လွဟ်လက်နက် အပ္ဍဲဍုၚ်မာန်ဂှ် ပ္တိတ်ကၠုၚ်လဝ်ဇြဟတ်ဂှ်ရ ပ္ဍဲကဵုသၞာံ ၁၉၅၀ ဂိတုဨပရဴ ၂၆ ဂှ် ခုတ်ကၠုၚ်လဝ် နဒဒှ်တ္ၚဲဒပ်ကၠောန်ပ္တိတ်ကပေါတ်ကာစဵုဒၞါရောၚ် သ္ဂးရ။
လွဟ်ပၞာန် ကေုာံ ကပေါတ်ကညောတ်အရပ်စပ်ပၞာန်ဂမၠိုၚ်ဝွံ ဒးဒုၚ်သ္ပစၟတ်သမ္တီ ပ္ဍဲဗလးမုက်ပၞာန်တေံဏောၚ်ဂှ်ရ ညံၚ်ကဆံၚ်အဇာဂွံစိုပ် အစောံစရာဲဍေံဂွံသၠုၚ်ဂှ် သွက်ဂွံဘိုၚ်ဂိုတ်ဂ္စါန်အာ နူကဵုသွာၚ်ဇဳဂှ် က္ဍိုပ်သ္ကိုပ်ပၞာန် ဖ္တိုက်ဖ္အောဝ်လဝ်ရ။
ဗိုလ်ဇၞော်ဇြေန်ယဝ် သ္ပလဝ်ဇြဳဒဳအာမ်ဂှ်တှ်ေ ၜိုန်ရဟီုဒၟံၚ် သ္ဂောံသၠုၚ်ပ္တိုန်ကဆံၚ်အဇာလွဟ်ပၞာန်တံဏောၚ်ကီုလေဝ် အကာဲအရာလၟုဟ်ဏံ ရုၚ်စက်ကပစဂမၠိုၚ် ညံၚ်ဂွံဂေတ်ဂြိပ် တၟံကၠံပေၚ်ၚ် ဗီုကၠာတေံမာန်ဂှ် ဒးရုန်ဒၟံၚ်ဖိုဟ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ သၠုၚ်ပ္တိုန်ကဆံၚ်လွဟ်ပၞာန်တုဲ သွက်ဂွံပ္တိတ်ဂှ် ဟီုဒၟံၚ်နွံတုဲ ပ္ဍဲ (ကန်စွန်းမ) ဖျေံသ္ဇိုၚ် ကပစ ၂၁ ဂှ်လေဝ် တၠပညာကြုက်တံ ဂွံစိုပ်ကၠုၚ် နကဵုလၟိဟ်ဗွဲမဂၠိုၚ်ဂၠေၚ် နွံဒၟံၚ်ရ။ မကမ် မခတိုဟ်လ္ၚဵုတံဂှ်တှ်ေ ဂွံသၠုၚ်ပ္တိုန်ကဆံၚ်အဇာဍေံနွံဂှ် ဂွံဆဵုကေတ်ရ။ တုဲတှ်ေ ဂွံသၠုၚ်ပ္တိုန်ကဆံၚ်အဇာဍေံဟီုဂှ် ပ္ဍဲကဵုတ္ၚဲဒပ်ကၠောန်ပ္တိတ်ကပေါတ်ကာစဵုဒၞါဂှ် ဟီုကၠုၚ်လဝ်(ဟွံချိုတ်ပၠိုတ်) အတိုၚ်သၞောတ်တြေံရ။ လၟုဟ်ဂှ်တှ်ေ အတိုၚ်တြေံရ ညံၚ်ပရေၚ်ကၠောန်ပ္တိတ်မကမ်လွဟ်လက်နက်ဏံ ဂွံဂေတ်ဂြိပ် တၟံကၠံပေၚ်ၚ်ဂှ် ဍေံတံဒးရုန်ဒၟံၚ်ရ” သာ်ဝွံ သ္ဂးရ။
ပ္ဍဲဂိတုမာတ် ၃၁ တုဲကၠုၚ်တေံ ရုၚ်ကဵုဇြဟတ်ဓာတ်(တညောင်) နွံပ္ဍဲပွိုၚ်ဍုၚ်သလေန် မကဵုဒၟံၚ်ပၟတ်ဓာတ်လလဳ ကုဌာန်ဂအုပ်ပရေၚ်ပၞာန် ကောပ်ကာဲကာစဵုဒၞါဘဲဒပ်ကျာ စၟတ် (၉) မပါလုပ် သီုကဵုရုၚ်စက် ကပစ (၃) မ ပ္ဍဲရးမဂွဵုဂှ် ဒးဒုင်ဗ္တိုက်လဝ်ရ။
