မတ်မလီု၊ မေ ၂၉
ပ္ဍဲတွဵုရးဍုၚ်မန် ပ္ဍဲရာသဳကၠောန်သြောံကသီုသၞာံဏံ အကြာပြဒ္ဒညာကောန်ကလောန်အောန်ဂှ် ဟိုတ်နူကော်ကောန်ကလောန်ဟွံဂွံဂှ်တုဲ သွက်ဂွံတဵုလွဳသြောံကသီုဂှ် ဒှ်ဒၟံၚ်အခက်အခုဲရောၚ် သၟာဗ္ၚဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သၟာဗ္ၚဂမၠိုၚ် ဂွံကၠောန်သြောံဂှ် ကော်ကေတ်ကောန်ကလောန် ဗီုကၠာတေံ ဗွဲမလောဲသွာဟွံဂွံကီု၊ ကဵုဂလိုၚ်ပ္တိုန်ၚုဟ်ရဂှ် မၞိဟ်ကၠုၚ်စိုပ်ကၠောန်ၜိုတ်ဟွံမွဲကီု၊ ပွမကၠုၚ်စိုပ်ကၠောန်စ နူကဵုဒေသတၞဟ်ဟ်တံဂှ်လေဝ် ဟွံမွဲဂှ်တုဲ ဒးဆေၚ်ဒၟံၚ်မုက်ကဵု သီုပြဒ္ဒညာတံဏံရ။
ပြဒ္ဒညာကောန်ကလောန်အောန်ဂှ်ဝွံ ဟိုတ်နူသၞောဝ်ယိုက်လျိုၚ်ပၞာန်တုဲ ကောန်ကလောန်အပ္ဍဲဒေသဂမၠိုၚ် တိတ်အာဍုၚ်သ္အာၚ် ဂၠိုၚ်ကၠုၚ်ကီု၊ မွဲလ္ပာ်ဂှ်ပၠန်လေဝ် ဟိုတ်နူကံၚ်ဇြဳပၞာန် ပတေၚ်ဂြတ်စၟဳတ်လဝ်တုဲ မၞိဟ်ကၠုၚ်စိုပ်ကၠောန်ကလောန် နူဒေသတၞဟ်ဟ်တအ် ဟွံမွဲ ဒှ်ဒၟံၚ်ရ။
သၟာဗ္ၚမွဲတၠဂှ်တှ်ေ ဂွံကၠောန်သြောံအခိၚ်ကသီုဏံဂှ် ဟိုတ်နူကော်ကောန်ကလောန်ဟွံဂွံတုဲ သ္ပအဓိက ဒးတဵုလွဳဒၟံၚ် မဟရာတ်သၟးတုဲ ယဝ်မဟရာတ်တှ်ေ ဒမြိပ်တိတ်အောန်တုဲ နကဵုသၟာဗ္ၚဂမၠိုၚ် ခတှ်အိုတ်ဟွံလေပ် ဒှ်ဏောၚ်ဂှ် ဟီုရ။
“ပြဒ္ဒညာကောန်ကလောန်ဏံ ၜိုတ်လဵုဇၞော်ရောဟီုဂှ် ကောန်ကလောန်ဂှ် လၟုဟ်ကော်ဟွံဂွံပုဟ်။ ကော်ဟွံဂွံတုဲ ဒးကၠောန်ဒၟံၚ် မဟရာတ်သၟးရ။ မဟရာတ်တှ်ေ ဒမြိပ်တိတ်ဍေံ သွက်ဝါစှ်ဨကဂှ် ၜိုတ်သြောံပတမ်ကေတ် မသုန်ဨက ဟွံဒှ်ပုဟ်။ သြောံတိတ်အောန်ရ။ ကောန်ကလောန်ဂှ်အောန် ၚုဟ်သြောံဂှ်လေဝ် ဟွံခိုဟ်တုဲ ဘဝသၟာဗ္ၚတံဂှ်တှ်ေ ခတှ်ဂှ်အိုတ်ဟွံလေပ်ရပုဟ်” သာ်ဝွံ သ္ဂးရ။
ကောန်ကလောန်ဗွဲမဂၠိုၚ် မသှ်ေသၟေဟ်ဒၟံၚ် အပ္ဍဲဒေသဂှ်ဝွံ သၟတ်ကၠောန်ကလောန်မာန် ဗီုကၠာတေံဂှ် ဟွံမွဲရတုဲ ဒးကၠောန်ၜိုတ်ဒၟံၚ် ကဵုညးဇၞော်ဇၞော်တံသၟးဂှ်ရ ဒးဆေၚ်ဒၟံၚ်မုက်ကဵုသီုဒဒိုက် ကၠောန်ကလောန်ဟွံဂြိပ်ဂှ် ညးဆက်ဟီုရ။
