ၜၚ်ကံက်၊ မေ ၁၆
ညံၚ်ဟွံဂွံကံက် အခေါန်ဖလှာဇၞော်ကဵုဇြဟတ် လ္တူဗၞိက်ပလံၚ်ပ္တိုန်ဍုၚ်သ္အာၚ်တံဂှ်တုဲ အရာဍုၚ်သေံ ပ္တိတ်ကၠုၚ်ဇြဟတ်ဂှ်တှ်ေ တာဒၞါကၠေံ ပရေၚ်ပလံၚ်ပ္တိုန်ကပေါတ်ဗၞိက် ဘာ်တရဴ ပ္ဍဲကဵုသၞေဟ်ညးတံဂှ်တုဲ ရာန်ဂလိုၚ်ပ္တိုန်အာ ကပေါတ်ဗၞိက်အမေရိကာန်တံဏောၚ်တုဲ ညံၚ်ဗွဝ်ဖျာအပ္ဍဲဍုၚ် ဂွံတောတက်ဂှ် ကၠောန်အာဏောၚ် ဒဒှ်ရဟီုလဝ် ကုဝါယှေန်တာန်ဂှ် ဝန်ဇၞော်ပရေၚ်ဘဏ္ဍာသေံ ဟီုလဝ် ပ္ဍဲဂိတုမေ ၁၄ တေံရ။
ဟိုတ်နူအခေါန်ဖလှာ သမ္မတအမေရိကာန် ဒဝ်နေဝ်ထြာမ် မစၞောန်ပျးလဝ်ဂှ်တုဲ ပ္ဍဲအာယှဒိုဟ်အဂၞဲဏံ ဍုၚ်သေံ မပါလုပ်ဒၟံၚ် ပ္ဍဲကဵုဍုၚ်ဇီုကပိုက်ဒးဂၠိုၚ်အိုတ်ဂှ်ဝွံ ကၠာပရေၚ်ဒေါအ်ဇူစပ်ကဵုအလုံဂၠးမွဲ အာယုက်ဟွံဂွံအိုတ် ပ္ဍဲဂိတုဂျူလာၚ်ဂှ် သွက်ဂွံဖအောန်ဖျေံကဵုအခေါန် ယဝ်ပညဳဟွံဂွံပုဟ်ဟီုမ္ဂး ဗၞိက်ပလံၚ်ညးတံဝွံ ဒးကံက်အာအခေါန် ၃၆ တၟံကၠံဏောၚ် မဒှ်ရ။
ဂလာန်ပၠောပ် ပရေၚ်သွံရာန်ဗၞိက်အကြာၜါဍုၚ်ဂှ်တှ်ေ ညးမာန်၊ အဲမာန်ရဏောၚ် သာ်ဝွံ ဝန်ဇၞော်ပရေၚ်ဘဏ္ဍာ ပဳချာဲ ချောန်ဟာဗာဂျဳရာ ဟီုလဝ် ကုအ္စာပရိုၚ်ဂမၠိုၚ်ရ။
ဝန်ဇၞော်ပရေၚ်ဘဏ္ဍာအမေရိကာန် သကတ်ဗာတ်သာတ်ဂှ် ခၠေဝ်ပလန်ကၠုၚ် လ္တူဂလာန်ပၠောပ်ညးတံ လ္ပာ်ခိုဟ်တုဲ ဂွံပ္ညဳဂှ် ဒှ်ဒၟံၚ်ဒတုဲ ထ္မံက်ထ္ၜးလဝ်ရောၚ် ဝန်ဇၞော် ပဳချာဲ ဟီုဗပေၚ်စုတ်လဝ်ရ။
ဟိုတ်နူဍုၚ်သေံ ကဵုကၠုၚ်အရေဝ်သာ်ဏံတုဲ ပရေၚ်အမေရိကာန် နွံပၟိက်ဒၟံၚ်ကဵုသြန် ယအ်စှ်ေအာဏောၚ်တုဲ ဒတုဲဖဵုတၞဟ်ဟ်တံလေဝ် ကလိဂွံအာမံၚ်ဏီဏောၚ်ဂှ် ဝန်ဇၞော် ပဳချာဲ ဂးရ။
အခေါန်ဖလှာ ၃၆ တၟံကၠံဂှ် ဖအောန်ဖျေံအာ စဵုကဵုဗ္ၜတ်အခေါန်မတုပ်သၟဟ်ကဵုဍုၚ်တၞဟ်သ္အာၚ်တံဂှ်ဏောၚ် သာ်ဝွံ စၟဳစလဝ်ဂှ်လေဝ် ညး ဟီုရ။
အမေရိကာန်ဝွံ သၞာံတုဲကၠုၚ်တေံ ဒှ်လဝ်ဗွဝ်ဖျာဗၞိက်ပလံၚ်ပ္တိုန်ဍုၚ်သ္အာၚ် ပ္ဍဲကဵုဍုၚ်သေံ ဇၞော်အိုတ်တုဲ ပ္ဍဲကဵုပရေၚ်ပလံၚ်ပ္တိုန်ဗၞိက် အပံၚ်ဖအိုတ်ဂှ် ၁၈ ဒဿမ ၃ တၟံကၠံ၊ ၚုဟ်မးမ္ဂး ၅၅ ဗဳလျာန် ဒဝ်ဠာအမေရိကာန် နွံလဝ်ရ။
ပရေၚ်သွံရာန်ဗၞိက် ညးတံကဵု ဍုၚ်သေံဂှ် နွံပၟိက်ဒၟံၚ်သြန် ၄၅ ဒဿမ ၆ ဗဳလျာန် ဒဝ်ဠာရောၚ် လ္ပာ်အမေရိကာန် ဟီုလဝ်ရ။
Ref: Reuters