မတ်မလီု၊ မေ ၂၉
ကြဴနူကောံဓရီုအာဇြဳယာန် မကၠောန်ဗဒှ်လဝ်ပွိုၚ်ၜါတ္ၚဲ ပ္ဍဲဍုၚ်မလေဝ်ယှာ ဍုၚ်ကွာလာလာမ်ပူတုဲဂှ် ပ္ဍဲဂိတုမေ ၂၇ တေံ လလောၚ်တြးကၠုၚ်လဝ် တၚ်လလောၚ်တြးလစွံစိုတ် က္ဍိုပ်သ္ကိုပ်အာဇြဳယာန်ဂမၠိုၚ် မဆေၚ်စပ်ကဵုပရေၚ်ဒေါအ်ပန်ပှော် ပ္ဍဲဍုၚ်ဗၟာရ။
အတိုၚ်တၚ်လလောၚ်တြးဂှ်မ္ဂး ပဋိပက္ခမက္တဵုဒှ်ဒၟံၚ် ပ္ဍဲဍုၚ်ဗၟာဏံ ညံၚ်ဂွံအိုတ်အးအာ နဒဒှ်ကဆံၚ်ပထမဂှ် ဂကောံမဆေၚ်စပ်သီုဖအိုတ် သွက်ဂွံထပ်ပပဵုပ္တိုန် အာယုက်ကာလဒေါအ်ပန်ပှော်ဗွဲယာယဳဂှ် ဖ္တိုက်ဖ္အောဝ်လဝ်ရ။
သ္အာၚ်နူဂှ်ပၠန် နကဵုတၚ်ရန်တၟံ သ္ဂောံကလိဂွံပရေၚ်ၜိုဟ်လလမ် မတန်ကြန်အာဍာ်ဇမၠိၚ်ဂှ် သွက်ဂွံကၠောန်ဗဒှ် ပေါဲသဳကၠဳပရေၚ်ဍုၚ်ကွာန်ကဆံၚ်ကောန်ဂကူ ပါလုပ်သီုညးဖအိုတ်မာန်တုဲ သွက်ဂွံဒက်ပ္တန်ဓဝ်ပတှ်ေ ဂှ်လေဝ် ဖ္တိုက်ဖ္အောဝ်လဝ်ရောၚ် ဂွံဆဵုကေတ်ရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ် စပ်ကဵုပြဝကံၚ်ဇြဳပၞာန် ထောံဂြာတ်မံၚ်မခတိုဟ် လ္တူကောန်အရာပ် ကေုာံ စမြိုၚ်မဆေၚ်စပ်ကဵုညးဂမၠိုၚ်တံဂှ်တုဲ နူကဵုအာဇြဳယာန် ဟီုကၠုၚ်ဒၟံၚ် သ္ဂောံကဵုပပဵုပ္တိုန်အာယုက်ကာလဒေါအ်ပန်ပှော်ဂှ်ဝွံ ဟွံစှ်ေကဵုနတဲပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပရေၚ်ချဳဒရာၚ်ပရေၚ်ပၞာန် ဂကောံပၠန်ဂတးတံဂှ် ဟွံထ္မံက်ပေါဲဗ္တိုက် ပ္ဍဲဗလးတိဏံမွဲသာ် ကံၚ်ဇြဳပၞာန်ပကီုပရာပ်ဂှ် ထောံမံၚ်မခတိုဟ် လ္တူသ္ၚိဌာန်ညးဍုၚ်ကွာန်၊ ဘာဗ္တောန်လိက်၊ ဘာလကျာ် လၟေၚ်ဒဒှ်တ္ၚဲဂှ်ကီု၊ ပန်ဒၟံၚ်ကဵုလွဟ်ဇၞော်၊ စံၚ်ဒၟံၚ်ကွာန်တအ်ဂှ် အလုံဂၠးမွဲ ဂွံတီဂွံညာတ် ဂွံမိၚ်ကေတ်ဒၟံၚ်ဖိုဟ်ဂှ် နူကဵုအာဇြဳယာန် ဟီုကၠုၚ် ပပဵုပ္တိုန်အာယုက်ကာလဒေါအ်ပန်ပှော် သွက်ပဋိပက္ခဂမၠိုၚ်ဂွံအိုတ်အးဂှ်ဝွံ ဒှ်တၚ်လလောၚ်တြး ယုတ္တိဟွံမွဲဂှ် မိက်ဂွံဟီုရ။ သီုဒှ်တၚ်လလောၚ်တြး ဟွံစှ်ေကဵုနတဲမွဲဂှ်လေဝ် ပိုယ်တံ မိက်ဂွံဟီုရ” သာ်ဝွံ သ္ဂးရ။
အတိုၚ်စရၚ် ဌာနဝန်ဇၞော်အခေါၚ်အရာမၞိဟ် အလဵုအသဳညဳသၟဟ်ဂကူ NUG ဂှ်မ္ဂး အပ္ဍဲကဵုတၚ်လလောၚ်တြးဒေါအ်ပန်ပှော်ကံၚ်ဇြဳပာန် ၜါဝါဂှ် ဟိုတ်နူဗ္တိုက်ကၠုၚ်ကဵုပၞာန်ကျာတုဲ အလုံဍုၚ်မွဲ လၟိဟ်မၞိဟ်ဒးချိုတ်အာ ဗ္ဒါဲ ၃၀၀ နွံတုဲ ၄၅၆ တၠ ဇီုကပိုက်ကလိဂွံလဝ်ဝပ်ရ။
နကဵုကံၚ်ဇြဳပၞာန် ၜိုန်ပပဵုပ္တိုန်လဝ် ပရေၚ်ဒေါအ်ပန်ပှော် စဵုကဵုပိဝါကီုလေဝ် စွံပွန်ကဵုညးဍုၚ်ကွာန်ကေုာံစမြိုၚ်မဆေၚ်စပ်ကဵုညးဂမၠိုၚ်ဂှ်တုဲ သၠုၚ်ပ္တိုန်အသိၚ် ဗ္တိုက်ကၠုၚ်ဒၟံၚ် ကဵုပၞာန်ကျာရ။
က္ဍိုပ်သ္ကိုပ်အာဇြဳယာန်တအ်ဂှ်တှ်ေ သွက်ဂွံဒေါအ်ကၠေံ ပွမပကီုပရာပ်ဒၟံၚ် လ္တူကောန်အရာပ် ကေုာံ စမြိုၚ်မဆေၚ်စပ်ကဵုညးဂမၠိုၚ် လွာဲဂှ်ကီု၊ လ္ပာ်ပၞာန် လ္ပာ်အရာပ် ဟွံပါ်ပါဲမွဲသာ် သွက်ဂွံဒေါအ်ကၠေံပရေၚ်ဗ္တိုက်ဂမၠိုၚ် လွာဲဂှ်ဂှ် ဖ္တိုက်ဖ္အောဝ်လဝ် ကုဂကောံမဆေၚ်စပ်သီုဖအိုတ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ညးလ္ၚတ်ဂမၠိုၚ်ဂှ်တှ်ေ နကဵုအာဇြဳယာန် စၞးဒးကၠောန်ပရေၚ်ကေတ်အရေဝ် မစိုပ်တရဴ လ္တူပရေၚ်ဗ္တိုက် မပ္တဝ်က္ဍိုပ် လ္တူကောန်အရာပ်တံဂှ် တၚ်လလောၚ်တြးဟွံစှ်ေကဵုနတဲဂှ်ဝွံ က္ဍိုပ်သ္ကိုပ်ပၞာန်ကေုာံကောန်ရဲတဝ်ခွါညးဂမၠိုၚ် သ္ပဂရုဟွံသေၚ်ပုဟ်ဂှ် ထံက်ထ္ၜးလဝ်ရ။
