နေဗျဳဒဝ်၊ ဨပရဴ ၃၀
စပ်ကဵုပြဝပကီုပရာပ် က္ဍိုပ်သ္ကိုပ်ပၞာန် ကေုာံ ကံၚ်ဇြဳပၞာန် မကလိလောန်ဒၟံၚ် လ္တူညးဍုၚ်ကွာန်ဍုၚ်ဗၟာတံဂှ် ညံၚ်အာဇြဳယာန် ဟွံဂွံသ္ပကၠေံမၛ္ဇဟ်ဂှ် ပၟိက်ဇၞော်တဴရောၚ် ဥူကျဝ်ဇြဝ် ညးမၞုံအခေါၚ်ဟီုဂး ရုၚ်သမ္မတ အလဵုအသဳညဳသၟဟ်ဂကူ NUG ဟီုရ။
နကဵုအာဇြဳယာန် ယဝ်ရသ္ပကၠေံမၛ္ဇဟ် ကုပြဝပကီုပရာပ်ကံၚ်ဇြဳပၞာန်တံဂှ်မ္ဂး ကဵုအာအရီုဗၚ် ကုလၟေၚ်ကမၠောန် မဒက်ပ္တန်ဒၟံၚ်ပရေၚ်ညိၚ်ဝတ် ပ္ဍဲဍုၚ်ဗၟာ မာန်ဟွံသေၚ်ပုဟ်ဂှ် ဟီုကၠုၚ်လဝ် ပ္ဍဲကဵုအစဳဇန်အရေဝ်ပရိုၚ် ဗ္စိုပ်ညးဍုၚ်ကွာန်ကေုာံဍုၚ်သ္အာၚ် မလလောၚ်ပ္တိတ်လဝ် ပ္ဍဲဂိတုဨပရဴ ၂၉ တေံရ။
သွက်ဂွံရေၚ်တၠုၚ် ကမၠောန်ရီုဗၚ်ဟံၚ်ပြာ် စပ်ကဵုကသဳတိ ဇၞော်ကဵုဇြဟတ် မက္တဵုဒှ်အာလဝ်ဂှ်တုဲ ပရေၚ်ဒေါအ်ပန်ပှော်ကံၚ်ဇြဳပၞာန်ဂှ်ဝွံ မိက်ဂွံဟီုကြီုစတုဲ လလောၚ်တြးကၠုၚ်လဝ် ကၠာက္ဍိုပ်သ္ကိုပ်ပၞာန် ဟွံဂွံတိုန်စိုပ်ကောံဓရီု BIMSTEC ဂှ်ဏောၚ်ဂှ် ဥူကျဝ်ဇြဝ် ပါ်ပါဲလဝ်ရ။
မွဲအခိၚ်ဓဝ် ပရေၚ်ဗ္တိုက်နူကဵုပၞာန်ကျာ လ္တူကောန်အရာပ်ဟၟဲကဵုဒုဟ်တံဂှ်လေဝ် ဆက်ကၠောန်ဒၟံၚ် ဂၠိုၚ်ၚ်ကဵုဝါတုဲ ကလိလောန်ဒၟံၚ် လ္တူညးဍုၚ်ကွာန်ဒှ်ဒၟံၚ်ဒဒိုက် ဟိုတ်နူဘဲတိချဳတံ ဓဇန်ဓဇန်ဂှ် ဂွံဆဵုကေတ်ရောၚ် သ္ဂးရ။
အတိုၚ်စၟတ်သမ္တီ ဌာနဝန်ဇၞော်အခေါၚ်အရာမၞိဟ် NUG ဂှ်မ္ဂး စနူအခိၚ်တိချဳတုဲ စဵုကဵုဂိတုဨပရဴ ၂၅ ပါဲနူနေဗျဳဒဝ်ကဵုလ္ဂုၚ်တုဲ ပ္ဍဲဒေသသှ်ေဒၟံၚ်တံဂှ် ဟိုတ်နူကံၚ်ဇြဳပၞာန် ဗ္တိုက်ကဵုပၞာန်ကျာတုဲ ကောန်အရာပ် ၂၄၂ တၠ ဒးချိုတ်အာလဝ်တုဲ ညးကလိဂွံဝပ် နွံကၠုၚ်လဝ် ဗ္ဒါဲ ၄၀၀ ရ။
ပရေၚ်ဗ္တိုက်တံဏံဂမၠိုၚ်ဝွံ ပ္ဍဲကဵုရးသက်ကိုၚ် ဒးလဝ်ဘဲတိချဳ ဇၞော်ကဵုဇြဟတ်ဂှ်ရဂှ် ပရေၚ်ဗ္တိုက်ကဵုပၞာန်ကျာ က္တဵုဒှ်အာလဝ် ၅၂ ဝါတုဲ ညးဒးပြဟ်လလုဲအာ ၈၀ တၠ၊ ညးကလိဂွံဝပ် ၁၂၁ တၠ ဒှ်အာလဝ်ဂၠိုၚ်အိုတ်ရ။
