ကရောၚ်ပၞာန်ကံၚ်ဇြဳပၞာန်  မကၠုၚ်ကဵုအရီုဗၚ်ပၞာန် ဇရေၚ်ဗ္ဒိုပ်(သေဘောဘိုး) ဒးဒုၚ်ဗ္တိုက်

ဝဝ်လေ၊ မေ ၂၉

ကရောၚ်ပၞာန်ကံၚ်ဇြဳပၞာန် နူဗ္ဒိုပ်ဗျူဟာဖျေံသ္ဇိုၚ် ဍုၚ်ဝဝ်လေ မကၠုၚ်ကဵုအရီုဗၚ်ပၞာန် ဇရေၚ်ဗ္ဒိုပ်ဒပ်(သေဘောဘိုး) အလုံကရောၚ်ပၞာန်မွဲဂှ် ဒးဒုၚ်ဗ္တိုက်လဝ်တုဲ ဒပ်ကံၚ်ဇြဳပၞာန်ဗွဲမဂၠိုၚ်ဂၠေၚ် ဒးချိုတ်အာလဝ်တုဲ ဟွံအောန်နူ ၁၀ တၠဂှ် ရပ်ဂွံလဝ်ဂျိုၚ်ၚ်ရောၚ် ဂွံတီကေတ် အတိုၚ်ဂလာန် တမ်ရိုဟ်ပရိုၚ်ပရေၚ်ပၞာန်ရ။

ညံၚ်ဗ္ဒိုပ်ဒပ်(သေဘောဘိုး) နူဒပ်ပံၚ်ကောံပၠန်ဂတး ဒပ်မဟာ ၆ KNLA တအ် မဗိုၚ်ကၟာတ်လဒဵုဗ္တိုက်ဒၟံၚ်ဂှ် ဟွံဂွံစှ်ေအာဂှ် ဒပ်ကံၚ်ဇြဳပၞာန် ဇြဟတ်မၞုံၜိုတ် ၇၀ ဝွံ ပ္ဍဲဂိတုမေ ၂၇ အခိၚ်နူဂယးဂှ် နူဗ္ဒိုပ်ဗျူဟာဝဝ်လေမွဲကဆံၚ် ပတဝ်ကၠုၚ်က္ဍိုပ် လ္ပာ်ကွာန်(သေဘောဘိုး) တုဲ ထ္ပက်ကၠုၚ်ကရောၚ်ပၞာန် နူကဵုဗလးတိတုဲ စိုပ်ကၠုၚ်ပ္ဍဲ(ဆုံဆည်းမြိုၚ်) ဒၞါဲဌာန်ဂအုပ်ဗဟဵု ဒပ်ပၞာန်ဒတုဲဖဵုဒဳမိုဝ်ကရေဇြဳကရေၚ် DKBA ရ။

ကရောၚ်ပၞာန်ဒပ်ကံၚ်ဇြဳပၞာန် ဇြဟတ်ဗ္ဒါဲ ၇၀ စိုပ်ကၠုၚ်ပ္ဍဲ(ဆုံဆည်းမြိုၚ်) ဌာန်ဂအုပ်ဗဟဵု DKBA ဂှ် ဒပ်ပံၚ်ကောံ KNLA KNDO PDF ကြတ်ဗ္တိုက်လဝ် ဗ္ဒါဲ(ဆုံဆည်းမြိုၚ်) တုဲ အလုံကရောၚ်ပၞာန်ဒပ်ကံၚ်ဇြဳပၞာန်မွဲ ဇီုကပိုက်ဒးအာလဝ်တုဲ ဗွဲမဂၠိုၚ်ချိုတ်အာလဝ်ရောၚ် တမ်ရိုဟ်ပရိုၚ်ပရေၚ်ပၞာန်ဂမၠိုၚ် သ္ဂးရ။

အပ္ဍဲပေါဲဗ္တိုက်ဂှ် ကောန်ဒပ်ကံၚ်ဇြဳပၞာန် ၁၀ တၠအောန်အိုတ်ဂှ်လေဝ် ဒပ်ပံၚ်ကောံပၠန်ဂတး ဒပ်မဟာ ၆ KNLA တအ် ရပ်ဂွံလဝ်ဂျိုၚ်ဂျိုၚ်နွံတုဲ ဒပ်ကံၚ်ဇြဳပၞာန် ထောံဂြာတ်မံၚ်မခတိုဟ်နူကဵုပၞာန်ကျာ ပ္ဍဲ(ဆုံဆည်းမြိုၚ်) မဒှ်ဌာန်ဂအုပ်ဗဟဵု DKBA ဂှ် ဗွဲမသ္ကာတ်မြဟ်ရောၚ် တမ်ရိုဟ်ပရိုၚ်ပရေၚ်ပၞာန်ဂမၠိုၚ် ဟီုရ။