ပဒိုဝ်သဝ်တဝ်နဳ ညးမၞုံအခေါၚ်ဟီုဂး ဗော်သွးကောန်ဂကူကရေၚ် KNU ဂှ် လ္တူပြဝကံၚ်ဇြဳပၞာန် ဟၟဲကဵုအပြံၚ်အလှာဲတံဂှ် ၜိုတ်သၟဟ်အစောံ လုပ်မံၚ်ပေါဲဗ္တိုက် နကဵုနဲကဲဇဳသာ်ဖိုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“နူကဵုကံၚ်ဇြဳပၞာန်ဂှ် ဟီုဒၟံၚ်ပရေၚ်ဒေါအ်ပန်ပှော်ဟွံသ္ကုတ်တုဲ ထောံမံၚ်မခတိုဟ် လ္တူညးဍုၚ်ကွာန်တံဖိုဟ်ဂှ် ဂွံဆဵုကေတ်ရ။ ပ္ဍဲဗလးတိဏံဂှ် လ္ပာ်ကံၚ်ဇြဳပၞာန်တအ် ပြံၚ်လှာဲကၠုၚ်တၟေၚ်ၚ်တၟဟ်ဟ်ဂှ် မွဲဟွံမွဲပုဟ်။ ဟိုတ်ဂှ်ရ လ္ပာ်ပိုယ်တံလေဝ် သွက်ဂွံဗ္တိုက်သရိုဟ်တၠအဝဵုပၞာန် ကေုာံ ညံၚ်သၞောတ်တၠအဝဵုလဵုမွဲမှ ဟွံဂွံသှ်ေၜက်ဂှ် ရပ်စပ်နဲကဲပရေၚ်ပၞာန်၊ ပရေၚ်ဍုၚ်ကွာန်၊ ပရေၚ်ကလုတ်တမာန်နာနာတုဲ ဆက်လုပ်မံၚ်ပေါဲဗ္တိုက်ဖိုဟ်ရ” သာ်ဝွံ သ္ဂးလဝ်ရ။
ပြဟ်ဟ်ဏံ ဗ္ဒိုပ်ဒပ်ကံၚ်ဇြဳပၞာန် နွံလ္တူဂၠံၚ်ကွဳစက် ဗြဝတဳ−ဝဝ်လေ ပယျဵုသေံ−ဗၟာဂှ် ဒပ်ပံၚ်ကောံ ကေုာံ ဒပ်ပၞာန်ဗၠးၜးကောန်ဂကူကရေၚ် KNLA တအ် ထ္ပက်ဒၟံၚ်ပၞာန်ရောၚ် ဂွံတီကေတ် အတိုၚ်ပရိုၚ်အပ္ဍဲဒေသရ။
တၚ်တုပ်စိုတ်အာဇြဳယာန် ၅ သာ် မတုပ်လဝ်စိုတ် ပ္ဍဲသၞာံ ၂၀၂၁ တေံဂှ်လေဝ် က္ဍိုပ်သ္ကိုပ်အာဇြဳယာန်ဂမၠိုၚ် ဆက်ထံက်ဂလာန်တုဲ ဂွံထ္မံက်ရုပ်ရဴဍိုက်က်ပေၚ်ၚ်ဂှ် ပၟိက်ဇၞော်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ပ္ဍဲကဵုတၚ်တုပ်စိုတ် မသုန်သာ်ဂှ် ညံၚ်ပရေၚ်ပကီုပရာပ်ဂမၠိုၚ် ဂွံဒေါအ်ဒေၚ်ကီု၊ ညံၚ်ဂွံဆဵုဂဗသဳကၠဳ ကုဂကောံမဆက်စပ်သီုဖအိုတ်ဒှ်တမ် တၚ်နၚ်တံဏံ ပါလုပ်ဒၟံၚ်ကီုလေဝ် အပ္ဍဲပွိုၚ်ပန်သၞာံဂှ် ထ္မံက်ရုပ်ရဴဟွံမာန်ဏီရ။
