ပ္ဍဲတယိတ်ချံၚ် ဟိုတ်နူဒပ်ပၞာန် ထောံဂြာတ်မခတိုဟ်တုဲ ကောန်အရာပ်မွဲတၠ ချိုတ်တုဲ ၜါတၠ ကလိဂွံဝပ်

တယိတ်ချံၚ်၊ ဨပရဴ ၃၀

ရးတၞၚ်သဳ ပွိုၚ်ဍုၚ်တယိတ်ချံၚ် ပ္ဍဲကွာန်ကျံက်ခမံက်ဂှ် ပေါဲဗ္တိုက်ဟွံမွဲမွဲသာ် ဟိုတ်နူဒပ်ကံၚ်ဇြဳပၞာန် ထောံဂြာတ်ကၠုၚ်မခတိုဟ်တုဲ ညးဍုၚ်ကွာန်ကောန်အရာပ်မွဲတၠ ချိုတ်တုဲ ၜါတၠ ဇီုကပိုက်ကလိဂွံလဝ်ဝပ်ရောၚ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲဂိတုဨပရဴ ၂၉ အခိၚ်လဒေါဝ်တ္ၚဲ ၜိုတ် ၁ နာဍဳဂှ် က္ၜၚ်ကျာဗ္တိုက် ဂျက်ဖိုက်တာမွဲဖ္ဍိုက် မတိုန်ကၠုၚ် နူဗ္ဒိုပ်ဒပ်ကျာဗိက်ဂှ် ထောံဏာလဝ်မခတိုဟ် လ္တူကွာန်ကျံက်ခမံက်၊ ချံက်ချံၚ်တံမပါလုပ် ၜိုတ်ကွာန် ၄ ကွာန်ရ။

ဟိုတ်နူဒပ်ကံၚ်ဇြဳပၞာန် ထောံကၠုၚ်မခတိုဟ်တုဲ ဥူအံၚ်အံၚ် ဒၟံၚ်ကွာန်ကတောဲ လမျီုဒးအိုတ်အာတုဲ နူကဵုကွာန်ကျံက်ခမံက်ဂှ် ညးမဒှ်ကောန်ဝုတ် မဝေန်စန္ဒာ အာယုက် ၁၈ သၞာံ၊ ညးမဒှ်မိ ဒဝ်မိကာန် အာယုက် ၅၀ သၞာံတံ ကလိဂွံအာလဝ်ဝပ်ရ။

အတိုၚ်ဂလာန်ညးဒေသတံဂှ်မ္ဂး အပ္ဍဲဒပ်ကံၚ်ဇြဳပၞာန် ထောံမခတိုဟ်ဂှ် ညးဒေသဒၟံၚ်ကွာန်ချံက်ချံၚ် ပိတၠ ဇီုကပိုက်ကလိဂွံလဝ်ဝပ် ဂွံတီကေတ်ကီုလေဝ် အကာဲအရာ သောဲသောဲဗြောဲဗြောဲဂှ်တှ်ေ နကဵုသြၚ်လောန်တိုၚ်(မ်) သ္ပဒတန်ဟွံမာန်ဏီရ။

အပ္ဍဲကဵုပရေၚ်ဒပ်ကံၚ်ဇြဳပၞာန် ထောံမခတိုဟ်ဂှ် သ္ၚိဒၟံၚ်ဂမၠိုၚ် ဇီုကပိုက်လီုလာ်အာလဝ် နွံတုဲ ညးဍုၚ်ကွာန်ဒေသလ္ၚဵု ဒးဂြိပ်ဒဴပါဲဒလေတ်ဒၟံၚ်တံ နွံဒၟံၚ်ရောၚ် ဂွံတီကေတ်ရ။

ပ္ဍဲဂိတုဨပရဴ ၁၉ တုဲကၠုၚ်တေံဂှ်လေဝ် ပ္ဍဲပွိုၚ်ဍုၚ်တယိတ်ချံၚ် ကွာန်ရၚါဂှ် ပေါဲဗ္တိုက်ဟၟဲမွဲသာ် ဟိုတ်နူဒပ်ကံၚ်ဇြဳပၞာန် ထောံဂြာတ်ကၠုၚ်မခတိုဟ်တုဲ အပါဇၞော်ကေုာံကောန်စဴ ညးၜါတၠ ချိုတ်အာတုဲ ပန်တၠ ဇီုကပိုက်ကလိဂွံလဝ်ဝပ်ရ။

ပရိုၚ်−သြၚ်လောန်တိုၚ်(မ်)

ဗီု−CJ