ကရောၚ်ပၞာန်ဒပ်ကံၚ်ဇြဳပၞာန် စိုပ်ကၠုၚ်သွက်ဂွံကဵုအရီုဗၚ်ပၞာန် ဇရေၚ်ဗ္ဒိုပ်(သေဘောဘိုး) အပ္ဍဲဂိတုမေ ၂၇ ကဵု ၂၈ ဂှ် ကရောၚ်ပၞာန်ပံၚ်တောဲ KNLA PDF ဗျူဟာ ၃၂ တအ် ကၟာတ်လဒဵုဗ္တိုက်လဝ်တုဲ ရပ်သီဂွံလဝ်ကောန်ဒပ်ကံၚ်ဇြဳပၞာန် ကေုာံ မကမ်လွဟ်လက်နက်ဂမၠိုၚ်ရောၚ် ကရောၚ်ပၞာန်(ကျားသစ်နက်) လေဝ် လလောၚ်ပ္တိတ်လဝ်ပရိုၚ်ရ။

က္ၜၚ်ကျာဒပ်ကံၚ်ဇြဳပၞာန် ဟိုတ်နူကၠုၚ်ထောံမံၚ်မခတိုဟ် ဗ္ဒါဲပယျဵုသေံဂှ်တုဲ ဒပ်ပၞာန်သေံလေဝ် ဗလးလဝ်က္ၜၚ်ကျာဗ္တိုက်တုဲ မွဲဒမြိပ်ပယျဵုဂှ် ဖျေံလဝ်ကောန်ဒပ်တုဲ မၚ်ရံၚ်ဒၟံၚ်ဂီုကၠီုပယျဵုဂှ် တမ်ရိုဟ်သေံဂမၠိုၚ် ထ္မံက်ထ္ၜးကဵုလဝ်သမ္တီရ။

ဗ္ဒိုပ်ဒပ်ကံၚ်ဇြဳပၞာန် ဗ္ဒိုပ်(သေဘောဘိုး) နွံဒၟံၚ်လ္တူဂၠံၚ်ကွဳစက် ဝဝ်လေ−ဗြဝတဳ ခရိုၚ်ဗြဝတဳ တွဵုရးကရေၚ်ဂှ် ပ္ဍဲဂိတုမေ ၂၇ တေံ ဒပ်ပံၚ်ကောံပၠန်ဂတး ဒပ်မဟာ ၆ KNLA တအ် ထ္ပက်ပၞာန်ဗ္တိုက်လဝ်တုဲ ညံၚ်ဗ္ဒိုပ်ဟွံဂွံစှ်ေအာဂှ် နူဗျူဟာဝဝ်လေ အခိၚ်ဒပ်ကံၚ်ဇြဳပၞာန် ပလံၚ်ဗစိုပ်နၚ်အရီုဗၚ်ပၞာန်ဂှ် ဒးဒုၚ်ကြတ်ဗ္တိုက်လဝ်ဘာ်တရဴရ။

ဟိုတ်နူပေါဲဗ္တိုက်(သေဘောဘိုး) တုဲ ညးဒေသ နူကဵုကွာန်(သေဘောဘိုး၊ တောၚ်နီ၊ ဆုံဆည်းမြိုၚ်) ၃၀၀ ပြၚ်ဝွံ ဒးဂြိပ်ဒဴပါဲဒလေတ်ဒၟံၚ် ပ္ဍဲဍုၚ်သေံတုဲ ညးတာလျိုၚ်သၟိၚ်တၠအဝဵုသေံတအ် မၚ်မွဲရီုဗၚ်ကဵုလဝ်ရောၚ် ဂွံတီကေတ်ရ။

ဒပ်ပံၚ်ကောံပၠန်ဂတး သၟဝ်က္ဍိုက်ပ် ဒပ်မဟာ ၆ KNLA ဂှ်ဝွံ မ္ၚးနူဗ္ဒိုပ်ဒပ်(သေဘောဘိုး) ဒပ်ကံၚ်ဇြဳပၞာန်ဂှ် ပ္ဍဲဂိတုမေ ၂၀ တေံ ဗ္တိုက်ဒၟံၚ်ဗ္ဒိုပ်(ကနဲလေး၊ မော်ခီး) တုဲ ပေါဲဗ္တိုက်ၜါလ္ပာ် က္တဵုဒှ်ဒၟံၚ် ဗွဲမသ္ကာတ်မြဟ်တုဲ ဒပ်ကံၚ်ဇြဳပၞာန်ဂှ်တှ်ေ ညံၚ်ဗ္ဒိုပ်ဟွံဂွံစှ်ေအာဂှ် သ္ပပဓာန်ဒၟံၚ်ကဵုပၞာန်ကျာသၟးတုဲ ဒးဗ္တိုက်ဒၟံၚ်ရ။

ပရိုၚ်−သြၚ်လောန်တိုၚ်(မ်)

ဗီုရုပ်−KNLA/PDF