ဟိုတ်ဂှ်ရ ထရာမ်သဝှမ်မာ နွံပ္ဍဲရုၚ်ကဵုဇြဟတ်ဓာတ်ဂှ် ၜိုတ် ၈၀ မ လီုအာလဝ်တုဲ ဇြဟတ်ဓာတ်လလဳ မဆက်စၠောံလဝ် ရုၚ်စက် ကပစ စၟတ် ၂၀၊ ၂၁ ကေုာံ ၂၅ တံ ပိုတ်အာလဝ်ရောၚ် ပ္ဍဲဂိတုဨပရဴ ၆ တေံ ဒပ်ပၞာန်ဗၟာ Bama Army မဗ္တိုက်လဝ်ဂှ် လလောၚ်ပ္တိတ်လဝ်ပရိုၚ်ရ။
ပ္ဍဲဂိတုဨပရဴ ၂၅ ဂှ်လေဝ် ရုၚ်စက်ကပစ ကံၚ်ဇြဳပၞာန် စၟတ် ၁၃ မၞုံပ္ဍဲပွိုၚ်ဍုၚ်(ဆင်ပေါင်ဝဲ) ရးမဂွဵုဂှ် ဒပ်ပံၚ်ကောံပၠန်ဂတး ဖျေံသ္ဇိုၚ်အပ္ဍဲဒေသတံ ပန်ဗ္တိုက်လဝ် နကဵုကမ်လှောဝ် ၁၀၇ မမ ၁၀ မရ။
ဟိုတ်ဂှ်ရ ရုၚ်စက် Primer မၞုံအပ္ဍဲရုၚ်စက် ကပစ ၁၃ မပါလုပ် ရုၚ်စက်တၞဟ်ဟ်တံလေဝ် ဒးတုဲဗ္တိုဟ်ထ္ကးအာလဝ်တုဲ ပရေၚ်ဇီုကပိုက် နွံလဝ်ရောၚ် ညးတာလျိုၚ် Brave Warriors For Myanmar-BWM အာလဝ်ဂတ ပရေၚ်ဗ္တိုက်ဏံဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲအရာကၠောန်ပ္တိတ် မကမ်အဇာဍောတ် စဵုကဵု မဗုမ်က္ၜၚ်ကျာဇၞော်ဇၞော် ကောန်ဒပ်ကံၚ်ဇြဳပၞာန်တံ မရပ်စပ်ဒၟံၚ်ဂှ် ရုၚ်စက် ကပစ ၁၃ ဝွံ ဒှ်ရုၚ်စက်ကၠောန်ပ္တိတ်ကဵုဒၟံၚ် Detonator ကေုာံ Primer အဓိကရ။
ဟိုတ်ဂှ်ရ ပပ္တံနူမကမ် စဵုကဵုဗမ်တဲ၊ ကမ်လှောဝ် missile တံဂှ် နကဵုကံၚ်ဇြဳပၞာန် ဒးရပ်စပ်ဒၟံၚ် ပရေၚ်ကၠောန်ပ္တိတ်နူကဵုရုၚ်စက် Primer ကပစ ၁၃ ဂှ်တုဲ ယဝ်ရုၚ်စက်ဏံလီုမ္ဂး ပရေၚ်ကၠောန်ပ္တိတ် နူရုၚ်စက်တၞဟ်ဟ်တံလေဝ် ဇီုကပိုက်အာမာန်ဏောၚ် သ္ဂးလဝ်ရ။
