ဒုၚ်သယိတ်၊ ဨပရဴ ၃၀
ပ္ဍဲပွိုၚ်ဍုၚ်ယှိုဲကျေန် ပယျဵုတွဵုရးမန်ကဵုရးဗဂေါဂှ် အကြာဒပ်ကံၚ်ဇြဳပၞာန်ကဵု ဒပ်ပၠန်ဂတးတံဂှ် ဒှ်ဒၟံၚ်ပေါဲဗ္တိုက်တုဲ ညးဒေသဂၠိုၚ်ကဵုလ္ၚီ ပါဲကၠုၚ်လ္ပာ်ဍုၚ်ဒုၚ်သယိတ်ဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုဨပရဴ ၂၄ တုဲကၠုၚ်တေံတုဲ ပ္ဍဲကဵုကွာန်(ကွမ်းဆိပ်) ပွိုၚ်ဍုၚ်ယှိုဲကျေန်ဂှ် အကြာဒပ်ကံၚ်ဇြဳပၞာန်ကဵု ဒပ်ပၠန်ဂတးတံဂှ် ပေါဲဗ္တိုက်ၜါလ္ပာ် သ္ကာတ်မြဟ်ဒၟံၚ်တုဲ လ္ပာ်ကံၚ်ဇြဳပၞာန်လေဝ် ဗ္တိုက်ကၠုၚ်ဒၟံၚ် သီုကဵုလွဟ်ဇၞော် သီုကဵုပၞာန်ကျာရ။
ကရောံပေါဲဗ္တိုက်ၜါလ္ပာ်ဂှ် ဟိုတ်နူကံၚ်ဇြဳပၞာန် ဗ္တိုက်ကဵုပၞာန်ကျာတုဲ ညးဒေသ ၁၀၀၀ ပြၚ် ပါဲဒလေတ်ကၠုၚ် လ္ပာ်ဍုၚ်ဒုၚ်သယိတ် တွဵုရးဍုၚ်မန်တုဲ ပြဟ်ဟ်ဏံ နွံပၟိက်ဒၟံၚ်ကဵု အရီုဗၚ်ဇွောံမတံဂှ်ရောၚ် ညးဒေသလ္တူဍုၚ်ဂမၠိုၚ် ဟီုကၠုၚ်အိုတ်ရ။
ညးဍုၚ်ကွာန်ပါဲဘဲပၞာန်ဂမၠိုၚ်ဝွံ အခိၚ်လၟုဟ် မံၚ်တန်တဴဒၟံၚ် ပ္ဍဲဘာလကျာ်လ္တူဍုၚ်ဒုၚ်သယိတ် သီု ၇ အရာပ်ဂှ်ကီု၊ ပ္ဍဲဇြပ်သ္ဘၚ်ဓဝ် ကေုာံ ပ္ဍဲကဵုသ္ၚိမသကလောကောဒေံ မကြပ်တံဂှ်ရ။
ညးပါဲဘဲပၞာန် မံၚ်ဒၟံၚ် ပ္ဍဲဇြပ်သ္ဘၚ်ဓဝ်၊ ဘာလကျာ်တံဂမၠိုၚ်ဝွံ သွက်ဒၞါဲမံၚ်စသုၚ်၊ သ္ၚိဍာ်၊ ဍာ်လွပ်ဍာ်သုၚ်တံဂှ် ပြေပြံၚ်ကီုလေဝ် နွံပၟိက်ဒၟံၚ်ကဵု အရီုဗၚ်စၞစသုၚ်တံရောၚ် ဂွံတီကေတ်ရ။
အပ္ဍဲပေါဲဗ္တိုက်ပွိုၚ်ဍုၚ်ယှိုဲကျေန်ဂှ် နူဒပ်ကံၚ်ဇြဳပၞာန် ဖျေံသ္ဇိုၚ်ပွိုၚ်ဍုၚ်ဝဝ်ကဵု ပွိုၚ်ဍုၚ်ဒုၚ်သယိတ်ဂှ် ဘိုၚ်ပန်ကဵုဒၟံၚ်လွဟ်ဇၞော်တုဲ ညးဒေသဂမၠိုၚ်ဝွံ ဟွံဂံၚ်မံၚ်ပ္ဍဲကွာန်ရတုဲ ဒးပါဲကၠုၚ်ဒၟံၚ်ဘဲပၞာန် လ္တူဍုၚ်ဒုၚ်သယိတ်ရ။
အတိုၚ်ဂလာန်ညးဒေသတံဂှ်မ္ဂး ညးပါဲကၠုၚ်ဘဲပၞာန်ဂမၠိုၚ်ဝွံ ညးဒေသ နူကဵုကွာန် (သူရဲသမိန်၊ လက်ပန်၊ ဆၚ်ရွာ၊ စက်စု) နူပွိုၚ်ဍုၚ်ဝဝ် ရးဗဂေါ ပါလုပ်တုဲ ညးဒေသ နူကွာန်(ခရွဲ၊ မုက္ခမော၊ ချောၚ်းဝ၊ သုံးခွ) ဗ္ဒါဲဍုၚ်ဒုၚ်သယိတ်တံဂှ်လေဝ် ပါလုပ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−Simsa Kasa