ဗိုလ်ဇၞော်ဇြေန်ယဝ် သ္ပလဝ်ဇြဳဒဳအာမ် နူကဵုဒပ်တိုက်ဂှ်တှ်ေ ပရေၚ်သဳကၠဳဝွံ နကဵုတၚ်အာတ်မိက်ဂမၠိုၚ်ဂှ် ပၠန်ဂတးက္ညၚ် ဒေါအ်ဒေၚ်အာမာန်ဂှ်ရ သွက်ဂွံသၠုၚ်ပ္တိုန်အသိၚ်ပၞာန်တိုက် ကုကံၚ်ဇြဳပၞာန်ရ နွံဂှ် သ္ၚဳဂၠိပ်လဝ်ရ။
“ပၠန်ဂတးရပ်လွဟ်ရဟေၚ် ဒှ်ဒၟံၚ်အကာဲအရာ ကဵုသ္ဂုတ်သွာတ် ပ္ဍဲပၠန်ဂတးကညၚ်ဏံဂှ်ဏောၚ်။ သဳကၠဳမ္ဂးလေဝ် နကဵုတၚ်အာတ်မိက် အရာဒှ်ဟွံမာန်ဂမၠိုၚ်ဂှ် ဗဒေါအ်ကၠေံအသိၚ်ပၠန်ဂတးကညၚ်ဏံမာန်တုဲ ဒှ်ဒၟံၚ်အကာဲအရာ မက္တဵုဗဒှ်ကဵု အရာမသဗုၚ်သပါတံဂှ်ဏောၚ်။ နကဵုဂကောံဇြဟတ်ပၠန်ဂတးဂမၠိုၚ် သဳကၠဳကဵုဒှ် ဟွံသဳကၠဳကဵုဒှ် ညးလဵုမွဲသဳကၠဳသဳကၠဳ ပၠန်ဂတးရပ်လွဟ်ဏံဂှ် သၠုၚ်ပ္တိုန်အသိၚ်ပၞာန်ဗ္တိုက် ကုကံၚ်ဇြဳပၞာန်ဂှ် နွံပၟိက်ရ” သာ်ဝွံ သ္ဂးရ။
အလဵုအသဳညဳသၟဟ်ဂကူ NUG ဂှ်တှ်ေ ကရေပ်ဓရတ်တုဲ ကဵုသဳကၠဳပညဳပညပ် ကေုာံ ကဵုဒေါအ်ပန်ပှော်ဂှ်ဝွံ ညံၚ်ပြဒ္ဒညာဂွံပြေပြံၚ် ဍာ်ဇမၠိၚ်ဂှ် ဒှ်အထံက်အပၚ်ဟွံသေၚ်ပုဟ်ဂှ် ဥူကျဝ်ဇြဝ် ညးမၞုံအခေါၚ်ဟီုဂးရုၚ်သမ္မတ ဟီုပ္တိတ်လဝ်ရ။
Justice For Myanmar ဂှ်လေဝ် တၚ်တုပ်စိုတ် မသုန်သာ်ဂှ်ဝွံ ဟွံဒှ်ကလောန်တုဲ သီုကဵုတာဒၞါဒၟံၚ် ပရေၚ်ဍုၚ်သ္အာၚ်တအ် ကေတ်အရေဝ်ဂှ်တုဲ သွက်ဂွံဆက်ကၠောန် ပရေၚ်ဂစိုတ်ဂယိုၚ်ကဵုဂအုံဗွဝ်ဂှ် စဵုဒၞါကဵုလဝ် ဂကောံပၞာန်တအ်ရောၚ်ဂှ် သ္ဂးရ။
ကမ္ပဏဳ ၅၄ နူဍုၚ်မဒှ်ကောန်ဂကောံအာဇြဳယာန်ဂမၠိုၚ် ဍုၚ်ဗဳယေတ်နာမ်၊ ဍုၚ်သေံ၊ ဍုၚ်သေန်ကာပေါဝ်၊ ဍုၚ်မလေဝ်ယှာ ကေုာံ ဍုၚ်အေန်ဒိုဝ်နဳယှာတအ်ဂှ်ဝွံ ထံက်ပၚ်ရီုဗၚ်ဒၟံၚ် ကံၚ်ဇြဳပၞာန် နကဵုအခေါန်ဖလှာ၊ ကၠေၚ်က္ၜၚ်ကျာ ကေုာံ နဲကွတ်ပညာဂှ် လလောၚ်ပ္တိတ်လဝ် ပ္ဍဲဂိတုမေ ၂၄ တေံရ။
ပရိုၚ်−သြၚ်လောန်တိုၚ်(မ်)
ဗီုရုပ်−AP