ဗိုလ်ဇၞော်ဇြေန်ယဝ် သ္ပလဝ် CDM ဂှ်တှ်ေ ပ္ဍဲကဵုသေနာတ် ပ္တိတ်နူရုၚ်စက်ကပစ ဂမၠိုၚ် လွဟ်မရပ်စပ်ပ္ဍဲဒပ်တိုက်တံ မပါလုပ်၊ သီုကဵုလွဟ်အမၠံက် ကေုာံ လွဟ်ကမ်လှောဝ်တံဂှ် ဒပ်ကံၚ်ဇြဳပၞာန် ရပ်စပ်ဒၟံၚ် အပ္ဍဲပေါဲဗ္တိုက်လၟုဟ်တံရောၚ် ဟီုရ။
“ပ္ဍဲကဵုဌာနဇၞော်ဍေံတံ မပ္တံကဵုဌာနလွဟ်စကာသွက်ဒပ်တိုက်၊ ဌာနလွဟ်အမၠံက်၊ တုဲတှ်ေ ဌာနကမ်လှောဝ်တံဏံဂှ် ပ္ဍဲကဵုရုၚ်စက် နွံသၟဝ်ဌာနတံဏံသီုဖအိုတ်ဂှ် ရပ်စပ်ဒၟံၚ်မဗုမ်က္ၜၚ်ကျာ ပ္တိတ်နူအပ္ဍဲဍုၚ်ဂှ် အဓိကရ။ လွဟ်ဇၞော် လွဟ်ဍောတ်တုဲမ္ဂး ရပ်စပ်ဒၟံၚ် (စိန်ပြောင်း မော်တာ) မကမ်လွဟ်အမၠံက်တံဂှ် အဓိကရ။ ညအ်ဂှ် ပ္ဍဲဒပ်တိုက်ကဵု ဒပ်ကျာ။ ယဝ်ဒပ်ကျာတှ်ေ ရပ်ဒၟံၚ် ကပေါတ်မပ္တိတ်နၚ် နူရုၚ်စက် ကပစ အပ္ဍဲဍုၚ်ဂှ်တုဲ ကပေါတ်နူဍုၚ်သ္အာၚ်တံလေဝ် နွံ။ အဓိကဂှ်တှ်ေ ရာန်ကေတ်ဒၟံၚ် နူကြုက်ကဵုရုယှာဂှ် ဂွံတီကေတ်ရ” သာ်ဝွံ သ္ဂးရ။
က္ဍိုပ်သ္ကိုပ်ပၞာန်ဂှ်တှ်ေ အတိုၚ်ရမျာၚ်ကြဵုဇာ “Power To The Forces” ဒးဒှ်ဒြဟတ် သွက်ဒပ်ပၞာန်ဂှ် သ္ပဟိုတ်နူကၠောန်ပ္တိတ်ကဵုလဝ်ကပေါတ်လွဟ်ပၞာန် သွက်ဒပ်ပၞာန်မာန်ဂှ်ရ ပ္တိုန်လဝ်ဂုန်စရာဲ နကဵုတဆိပ်ကြာဂုန်တၟေၚ် ကုကောန်ဒပ်ကၠောန်ပ္တိတ်လဝ်ကပေါတ်ကာစဵုဒၞါ ၅၀၀ တၠပြၚ်ရ။
သၟဝ်ရုၚ်စၞောန်ပၟိၚ် ရုၚ်စက်ကပေါတ်ကာစဵုဒၞါ ဒပ်ကံၚ်ဇြဳပၞာန်ဂှ် ရုၚ်စက် ကပစ ဂေတ်ဂြိပ်ဒၟံၚ် စဵုကဵု ၂၅ ရုၚ်တုဲ ရုၚ်စက်တံဏံဝွံ သိုၚ်ခၞံလဝ် ပ္ဍဲဒေသမသ္ၚောဲကဵု ဂကောံရပ်လွဟ်ကောန်ဍုၚ်အရၚ်တံ မဒှ်ရ။
ပ္ဍဲဍုၚ်အုပ်ဓုပ် နေဗျဳဒဝ်၊ ပ္ဍဲရးလ္ဂုၚ်၊ ရးဗဂေါ ကေုာံ ရးမဂွဵုတံဂှ် ရုၚ်စက်ကပစ နွံတုဲ ပ္ဍဲရးမဂွဵုဂှ်တှ်ေ ရုၚ်စက်ကပစ နွံဒၟံၚ် ၁၇ ရုၚ် ဂၠိုၚ်အိုတ်တုဲ ရးဗဂေါဂှ်တှ်ေ နွံ ၇ ရုၚ်တုဲ ဒှ်ဒုတိယဂၠိုၚ်အိုတ်ရ။
ပရိုၚ်−သြၚ်လောန်တိုၚ်(မ်)
ဗီု−MOI/AA