ဍာ်ဗု၊ မေ ၂၉
ရးတၞၚ်သဳ ပ္ဍဲပွိုၚ်ဍုၚ်ဍာ်ဗုဂှ် ဟိုတ်နူဒပ်ကံၚ်ဇြဳပၞာန် ပန်ပှော်ကဵုလွဟ်ဇၞော် အရိုဟ်တ္ၚဲအဆက်က်တုဲ ညးဒေသ ၃၀၀၀ ပြၚ် ထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် ဇရေၚ်ညးမရီုဗၚ်ကဵုဒၟံၚ်ပရေၚ်ပါဲဒဴဘဲပၞာန်တံရ။
ပပ္တံနူဂိတုမေ သတ္တာဟလက္ကရဴအိုတ်တုဲ တမ်ဒပ်ကံၚ်ဇြဳပၞာန်ဂမၠိုၚ် မဖျေံသ္ဇိုၚ်ဍာ်ဗုဂှ် ပန်ပှော်ဒၟံၚ်လွဟ်ဇၞော် ပ္ဍဲဂကောံကွာန်မေန်တာတုဲ ဟိုတ်နူဖေက်လကိုတ်တုဲ ညးဍုၚ်ကွာန်ဒေသဂမၠိုၚ် ဒးပါဲဒလေတ်ဒၟံၚ်ရ။
ဟိုတ်နူပရေၚ်ပန်ပှော်ကဵုလွဟ်ဇၞော်ဂှ်တုဲ ညးဒေသ ၃၀၀၀ ပြၚ် နူကဵု ၈ ကွာန် ပါလုပ်သီုကဵုကွာန်(ဆင်စွယ်၊ မင်းသား၊ စိန်ဘုံ၊ ဘုရားသုံးဆူ၊ နတ်ကြီးစင်၊ ရေငံကြီး၊ ကျောက်တလုံး) တအ် ဒးပါဲဒလေတ်ဒၟံၚ်ဘဲပၞာန်ရ။
အခိၚ်လၟုဟ် ရီုဗၚ်ထံက်ပၚ်ကဵုဒၟံၚ် ဇွောံမစၞစကေုာံဂဥုဲဇဗ အရာညးဍုၚ်ကွာန်ပါဲဘဲပၞာန်တအ် နွံပၟိက်ဂှ်ကီုလေဝ် လၟိဟ်ညးပါဲဘဲပၞာန် ထပ်ဂၠိုၚ်တိုန်ကၠုၚ်တုဲ ဟွံရုမ်ဂပ်ဒှ်ဒၟံၚ်ရ။
သ္အာၚ်နူဂှ်ပၠန် ခြာဟွံလအ် စိုပ်အခိၚ်ကာလဗြဲဏောၚ်ဂှ်ရ ယဝ်ဟွံဂွံ ဇွောံမ၊ ဂဥုဲဇဗ၊ ဒၞါဲဂွံမံၚ်တအ်ဂှ်မ္ဂး သွက်ညးပါဲဘဲပၞာန်တံဂှ် ပြဒ္ဒညာပရေၚ်ထတ်ယုက် အဆက်လက္ကရဴတအ် နွံကၠုၚ်မာန်ရောၚ် သ္ဂးရ။
အတိုၚ်လိက်ဒုၚ်စဳရေၚ် ဂကောံသုတေသန အပ္ဍဲဒေသ FE5 Thanintharyi ဂှ်မ္ဂး ပ္ဍဲရးတၞၚ်သဳဂှ် ဟိုတ်နူပေါဲဗ္တိုက်ၜါလ္ပာ်တုဲ ညးထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ် နွံကၠုၚ်စဵုကဵု ၇၅၃၀၀ ပြၚ်ရ။
ညးဍုၚ်ကွာန်ပါဲဘဲပၞာန် အပ္ဍဲရးတၞၚ်သဳလ္ၚဵုတံဝွံ ဒှ်ဒၟံၚ်ယဲဇွဟ်၊ ယဲဂၞဴ၊ ယဲဇၞော် ကေုာံ ယဲ မဆေၚ်စပ်ကဵုဂၠံၚ်ယဝီုကျာတအ် ဂၠိုၚ်ဒၟံၚ်တုဲ ဂဥုဲဇဗလေဝ် ဟွံရုမ်ဂပ် ဒှ်ဒၟံၚ်ရောၚ် FE5 Thanintharyi လလောၚ်ပ္တိတ်လဝ်ပရိုၚ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− CJ