ကအ်ကြိက်၊ ဨပရဴ ၃၀
အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတး သၟဝ်သ္ကိုပ်သ္က KNLA ဂှ် ပေါဲဗ္တိုက်ၜါလ္ပာ် ဆက်သ္ကာတ်မြဟ်ဒၟံၚ် ဗ္ဒါဲဍုၚ်ကအ်ကြိက် တွဵုရးကရေၚ်ဂှ်တုဲ ဒပ်ကံၚ်ဇြဳပၞာန် ထပ်ပလံၚ်ဒၟံၚ်ဇြဟတ်ပၞာန် လ္ပာ်ဍုၚ်ကြုၚ်ဒဵုဂှ် တမ်ရိုဟ်ပရိုၚ်ဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုဨပရဴ ၂၉ အခိၚ်နူဂယးတုဲကၠုၚ်တေံတုဲ ဂကောံဇြဟတ်ပၠန်ဂတး သၟဝ်က္ဍိုက်ပ် ဒပ်ပၞာန်ဗၠးၜးကောန်ဂကူကရေၚ် KNLA ဟိုတ်နူလုပ်စိုပ်ဗ္တိုက်ကၠုၚ် ပွဳဗွိုၚ်ကရပ်ဘာလကျာ် (ရွှေကြက်မၚ်း) ဗ္ဒါဲဍုၚ်ကအ်ကြိက် ဒၞါဲဒပ်ကံၚ်ဇြဳပၞာန် မဖျေံလဝ်ဒပ်ဂှ် နကဵုဇြဟတ်လၟိဟ်ဗွဲမဂၠိုၚ်ဂၠေၚ်တုဲ ပေါဲဗ္တိုက်ၜါလ္ပာ် က္တဵုဒှ်ဒၟံၚ် ဗွဲမသ္ကာတ်မြဟ်ရ။
အခိၚ်လၟုဟ် ဒပ်ကံၚ်ဇြဳပၞာန် ထပ်ပလံၚ်ဗစိုပ်နၚ် ဒပ်အရီု လ္ပာ်ဍုၚ်ကြုၚ်ဒဵုဂှ်တုဲ ဒပ်ကံၚ်ဇြဳပၞာန် မဖျေံဒၟံၚ်ဒပ် ပွဳဗွိုၚ်ကွာန် (ကျားကလေး၊ ရိုးမဟာ၊ ဂျိုၚ်း) ကေုာံ သၞေဟ်ကၚ်စၟဳတ် ဒဒန်ဂြာၚ်(ကအ်ကြိက်) ၊ ခမရ (၅၄၅) ဖျေံသ္ဇိုၚ်ဍုၚ်ကြုၚ်ဒဵု နကဵုဇြဟတ်ဗွဲမဂၠိုၚ်ဂၠေၚ်ဂှ် ညးဒေသတံ သ္ဂးရ။
အပ္ဍဲပေါဲဗ္တိုက်ကြုၚ်ဒဵု ကအ်ကြိက်ဂှ် ဒပ် DKBA ပါ်တိတ် သၟဝ်က္ဍိုက်ပ်ဗိုလ်ဘိဂှ် ဘိုၚ်ဗ္တိုက်ကဵုဒၟံၚ် လ္ပာ်ဒပ်ကံၚ်ဇြဳပၞာန်တုဲ ပ္ဍဲဒၞါဲသၞေဟ် (လှိုၚ်ဝ၊ ၉ တိုၚ်) တံဂှ်လေဝ် ဖျေံဒပ်မံၚ်ဒၟံၚ် ကရောံဒပ်ကံၚ်ဇြဳပၞာန်တံရောၚ်ဂှ်လေဝ် ညးမစုက်လုက်ကဵုပရေၚ်ပၞာန်ဂမၠိုၚ် သ္ဂးရ။
အပ္ဍဲပေါဲဗ္တိုက်ကအ်ကြိက်−ကြုၚ်ဒဵု မလအ်ကၠုၚ်ပွိုၚ်ၜါသတ္တာဟပြၚ်ဂှ် လ္ပာ်ဒပ်ကံၚ်ဇြဳပၞာန်ကဵု ဂကောံ DKBA က္ဍိုပ်ပါ်တိတ်ဂှ် ဇီုကပိုက်ချိုတ် ဂၠိုၚ်တုဲ လ္ပာ်ဂကောံဇြဟတ်ပၠန်ဂတး သၟဝ်က္ဍိုက်ပ် KNLA ဂှ်လေဝ် ဇီုကပိုက်ပြဟ်လလုဲဒးအာ နွံလဝ်ရောၚ် တမ်ရိုဟ်ပရိုၚ်ပရေၚ်ပၞာန်ဂမၠိုၚ် ဟီုရ။
အပ္ဍဲပေါဲဗ္တိုက်ဂှ် ဟိုတ်နူဒပ်ကံၚ်ဇြဳပၞာန် ပန်ကဵုပၞာန်ကျာ ကေုာံ လွဟ်ဇၞော်တံဂှ်တုဲ ညးဍုၚ်ကွာန်ဒေသ ၂၀ ပြၚ် ချိုတ်အာလဝ်တုဲ ဗ္ဒါဲ ၃၀ တၠ ကလိဂွံလဝ်ဝပ်ရ။
ဟိုတ်နူပေါဲဗ္တိုက်တုဲ ညးဒေသဂၠိုၚ်ကဵုဠက် ဒးဂြိပ်ပါဲဒလေတ်ဒၟံၚ်တုဲ ဆက်နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်ဖိုဟ်ရောၚ် ဂွံတီကေတ် အတိုၚ်ဂလာန် ဂကောံမှာဇန်ကရေၚ်တံရ။
ဟိုတ်နူပေါဲဗ္တိုက်ကအ်ကြိက် ကြုၚ်ဒဵုတုဲ လ္ပာ်ဍုၚ်ဘာအၚ် ဍုၚ်ဇၞော်တွဵုရးကရေၚ်ဂှ်လေဝ် ဒပ်ကံၚ်ဇြဳပၞာန် ဖျေံလဝ်က္ၜၚ်ပၞာန် လ္တူၜဳသၚ်လောန်ဂှ်တုဲ သီုကဵုသၠုၚ်ပ္တိုန်အသိၚ် ပလေဝ်ဒၟံၚ်ပၞာန်ဒုၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