သၟာဗ္ၚမွဲတၠဂှ်လေဝ် အပ္ဍဲဒေသ ဟိုတ်နူကောန်ကလောန်အောန်တုဲ တဵုလွဳသြောံကသီု ညံၚ်ဂွံတုဲဒှ်ဂှ် အခက်အခုဲ နွံကၠုၚ်တၟာဂလိုၚ်တုဲ ဗီုဂွံတှ်ေတုဲ ဒးတဵုလွဳကၠုၚ်ဒၟံၚ်ဂှ်ရ ဒမြိပ်တိတ်ကီု သြန်လုပ်သၟာဗ္ၚတံကီု စှ်ေကၠုၚ်ဏောၚ်ဂှ် ဟီုရ။
“ကောန်ကလောန်အောန်ဂှ်တှ်ေ ဍာံဍာံရ၊ ဟိုတ်ဂှ်ရ ပိုယ်ရဲဗ္ၚတအ် ညံၚ်ကလောန်ဏံဂွံတုဲဒှ်ဂှ် အခက်အခုဲနွံတၟာဂလိုၚ်ရ။ ကောန်ကလောန်အောန်တုဲ ၚုဟ်ကောန်ကလောန်ဂှ် ဒးကဵုၚုဟ်က္ဍၚ် ဂၠိုၚ်ကဵုဆ။ တုဲပၠန် ဟိုတ်နူကောန်ကလောန်အောန်တုဲ သၟာဗ္ၚဂမၠိုၚ်ဝွံ ကၠောန်ဒၟံၚ်ဂွံတှ်ေတုဲဏောၚ်။ ဗီုလဵုဟီုဟီု ဒမြိပ်သြောံတိတ်ဂှ် စှ်ေဏောၚ်။ သၟာဗ္ၚမွဲမွဲတၠ ဂွံဂှ်လေဝ် စှ်ေဏောၚ်။ သြန်လုပ်လေဝ် စှ်ေဏောၚ်။ ဇြဟတ်ပ္တိတ်ဗၞိက် ကၟိန်ဍုၚ်ဂှ်လေဝ် စှ်ေကီုဏောၚ်” သာ်ဝွံ သ္ဂးရ။
အပ္ဍဲဒေသဂှ်တှ်ေ သွက်ဂွံကၠောန်သြောံကသီုဂှ် ဒးဆေၚ်ဒၟံၚ်မုက်ကဵု ပြဒ္ဒညာကောန်ကလောန်အောန် ဇၞော်ကဵုဇြဟတ်တုဲ နကဵုသၟာဗ္ၚလ္ၚဵုတအ် ဖအောန်ဖျေံတိဗ္ၚတုဲ ကၠောန်ကၠုၚ်တုဲ ညးလ္ၚဵုဂှ်တှ်ေ ၜိုတ်ဂြောဝ်ဂတာညးတအ်ဂွံစသုၚ်ရ တဵုလွဳဒၟံၚ်အိုတ်ဂှ် ညးဆက်ဟီုရ။
သၟာဗ္ၚဂမၠိုၚ်ဝွံ ပ္ဍဲရာသဳတဵုသြောံကသီုဏံ မ္ၚးနူကောန်ကလောန်အောန်ဂှ် ဟိုတ်နူၚုဟ်ကပေါတ်တမ်က္ဍၚ်၊ သွက်ဂွံဇိက်ထဲတဵုလွဳဂှ် ၚုဟ်လိၚ်စက်ဂမၠိုၚ် က္ဍၚ်တံပါလုပ်တုဲ သီုကဵုဒးဆေၚ်ဒၟံၚ်မုက်ကဵု ခရိတ်အိုတ်နာနာ အိုတ်ဂၠိုၚ်တံဂှ်ရောၚ် သၟာဗ္ၚဂမၠိုၚ် သ္ဂးအိုတ်ရ။
မွဲလ္ပာ်ဂှ်တှ်ေ ကံၚ်ဇြဳပၞာန်ဝွံ အခိၚ်သၟာဗ္ၚဂမၠိုၚ် ဒှ်ဒၟံၚ်ဒဒိုက်ဂှ် သၟာဗ္ၚခတှ်မသှ်ေသၟေဟ်ဒၟံၚ်ကၠာတေံ ကလေၚ်လေဲသီုအိက်သီုတမ်မာန်မှဟေၚ် ပတိတ်ဂၠေံကဵုအာသြန် ခရိတ်တဵုလွဳရာသဳကသီု သၞာံ ၂၀၂၅ ဏံဏောၚ်ဂှ် လလောၚ်ပ္တိတ်လဝ်ရ။
ပ္ဍဲတွဵုရးဍုၚ်မန်ဂှ် လၟေၚ်သၞာံ တဵုလွဳဒၟံၚ်သြောံကသီု ဗ္ဒါဲထပှ်ကိုဋ်ဨကတုဲ သၞာံဏံဂှ်တှ်ေ ဟိုတ်နူပြဒ္ဒညာကောန်ကလောန်အောန်တုဲ ဒမြိပ်တိတ် ယအ်စှ်ေကၠုၚ်တီတီမာန်ရောၚ် သၟာဗ္ၚဂမၠိုၚ် ချိၚ်ခယျလဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−Social Media