လအာတုပ်သာ်ဂှ်ကီု ပ္ဍဲရးမာန္တလေဝ်ဂှ်လေဝ် ပရေၚ်ဗ္တိုက်ကဵုပၞာန်ကျာ ဒှ်အာလဝ် ၄၈ ဝါတုဲ ညးဒးပြဟ်လလုဲအာ ၅၇ တၠ၊ ညးကလိဂွံဝပ် ၉၇ တၠ ဒှ်လဝ်ဒုတိယဂၠိုၚ်အိုတ်ရောၚ် တၚ်နၚ်နူဌာနဝန်ဇၞော်အခေါၚ်အရာမၞိဟ် NUG ထ္မံက်ထ္ၜးလဝ်ရ။
ပြဝကလိလောန်ဒၟံၚ် လ္တူကောန်အရာပ်တံသာ်ဏံဂှ် နကဵုဍုၚ်သ္အာၚ်၊ ကၟိန်ဍုၚ်အပ္ဍဲဒေသ ကေုာံ ကၟိန်ဍုၚ်ဇိုၚ်ဝုတ်ဒိုဟ်ဂမၠိုၚ် သွက်ဂွံမၚ်ရံၚ်စွံသတိ ဒဒှ်မကံၚ်ဇြဳပၞာန် ပ္တိတ်ဒၟံၚ်ပရဲ နူကဵုဘဲအန္တရာယ်သဘာဝဂှ် ဥူကျဝ်ဇြဝ် ဖ္တိုက်ဖ္အောဝ်လဝ်ရ။
သ္ကိုပ်ဝန်ဇၞော် ဍုၚ်မလေဝ်ယှာ ဥက္ကဌဒးအလန်အာဇြဳယာန်ဂှ် ဟီုလဝ် ကုက္ဍိုပ်သ္ကိုပ်ပၞာန် ညံၚ်ဟွံဂွံတာဒၞါသ္ပပလာပ်ပထုဲ ပ္ဍဲအရာကဵုအရီုဗၚ် ကုညးမဒှ်ဒၟံၚ်ဒဒိုက် ဟိုတ်နူဘဲတိချဳတံဂှ်တုဲ ကုသ္ကိုပ်ဝန်ဇၞော် အလဵုအသဳညဳသၟဟ်ဂကူ NUG ဂှ်လေဝ် ဆဵုဂဗသဳကၠဳလဝ် ဗွဲမလုပ်သၞောဝ်ရ။
စပ်ကဵုဆဵုဂဗလဝ် ကု NUG တုဲ ညံၚ်ဂွံဒက်ပ္တန်ကၟိန်ဍုၚ်ပံၚ်ကောံ ဖေဝ်ဒရာဒဳမဝ်ကရေဇြဳ ညးဍုၚ်ကွာန်ဂမၠိုၚ် မနွံပၟိက်ဂှ်မာန်ဂှ် ပေါဲသဳကၠဳ မဆေၚ်စပ်ကဵုဒေသ သီုညးဖအိုတ်ဂွံပါလုပ်မာန်မွဲ ညံၚ်ဂွံဒှ်ကၠုၚ်ဂှ် ဒှ်ကဆံၚ်ပၟိက်ဇၞော်မွဲရောၚ် ဒဒှ်ရညးညာတ်ကေတ်ဂှ် သ္ဂးရ။
သ္အာၚ်နူဂှ်ပၠန် စၟဳစလဝ် ပေါဲသဳကၠဳမၞုံကဵုဂုန်ဖဵုဂမၠိုၚ် သွက်ဂွံထပ်က္တဵုဒှ်ကၠုၚ်ပၠန်ဂှ်တုဲ ဒုၚ်သ္ဇိုၚ်ကဵုတၚ်တုပ်စိုတ် ၆ တၚ် NUG ကေုာံ မဟာမိတ် K3C တံ မလလောၚ်တြးလဝ်ဂှ်တုဲ ညံၚ်ပေါဲသဳကၠဳမဍာံပြဂမၠိုၚ် ဂွံဒှ်ကၠုၚ်ဂှ် စၟဳစလဝ်ရောၚ် ဥူကျဝ်ဇြဝ် ဟီုရ။
ဂကောံပၞာန်ဝွံ ညံၚ်အကြေပ်အဂြတ်ဍုၚ်ဗၟာ ဂွံပြေလာဲအာဂှ် ဒှ်သွဟ်ဟွံသေၚ်ပုဟ်ဟီုဂှ် မံက်ပြာကတ်ဒၟံၚ်တုဲ နကဵုအာဇြဳယာန် ဆဵုဂဗကဵု ဂကောံဇြဟတ်ပၠန်ဂတး ပါလုပ်သီု NUG ဗွဲမလုပ်သၞောဝ်တုဲ ဂၠါဲအာသွဟ်နကဵုပရေၚ်ဍုၚ်ကွာန်ဂှ်ရဟေၚ် ဒှ်နဲကဲကလိဂွံ ပရေၚ်ညိၚ်ဝတ် အဓာန်ဇမၠိၚ်မွဲမာန်ဏောၚ်ဂှ် သ္ဂးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−KNU